DZIPHISALEMA 144 - BIVHILI KHETHWA Mafhungo Madifha

Thabelo ya khosi i tshi livhuha Muṋe washu Ramaanḓa Mudzimu wa vha shayaho nungo

Phisalema ya Dafita.

¹ Nga hu rendwe Muṋe washu, Ene bako ḽanga! Ndi Ene a gudisaho zwanḓa zwanga u lwa, a funza minwe yanga u fara mafumo.

² Muṋe washu, ndi Iwe Mutsireledzi wanga a fulufhedzeaho, vhudzumbamo hanga, Mutshidzi wanga, tshiṱangu tshanga, vhukhudo hanga; ndi Iwe u no ita uri vhathu vhanga vha nnduvhe.

³ Muṋe washu, nṋa muthu u tou vha mini u tshi vhuya wa mu sedza-vho? Mubebwa-nga-muthu u tou vha mini u tshi vhuya wa mu humbula-vho?

⁴ Muthu u nga mufemo, maḓuvha awe a fhira unga murunzi.

Muṋe washu Mulamuleli

⁵ Muṋe washu, tsisa makole au u tsele fhasi, kwama dzithavha dzi dube vhutsi.

⁶ Balanganya maswina nga phenyo dzau, posa misevhe yau u vha shakulise.

⁷ Onyolosa tshanḓa tshau u ngeo ṱaḓulu, u ntshidze ndi si kumbiwe nga muḓalo wa maḓi, u nndamukise zwanḓani zwa vhatsinda;

⁸ milomo yavho i amba mazwifhi, naho vha tshi ana vha anela mazwifhi.

⁹ Mudzimu, ndi ḓo u imbela luimbo luswa, ndi ḓo u lidzela haripa ya thale dza fumi.

¹⁰ Ndi Iwe u no ita uri mahosi a kunde; u lamukisa nṋe Dafita mukoma wau.

¹¹ Nndamukise kha pfumo ḽa vhuhali, u ntshidze zwanḓani zwa vhatsinda; milomo yavho i amba mazwifhi, naho vha tshi ana vha anela mazwifhi.

Mulalo

¹² Ngavhe vhatuka vhashu u bva hanani havho vha tshi nga zwimela zwi no aluwa zwo khwaṱha; vhasidzana vhashu vha nga phuphu dza guḓani dzo vhaḓelwaho u ṱama pfamo.

¹³ Ngavhe zwiṱaṱari zwashu zwi tshi ḓala, zwa wa muwa nga mbeu ya tshakha-tshakha; nngu dzashu mafuloni ashu dza dzwala zwigidi na mahumi a zwigidi,

¹⁴ kholomo dzashu dza vha na maḓamu, hu si vhe na swina ḽi no ri tshoṱhela kana ḽa ri thuba, magondoni ashu hu si pfale zwililo.

¹⁵ Vha na mashudu vha no nga vhenevho. Lu na mashudu lushaka lune Mudzimu walwo a vha Muṋe washu.