DZIPHISALEMA 143 - BIVHILI KHETHWA Mafhungo Madifha

Thabelo ya muthu o kuleaho nungo O kuleaho nungo

Phisalema ya Dafita.

¹ Muṋe washu, ipfa thabelo yanga, nthetshelese ndi tshi u lilela; mphindule, u na ngoho, u a fulufhedzea.

² U songo vhuya wa ntsengisa; kha vhoṱhe vha tshilaho, ndi nnyi ane wa mu vhona e muvhuya?

³ Swina ḽanga ḽo ntsala murahu, ḽo ntsimbeledzela fhasi, ḽo ntsukumedzela swiswini, ha vho faho kale.

⁴ Ndi vho ṱoḓa na u ṱovhowa, mbilu yanga yo hanganea.

⁵ Ndi elelwa maḓuvha aḽa a kale; ndi elekanya zwoṱhe zwe wa nnyitela, nda humbula zwe zwanḓa zwau zwa shuma.

⁶ Ndi livhisa zwanḓa zwanga ha Iwe, nda u rabela; ndo lavhelela phindulo yau, unga mavu o omaho o lindela mvula.

U fulufhela Muṋe washu na u mu thetshelesa

⁷ Muṋe washu, ṱavhanya u mphindula, muya wanga u a kundelwa; u songo mpfuralela, ndi sa ḓo fana na vhane vha godimela tshaloni.

⁸ Ḽi tshi tsha kha ndi vhone vhuthu hau, nṋe ndi fulufhela Iwe, ndi ḓikumedza Iwe, ntsumbedze nḓila ine nda fanela u i fara.

⁹ Muṋe washu, ndi dzumbama nga Iwe, nndamukise kha maswina anga.

¹⁰ U Mudzimu wanga, mpfunze u ita zwine wa funa; Muya wau muvhuya nga a nnyendedze ho linganelaho.

¹¹ Muṋe washu, ntshidze u tshi itela dzina ḽau; u a fulufhedzea, nṋule khomboni.

¹² Maswina anga a fhedze oṱhe, hufha lufuno lwau lu sa tseki; lozwa vhakandeledzi vhanga, hufha ndi mulanda wau.