DZIPHISALEMA 140 - BIVHILI KHETHWA Mafhungo Madifha

U humbela u tsireledzwa kha maswina a vhunwa Vhunwa

Phisalema ya Dafita ye a sikela malogwane.

¹ Muṋe washu, ntshidze kha vhathu vhavhi, ntsireledze kha vha nndevhelaho!

² Vha luka vhunwa mbiluni dzavho, vha dzulela u vusa nndwa;

³ ndimi dzavho dzo halifha unga dza ṋowa, vho mara vhuṱungu ha mavuluvulu.

⁴ Muṋe washu, nndondole, vhavhi vha si nkunde, ntsireledze kha vha nndevhelaho! Vha dzula vho langana u mpiringedza.

⁵ Vhadzia-u-ḓihudza vho nthetshela tshikwekwe, vho nthea nga thambo, vha ṱharamudza mambule, vha mmbetshela milavhu nḓilani.

U teketela maswina

⁶ Ndi amba na Muṋe washu nda ri, “Iwe u Mudzimu wanga.” Muṋe washu, ipfa zwililo zwanga!

⁷ Yawee, Muṋe washu, Muṋe wa zwoṱhe, Mutshidzi wanga wa maanḓa, wo mpilela ṱhoho musi wa nndwa.

⁸ Muṋe washu, u songo ṋea vhavhi zwine vha tama, u songo tenda zwe vha langana zwi tshi itea, vha sa ḓo ḓihudza.

⁹ Vhuṱungu he vho ntangaho vha mphomela, na zwe vha nnyita, ngavhe zwi tshi vha ḽa ṱhoho.

¹⁰ Ngavhe vha tshi welwa nga masimbe; kha vha posiwe muliloni, kha vha poswe dindini, vha si tsha vuwa.

¹¹ Vhasasaladzi kha vha shaye vhudzulo fhano shangoni; khombo kha i londe vhadzia-u-levha, i vha lozwe!

Fulufhelo

¹² Nṋe ndi ḓivha uri Muṋe washu u lamulela vha tambudzwaho, a imelela vha kandeledzwaho.

¹³ Ngoho vha fulufhedzeaho vha ḓo renda dzina ḽau, vha si na vhufhura vha ḓo u luvha.