DZIPHISALEMA 14 - BIVHILI KHETHWA Mafhungo Madifha

Vhutsilu ha u sa londa Mudzimu Zwiambo zwa tsilu

Phisalema ya Dafita ye a sikela malogwane.

¹ Tsilu mbiluni yaḽo ḽi ri, “A hu na Mudzimu, a hu na Muhaṱuli.” Vho tshinyala vha ita zwa vhuṱudzi, a hu na na a itaho zwivhuya.

Mudzimu a tshi sedza vhathu

² Muṋe washu u sedza vhathu e ṱaḓulu, uri a vhone arali hu na wa ṱhalukanyo, a ṱoḓaho Mudzimu.

³ Vhoṱhe vho bva nḓilani, vha vho nengisa vhoṱhe, a hu na na a itaho zwivhuya, na muthihi zwawe.

Maano a vhavhi a ḓo pfuvha

⁴ Kani vhaitazwivhi a vha na ṱhalukanyo hezwi vha tshi ḽa vhathu vhanga unga vhuswa? Na Mudzimu a vha vhuyi vha mu rabela.

⁵ A vha zwi vhoni uri vha ḓo welwa nga zwi ofhisaho naa? Mudzimu u ima na vha fulufhedzeaho.

⁶ Ni piringanya maano a vhaheḓana, hone vha khuda nga Muṋe washu.

⁷ Yawee, ngavhe u tshidzwa ha Israele hu tshi bva Tsioni! Musi Muṋe washu a tshi ḓo dovha a vusa lushaka lwawe, ndi hone Jakopo a tshi ḓo pembela, Israele a takala.