DZIPHISALEMA 139 - BIVHILI KHETHWA Mafhungo Madifha

Muṋe washu Muḓivhazwoṱhe Muvhonazwoṱhe

Phisalema ya Dafita ye a sikela malogwane.

¹ Muṋe washu, wo nṱoolola wa nnḓivha!

² Ndó dzula, kana ndó ima, Iwe u a zwi ḓivha, u ṱanḓulukanya mihumbulo yanga u kule.

³ Ndi tshi tshimbila, na musi ndi tshi lala, u a zwi vhona; nḓila dzanga dzoṱhe u a dzi ṱalukanya.

⁴ Na musi ndi sa athu bula ipfi, Iwe Muṋe washu wo zwi ḓivha zwoṱhe.

⁵ U vhea tshanḓa tshau kha nṋe, wa ntsireledza matungo oṱhe.

⁶ Nḓivho yeneyo i a nkanukisa, i nṱha-nṱha, a thi i swikeli.

Muḓalahoṱhe

⁷ Muya wau ndi ḓo u tinyelafhi? Iwe ndi ḓo u shavhelafhi?

⁸ Ndá gonya makoleni, u henengei; ndá adza thovho vhudzulavhafu, ndi wana u henefho.

⁹ Ndá fhufhela vhubvaḓuvha, kana nda yo dzula hune lwanzhe lwa guma,

¹⁰ na henengei tshanḓa tshau tshi ḓo nnyendedza, u ḓo mpfara nga tshanḓa tshau tsha maanḓa.

¹¹ Ndá ri, “Swiswi nga ḽi ntibe, tshedza tsho ntangaho tshi vhe vhusiku,”

¹² matsina na swiswi Iwe u vhona ḽi si swiswi, vhusiku vhu penya unga masiari; hu swiswi, hu tshedza, Iwe u vhona zwi tshi fana.

Musikazwoṱhe

¹³ Miraḓo yanga yoṱhe yo vhumbwa nga Iwe; wo nnduka ndi thumbuni ya mme anga.

¹⁴ Ndi tshi vhona uri wo mmbumba hani, ndi a kanuka, nda ofha, nda u renda; mishumo yau i a akhamadza, hezwo ndi a zwi ḓivha zwavhuḓivhuḓi.

¹⁵ Marambo anga a tshi vhumbiwa tshiphirini, ndi tshi lukiwa tshivhindini tsha mavu, ndo vha ndi songo u dzumbama.

¹⁶ Wo mmbona ndi sa athu vha na tshivhumbeo. Maḓuvha anga oṱhe, e wa ntela zwiḽa a sa athu thoma, o vha o no ḓi ṅwalwa.

¹⁷ Mudzimu, mihumbulo yau a i na muṱalukanyi, yo ṱanḓavhuwa hani!

¹⁸ Ndi tshi i vhala ndi wana yo ḓala u fhira muṱavha. Ndi tshi vuwa ndi wana ndi tshee na Iwe.

Mukhethwakhethwa

¹⁹ Mudzimu, ngavhe u tshi vhulaha vhavhi! Phondi thi funi na u dzi vhona!

²⁰ Vha u isela phungo mmbi, maswina au a tamba nga dzina ḽau.

²¹ Muṋe washu, vhane vha u vhenga ndi ḓo kundwa ngani u vha vhenga? Vhane vha u vutshela ndi kundwa ngani u vha nyala?

²² Ndi tou vha vhenga vhukumakuma, ndi vha ita maswina anga.

²³ Mudzimu, nṱolole u ḓivhe mbilu yanga; nndinge, u ḓivhe mihumbulo yanga,

²⁴ u vhone arali ndo bva nḓilani, u nnyendedze nḓilani yo livhaho ha Iwe.