DZIPHISALEMA 138 - BIVHILI KHETHWA Mafhungo Madifha

U livhuha lufuno lwa Mudzimu lu sa gumi Ndivhuho ya muimbi

Phisalema ya Dafita.

¹ Ndi u renda nga mbilu yoṱhe. Midzimu nga i zwi pfe zwayo – nṋe ndi imbela Iwe.

² Ndi ḓo u gwadamela ndó livhana na thembele yau khethwa, nda renda dzina ḽau; lufuno lwau a lu dzinginyei, u a fulufhedzea; wo khunyeledza zwoṱhe zwe wa ri fulufhedzisa, zwa fhira kule zwe ra vha ro zwi lavhelela, naho ro vha ri tshi ḓivha maanḓa au.

³ Ndi tshi u vhidzelela wo mphindula, wa nkhwaṱhisa nda vha na mbilutshinna.

Thendo dza ḽifhasi ḽoṱhe

⁴ Muṋe washu, mahosi oṱhe a ḽifhasi vha tshi pfa zwine wa amba, nga vha u rende.

⁵ Nga vha imbe dza ndaela dza Muṋe washu; vhugala ha Muṋe washu ndi vhuhulu.

⁶ Muṋe washu, na vhuhulu háwe ha litshi u londola muheḓana; vhadzia-u-ḓihudza vhone u a vha ṱukufhadza e kule-kule.

Lufuno lu sa tseki

⁷ Naho ndi tshi tshimbila tshivhindini tsha khombo, u a ntshidza; maswina anga ó ntsinyutshela, u angaladza tshanḓa tshau tsha maanḓa wa ntshidza.

⁸ Muṋe washu u ḓo khunyeledza zwivhuya zwe a nnzudzanyela. Muṋe washu, lufuno lwau a lu dzinginyei lini na lini; u songo litsha u vuledza mishumo ye wa i thoma.