DZIPHISALEMA 135 - BIVHILI KHETHWA Mafhungo Madifha

Thendo i sa tumuwi Thendo dza vhathu vha Mudzimu

¹ Haleluya, nga hu rendwe Muṋe washu! Rendani dzina ḽa Muṋe washu, inwi vhalanda vha Muṋe washu, mu rendeni,

² inwi ni imaho nḓuni ya Muṋe washu, na shumela Mudzimu washu miṱani ya nnḓu yawe.

³ Rendani Muṋe washu, u na vhuthu, imbelani dzina ḽawe, ḽi takadza hani!

⁴ Muṋe washu o ḓinangela Jakopo, a ḓikhethela Israele a ri ndi wawe.

Ramaanḓaoṱhe

⁵ Ndi a ḓivha uri Muṋe washu ndi muhulwane, Muṋe washu u fhira midzimu yoṱhe.

⁶ Muṋe washu u ita zwine a funa ngei ṱaḓulu na fhano fhasi, malwanzheni na mativhani oṱhe.

⁷ Ndi Ene a no takusa makole vhusendekamisi, a ita phenyo dzi ḓisaho mvula, a bvisa maḓumbu zwisikuni zwawe.

Muṋe washu Mutshidzi

⁸ Ndi Ene we a lozwa matanzhe oṱhe a Egipita, a vhathu na a dziphukha,

⁹ a ita maḓembe na zwimangadzo kha iwe Egipita, a laṱisa Farao na vhakoma vhawe vhoṱhe;

¹⁰ a lozwa tshakha nnzhi, a vhulaha mahosi a maanḓa;

¹¹ Sihoni khosi ya Vhaamori, na Ogo khosi ya Bashani, na yoṱhe mivhuso ya Kanana,

¹² shango ḽavho a ḽi ṋea vhathu vhawe Israele, ḽa vha ḽavho.

¹³ Dzina ḽau, Muṋe washu, a ḽi nga lovhi lini na lini, u ḓo dzula u tshi humbulwa nga mirafho na mirafho.

¹⁴ Muṋe washu u ḓo lamulela vhathu vhawe, u ḓo khathutshela vhalanda vhawe.

Vhutsilu ha u luvha midzimu i si tshithu

¹⁵ Zwitungulo zwa tshakha dza vhannḓa ndi zwa siliva na musuku, zwo fulwa nga zwanḓa zwa vhathu.

¹⁶ Zwi na milomo – a zwi ambi; zwi na maṱo – a zwi vhoni;

¹⁷ zwi na nḓevhe – a zwi pfi; milomo yazwo na u fema a i femi.

¹⁸ Vhavhumbi vhazwo vha ḓo fana nazwo, na vhoṱhe vhane vha zwi fulufhela.

Nyimbo dza vhalanda vha Muṋe washu

¹⁹ Iwe nnḓu ya Israele, renda Muṋe washu! Iwe nnḓu ya Aroni, renda Muṋe washu!

²⁰ Iwe nnḓu ya Livi, renda Muṋe washu! Rendani Muṋe washu, noṱhe inwi ni mu ofhaho!

²¹ Vha Tsioni nga vha rende Muṋe washu, Ene a dzulaho Jerusalema. Haleluya, nga hu rendwe Muṋe washu!