DZIPHISALEMA 12 - BIVHILI KHETHWA Mafhungo Madifha

Mudzimu ndi Muhaṱuli a fulufhedzeaho Mazuwo a vhavhi

Phisalema ya Dafita ye a sikela malogwane; i pfi i imbiwe hu tshi lidzwa mbila dza tsinga 8.

¹ Muṋe washu, ntshidze, a hu tshee na vhathu-vhathu fhano shangoni, u tshi sedza vhathu, a fulufhedzeaho ha sokou wanala.

² Ho sala u sokou zwifhelana nga tshavho. Vha tshi amba vha tou swaledzela, ngeno mbiluni zwi siho.

³ Hone milomo yoṱhe ya u swaledzela Muṋe washu u ḓo ita uri i fhumule; na kha lulimi lwa mazuwo zwi ḓo ralo.

⁴ Vha tshi zuwa vha ri, “Ri ḓo kunda nga lulimi lwashu; milomo hufha i yashu – a ri vhusaho ndi nnyi?”

Phindulo ya Mudzimu

⁵ Zwino-ha Muṋe washu u ri, “Uvhani ndi a takutshedza nga u vhona u kandeledzwa ha vhaheḓana na u pfa zwigomelo zwa vhashai; vho lavhelelaho u lamulelwa vhó fhihamelwa ndi ḓo vha lamulela.”

⁶ Maipfi a Muṋe washu ndi maipfi vhukuma, a nga siliva ye ya bviswa manyelo ṋanḓoni kaṱanu na kavhili.

⁷ Iwe Muṋe washu u ḓo vha londola lini na lini, havha vhathu vha tshi vha levhela u ḓo vha tsireledza,

⁸ naho vhathu vhavhi vha tshi tou gaba, vhunwa hó ḓibandutshedza vhathuni.