DZIPHISALEMA 119 - BIVHILI KHETHWA Mafhungo Madifha

U takadza ha mulayo wa Muṋe washu Mbilu nthihi

¹ Vha na mashudu vho faraho nḓila i sa solisei, vha tevhedza mulayo wa Muṋe washu.

² Vha na mashudu vha no vhulunga nyeletshedzo dzawe, vha ḓidinela Ene nga mbilu yoṱhe.

³ A vha tshinyi, vha tshimbila nḓilani dzawe.

⁴ Wo vhea ndaela dzau, wa ri dzi tevhelwe nga vhuronwane.

⁵ Ngavhe ndi tshi tevhedza zwe wa vhofha ndi sa tseki!

⁶ Arali milayo yau nda i dzhiela nzhele, ndi hone ndi sa ḓo shona.

⁷ Ndi ḓo guda pfanelo dze wa vhea dzi sa khakhi, nda u renda nga mbilu yo ṱambaho.

⁸ Ndi ḓo tevhedza zwe wa vhofha; yawee, u songo nṱamba tshoṱhe!

Lupfumo lwo vhulungwaho mbiluni

⁹ Mutuka a nga swiela hani nḓila yawe naa? Ndi nga u tevhedza zwine wa amba.

¹⁰ Nṋe ndi ḓo ḓidinela Iwe nga mbilu yoṱhe; nndededze ndi si pambuwe milayoni yau.

¹¹ Ipfi ḽau ndi ḓo ḽi vhulunga mbiluni yanga, uri ndi si vhuye nda u khakhela na kathihi.

¹² Nga hu rendwe Iwe Muṋe washu! Mpfunze u tevhedza zwe wa vhofha.

¹³ Pfanelo dzoṱhe dze wa vhea ndi dzi ḓivhadza nga mulomo wanga.

¹⁴ Ndi takalela u tevhedza nyeletshedzo dzau unga muthu a tshi takalela lupfumo lunzhi.

¹⁵ Ndi ḓo dzula ndi tshi elekanya ndaela dzau, nda sedza nḓila dzau.

¹⁶ Ndi ḓo ḓiphiṋa nga u tevhedza zwe wa vhofha, ipfi ḽau ndi nga si ḽi hangwe.

U takadzwa nga mulayo wa Muṋe washu

¹⁷ Ntonde nṋe mulanda wau, ndi tshile ndi tshi tevhedza ipfi ḽau.

¹⁸ Mmbonyolose, ndi vhone maanḓa a kanukisaho a mulayo wau.

¹⁹ Nṋe ndi mudali fhano shangoni, u songo nnzumbela milayo yau.

²⁰ Mbilu yanga i tou swa nga tshiṱuvho, i swela u tevhedza pfanelo dze wa vhea i sa fhidzi.

²¹ Iwe u kaidza vhadzia-u-ḓihudza, vho teketelwa, vho nyadza pfanelo dze wa vhea.

²² Nṱanzwe maṱamba avho na luswetho, hufha ndi tshi tevhedza nyeletshedzo dzau.

²³ Naho vhavhusi vha dzula vha nndangana, nṋe mulanda wau ndi ḓo dzula ndi tshi elekanya milayo yau.

²⁴ Nṋe ndi takalela nyeletshedzo dzau, ndi vhone vhaeletshedzi vhanga.

“Dovha u nṋee maanḓa!”

²⁵ Ndo tsumbudzwa buseni, dovha u nṋee maanḓa unga wo amba.

²⁶ Ndo u vhudza zwi nndemelaho, wa mphalala; mpfunze u tevhedza zwe wa vhofha.

²⁷ Ndi tama hani u ṱalukanya ndaela dzau, uri ndi dzule ndi tshi elekanya mishumo yau i kanukisaho!

²⁸ Ndi lala ndo donola maṱo nga u ḽa mbilu; nkhwaṱhise unga wo mpfulufhedzisa.

²⁹ Ntsendedze kule na vhufhura, u ntonde nga u mpfunza mulayo wau.

³⁰ Ndo ḓinangela u tshila nga u fulufhedzea, ndo ṱanganedza pfanelo dze wa vhofha.

³¹ Muṋe washu, ndi nambatela nyeletshedzo dzau; u songo vhuya wa ntshonisa.

³² U nnyengedza ṱhalukanyo; ndi ḓo tevhedza milayo yau nga mbilu yoṱhe.

U humbela ṱhalukanyo

³³ Muṋe washu, mpfunze u tevhedza zwe wa vhofha, ndi hone ndi tshi ḓo zwi vhulunga nda ṱhaphudza.

³⁴ Nṋee ṱhalukanyo, ndi kone u vhulunga mulayo wau, ndi u tevhedze nga mbilu yanga yoṱhe.

³⁵ Nnyendedze nḓilani ya milayo yau, ndi a i takalela!

³⁶ Tshingamisela mbilu yanga kha nyeletshedzo dzau, hu si kha u ḽeledza vhaṅwe.

³⁷ Sudzulusa maṱo anga kha zwi si na mushumo, u nnyendedze, ndi kone u tshila.

³⁸ Khunyeledza zwe wa mpfulufhedzisa, wa zwi fulufhedzisa na vhoṱhe vhane vha u ofha.

³⁹ Ndi ofha u nyadziwa, ntinyise hone; pfanelo dze wa vhofha dzo naka hani!

⁴⁰ Ndi ṱuvha hani u ita zwe wa laya! Nṋee vhutshilo, hufha u tshi fulufhedzea.

U fulufhela Mulayo wa Muṋe washu

⁴¹ Ntonde Muṋe washu, hufha lufuno lwau lu sa dzinginyei, ntshidze unga wo mpfulufhedzisa.

⁴² Ndi hone ndi tshi ḓo kona u fhindula vha sa nkhumeli; nṋe ndi fulufhela ipfi ḽau.

⁴³ U songo vhuya wa tenda ndi tshi litsha u amba ngoho; ndo ḓiimisela u tevhedza pfanelo dze wa vhofha.

⁴⁴ Ndi ḓo dzula ndi tshi vhulunga mulayo wau lini na lini.

⁴⁵ Ndi ḓo tshila ndo vhofholowa tshoṱhe, nge nda tevhedza ndaela dzau nga vhuronwane.

⁴⁶ Ndi ḓo ḓivhadza mahosi nyeletshedzo dzau, a thi nga vhuyi nda shona.

⁴⁷ Milayo yau ndi a i funa, ndi tou ḓiphiṋa ngayo.

⁴⁸ Ndi a i hulisa, a thi i funi zwone, ndi dzula ndi tshi elekanya zwe wa vhofha.

U ḓitika nga mulayo wa Muṋe washu

⁴⁹ Elelwa zwe wa mmbudza; zwo ita uri ndi u fulufhele.

⁵⁰ Zwe wa mpfulufhedzisa zwo nṋea vhutshilo, ndi zwone zwi mphumulaho miṱodzi.

⁵¹ Naho vhadzia-u-ḓihudza vha sa nngoḓi zwone, nṋe a thi pambuwi mulayoni wau.

⁵² Muṋe washu, ndi tshi elekanya pfanelo dze wa vhea kale na kale, ndi rudza mbilu.

⁵³ Ndi tou nga ndi sa balea ndi tshi vhona vhavhi vha tshi nyadza mulayo wau.

⁵⁴ Ndo sika nyimbo dzi no renda zwe wa vhofha, ndi tshi kha ḓi tshila fhano shangoni.

⁵⁵ Na vhusiku ndi elelwa dzina ḽau, Muṋe washu, uri ndi vhulunge mulayo wau.

⁵⁶ Zwe nda ḓowela ndi u vhulunga ndaela dzau.

U ḓikumedza mulayo wa Muṋe washu

⁵⁷ Muṋe washu, a hu na tshithu tshi ntakadzaho arali e si Iwe; ndi fulufhedzisa u vhulunga maipfi au.

⁵⁸ Ndo u luvhelela nga mbilu yoṱhe; nkhathutshele unga wo amba.

⁵⁹ Ndi tshi elekanya zwine nda ḓo ita, ndi ḓiimisela u ita zwe wa nnyeletshedza.

⁶⁰ A thi ongolowi u tevhedza milayo yau, ndi a ṱavhanya.

⁶¹ Nangwe vhavhi vho ntanda nga thambo, a thi hangwi mulayo wau.

⁶² Vhukati ha vhusiku ndi a vuwa nda u renda, ndi tshi elekanya pfanelo dze wa vhofha, dzi sa khakhi.

⁶³ Ndi konana na vhoṱhe vhane vha u ofha, vha vhulunga ndaela dzau.

⁶⁴ Muṋe washu, ḽifhasi ḽo ḓala lufuno lwau; mpfunze zwe wa vhofha.

U guda mulayo wa Muṋe washu nga zwi konḓaho

⁶⁵ Muṋe washu, wo ntonda unga wo amba.

⁶⁶ Mpfunze, ndi vhe na nḓivho na ṱhalukanyo, nṋe ndi fulufhela milayo yau.

⁶⁷ Zwiḽa ndi sa athu pfiswa vhuṱungu ndo vha ndi tshi ḓi pambuwa, huno zwino ndi vhulunga ipfi ḽau.

⁶⁸ U na vhuthu, u ita zwivhuya; mpfunze u tevhedza zwe wa vhofha.

⁶⁹ Naho vhadzia-u-ḓihudza vha tshi ri ndi mudzia-u-zwifha, nṋe ndi vhulunga ndaela dzau nga mbilu yanga yoṱhe.

⁷⁰ Naho vhone vhe na mbilu ya mbwane, nṋe ndi ḓiphiṋa nga mulayo wau.

⁷¹ Ndo ita zwone nda tambudzwa; zwo nngudisa zwe wa vhofha.

⁷² Mulayo une wa vhea u tou vha dzanga kha nṋe; ú fhira vhunzhi ha musuku na siliva.

A no tevhedza mulayo wa Muṋe washu ha shoni

⁷³ Ndo itwa nga zwanḓa zwau, ndi zwone zwo mmbumbaho; mphe ṱhalukanyo ndi kone u guda milayo yau.

⁷⁴ Vhane vha u ofha vha ḓo mmbona vha takala, nge nda fulufhela ipfi ḽau.

⁷⁵ Muṋe washu, ndi a ḓivha uri khaṱhulo dzau a dzi khakhi; u tshi mpfisa vhuṱungu zwo vha zwo tea.

⁷⁶ Ngavhe lufuno lwau lu tshi mphumula miṱodzi, unga wo mpfulufhedzisa.

⁷⁷ Nkhathutshele ndi kone u tshila; nṋe ndi ḓiphiṋa nga mulayo wau.

⁷⁸ Ngavhe vhadzia-u-ḓihudza vha tshi shoniswa nge vha nkhakhela ndi si na mulandu; nṋe tshanga hu ḓo vha u elekanya ndaela dzau.

⁷⁹ Ngavhe vhane vha u ofha vha tshi ima na nṋe, vhone vhane vha ḓivha nyeletshedzo dzau.

⁸⁰ Ngavhe mbilu yanga i sa pfuki zwe wa vhofha, ndi sa ḓo shoniswa.

U humbela u lamukiswa

⁸¹ Ndo no tou ṋoka nga u lindela u tshidzwa nga Iwe, huno ndo fulufhela ipfi ḽau.

⁸² Maṱo anga o neta nga u lavhelela zwe wa mpfulufhedzisa, ndi ri, “U ḓo mphumudza lini?”

⁸³ Naho ndo onyana unga mukumba u vhutsini, thi hangwi zwe wa vhofha.

⁸⁴ Ndi ḓo lindela u swika lini? Vha ntovholaho u ḓo vha lifhedza lini?

⁸⁵ Vhadzia-u-ḓihudza vhane vha landula mulayo wau, vha a mmveela khunḓa.

⁸⁶ Milayo yau yoṱhe i na ngoho; mpfarise, vhathu vha khou ntovhola ndi si na tshe nda tshinya.

⁸⁷ Vho ṱoḓou nthutha fhano shangoni, naho zwo ralo a tho ngo furalela ndaela dzau.

⁸⁸ Ntshidze u tshi itela lufuno lwau, ndi kone u tevhedza nyeletshedzo dzau.

U sa tseka ha mulayo wa Muṋe washu

⁸⁹ Muṋe washu, ipfi ḽau ḽo ṱoka midzi ḽiṱaḓulu, a ḽi tseki lini na lini.

⁹⁰ U fulufhedzea hau hu vhonala kha mirafho na mirafho; wo sika ḽifhasi ḽa ḓi ima ḽo ralo.

⁹¹ Zwithu zwoṱhe zwo ḓi raḽa na ṋamusi nge wa ri zwi ralo; zwoṱhe zwi pfi zwi shumele Iwe.

⁹² Arali ho vha hu si u ḓiphiṋa nga mulayo wau, ndo vha ndi tshi ḓo ri u tambudzwa nda lovha.

⁹³ Thi nga vhuyi nda hangwa ndaela dzau; ndi dzone dzo ntshidzaho.

⁹⁴ Ntshidze, ndi muthu wau, ndi ṱoṱoredza ndaela dzau.

⁹⁵ Vhavhi vho nndalela uri vha mmbulahe, hone nṋe ndi tevhedza nyeletshedzo dzau.

⁹⁶ Zwoṱhe zwine ha pfi zwo khunyelela, na u khunyelela házwo ndi vhona zwi tshi guma, hone milayo yau yo ṱanḓavhuwa u pfuka ndinganyo, a i gumi.

Vhuṱali vhu bvaho ṱaḓulu

⁹⁷ Mulayo wau ndi u funa hani! Ḓuvha ḽoṱhe ndi elekanya wone fhedzi.

⁹⁸ Milayo yau i nṱalifhisa nda fhira maswina anga; ndi dzula ndi nayo.

⁹⁹ Ndi ṱalukanya u fhira vhafunzi vhanga vhoṱhe, nge nda dzula ndi tshi elekanya nyeletshedzo dzau.

¹⁰⁰ Vhunga ndi tshi vhulunga ndaela dzau nḓivho yanga i fhira ya ṱhoho tshena.

¹⁰¹ Ndi tata u fara nḓila yo vhifhaho; tshanga ndi u vhulunga ipfi ḽau.

¹⁰² Thi pambuwi kha pfanelo dze wa vhea, hufha wo mpfunza.

¹⁰³ Maipfi au ha nnḓifheli zwone, a ḓifha u fhira mutoli.

¹⁰⁴ Ndaela dzau dzi nṋea ṱhalukanyo, ndi zwine nda vhenga nḓila dzoṱhe dza magombikwa.

Luvhone

¹⁰⁵ Ipfi ḽau ḽi vhonetshela hune nda tshimbila, ḽa vha luvhone nḓilani yanga.

¹⁰⁶ Ndo ana nda khwaṱhisa, nda ri ndi ḓo vhulunga pfanelo dzau dzi sa khakhi.

¹⁰⁷ Ndo tambudzwa nda zwi pfa; Muṋe washu, ntshidze unga wo amba.

¹⁰⁸ Muṋe washu, ngavhe nduvho yanga ya tshirendo i tshi u takadza, u mpfunze u tevhela pfanelo dze wa vhea.

¹⁰⁹ Naho ndi tshi dzula ndi khomboni ya lufu, a zwi nndini, mulayo wau a thi u hangwi.

¹¹⁰ Naho vhavhi vho nthetshela tshikwekwe, a thi pambuwi kha ndaela dzau.

¹¹¹ Nyeletshedzo dzau ndi ifa ḽanga ḽa lini na lini, ndi dzone dzi takadzaho mbilu yanga.

¹¹² Ndo ḓiimisela u ita zwe wa vhofha, nda vhuya nda fa.

U nyala vha mbilu mbili

¹¹³ Ndi nyala vhathu vha no nga muya wa murwelahoṱhe, tshanga ndi u funa mulayo wau.

¹¹⁴ Iwe u vhudzumbamo hanga, u tshiṱangu tshanga; ndi fulufhela ipfi ḽau.

¹¹⁵ Inwi vhavhi, nṱutsheleni, ndi kone u vhulunga milayo ya Mudzimu wanga!

¹¹⁶ Ntike unga wo mpfulufhedzisa, ndi hone ndi tshi ḓo tshila; ndi songo shoniswa nga zwe nda fulufhela.

¹¹⁷ Ntike ndi tshile, ndi dzule ndi tshi vhulunga zwe wa vhofha.

¹¹⁸ U landula vhoṱhe vhane vha nyadza zwe wa vhofha; vhumbulu havho a vhu farisi tshithu.

¹¹⁹ Vhavhi vhoṱhe vha ḽifhasi u vha laṱa unga malambelo, zwenezwo nṋe ndi funa nyeletshedzo dzau.

¹²⁰ Muṱoḓo wanga u a tumuwa nga u ofha Iwe; ndi ofha khaṱhulo dzau.

U lamulelwa kha vha no nyadza Mudzimu

¹²¹ Ndo ita zwi re zwone, zwo teaho; u songo nkovhela vha nkandeledzaho.

¹²² Nnyimelele, u songo tenda vhadzia-u-ḓihudza vha tshi ntambudza.

¹²³ Maṱo anga o neta nga u dzula ndo donolela u tshidzwa hanga nga Iwe, ndó lavhelela zwe wa mpfulufhedzisa, hufha u tshi fulufhedzea.

¹²⁴ Hufha lufuno lwau lu sa dzinginyei, ntonde, u mpfunze u tevhedza zwe wa vhofha.

¹²⁵ Nṋe ndi mulanda wau, mmbonetshele ndi ṱalukanye nyeletshedzo dzau.

¹²⁶ Muṋe washu, mulayo wau wo pfukiwa, tshifhinga tshau tsha u lifhedza tsho swika.

¹²⁷ Ndi funa milayo yau u fhira musuku, musuku u songo vangwaho.

¹²⁸ Thi vhuyi nda pambuwa kha ndaela dzau, ndi vhenga nḓila dzoṱhe dza magombikwa.

U tama u vhulunga mulayo wa Muṋe washu

¹²⁹ Nyeletshedzo dzau dzi takadza hani! Ndi zwine nda dzi vhulunga.

¹³⁰ Maipfi ane wa bula a a vhonetshela, vha shayaho nḓivho a vha funza u ṱalukanya.

¹³¹ Ndi tou femeleka nga u takalela milayo yau.

¹³² Nndavhelese u nkhathutshele, sa zwine wa ḓi ita kha vhane vha u funa.

¹³³ Nndededze ndi si pambuwe kha zwe wa amba; u songo vhuya wa tenda ndi tshi vhuswa nga vhuvhi.

¹³⁴ Ntshidze zwanḓani zwa vha nkandeledzaho, ndi kone u vhulunga ndaela dzau.

¹³⁵ Ngavhe u tshi nndavhelesa nga vhuthu, wa mpfunza u ita zwe wa vhofha.

¹³⁶ Maṱo anga a tou shuluwa nga u vhona vhathu vha sa vhulungi mulayo wau.

Mulayo wa Muṋe washu a u vhuyi wa khakha

¹³⁷ Muṋe washu, a u na tshiṱalula, khaṱhulo dzau a dzi khakhi.

¹³⁸ Wo vhea milayo yau nga nḓila yo teaho, i fulufhedzea tshoṱhe.

¹³⁹ Ndi ḽa mbilu nda fhelela nga u vhona maswina anga a sa londi maipfi au.

¹⁴⁰ Zwe wa amba zwo wanala zwi ngoho fhedzi, ndi zwi funa hani!

¹⁴¹ Naho ndi si tshithu, ndi tshi nyadzea, a thi hangwi ndaela dzau.

¹⁴² Iwe u ḓi dzula u tshi fulufhedzea lini na lini; mulayo wau ndi wa ngoho.

¹⁴³ Naho ndo welwa nga zwi ofhisaho, ndi ḓi ḓiphiṋa nga milayo yau.

¹⁴⁴ Nyeletshedzo dzau a dzi khakhi lini na lini; mpfunze u dzi ṱalukanya, ndi kone u tshila.

U lavhelela u tshidzwa

¹⁴⁵ Ndi khou u vhidzelela nga mbilu yanga yoṱhe; Muṋe washu, mphindule, ndi ḓo vhulunga zwe wa vhofha.

¹⁴⁶ Ndi u ṱavhela mukosi, ntshidze, ndi ḓo konou ita zwe wa nnyeletshedza.

¹⁴⁷ Ndi vuwa nda u ṱavhela mukosi mapfuvhi a sa athu tswuka, nda lindela phindulo yau.

¹⁴⁸ Ndi lala ndo donola maṱo vhusiku hoṱhe, nda elekanya zwe wa fulufhedzisa.

¹⁴⁹ Lufuno lwau a lu dzinginyei, ipfa ipfi ḽanga! Muṋe washu, ntshidze, hufha u tshi fulufhedzea.

¹⁵⁰ Vha ntovholaho lu shonisaho ngevha, vha vho ṱoḓou nkhovha! Vha nyadza mulayo wau.

¹⁵¹ A vha Iwe Muṋe washu, u tsini hanga, milayo yau yoṱhe ndi ya ngoho.

¹⁵² Ndi kale ndo guda nyeletshedzo dzau, wo dzi tetshela lini na lini.

Mukosi

¹⁵³ Edzou sedza u vhone u shengedzwa hanga – a u nndamukisi? Hufha mulayo wau ndi sa u hangwi.

¹⁵⁴ Ntsengele u mmbofholole; ntshidze unga wo mpfulufhedzisa.

¹⁵⁵ U tshidzwa hu kule na vhavhi; a vha londi zwe wa vhofha.

¹⁵⁶ Muṋe washu, u na khathutshelo i si na vhukono; ntshidze nga khaṱhulo yau i sa khakhi.

¹⁵⁷ Maswina anga ane a ntovhola ndi manzhi, huno nṋe a thi pambuwi kha nyeletshedzo dzau.

¹⁵⁸ Zwifheṱi zwi a nnengisa, vha nyadza zwine wa amba.

¹⁵⁹ Muṋe washu, edzou vhona uri ndaela dzau ndi dzi funa hani; lufuno lwau a lu dzinginyei, ntshidze!

¹⁶⁰ Ngoho ndi yone tshivhindi tsha mulayo wau; khaṱhulo dzau dzi sa ṱaluli ndi dza lini na lini.

U dzumbama nga mulayo wa Muṋe washu

¹⁶¹ Vhavhusi vha ntovhola ndi si na tshe nda tshinya; hone tshine mbilu yanga ya tshi ofha ndi ipfi ḽau.

¹⁶² Ndi takalela ipfi ḽau, nda nga o thubaho lupfumopfumo.

¹⁶³ Ndi vhenga vhufhura nda tou vhu nengwa, mulayo wau wone ndi a u funa.

¹⁶⁴ Ndi u renda kaṱanu-na-kavhili nga ḓuvha, ndi tshi itela khaṱhulo dzau dzi sa ṱaluli.

¹⁶⁵ Vha funaho mulayo wau vha na mulalo vhukuma, a hu na tshine tsha vha khukhula.

¹⁶⁶ Ndo lindela u tshidzwa nga Iwe, Muṋe washu, ndi tevhedza milayo yau.

¹⁶⁷ Nyeletshedzo dzau ndi dzi funa u pfuka ndinganyo; ndi a dzi thetshelesa.

¹⁶⁸ Ndi tevhedza ndaela dzau na nyeletshedzo dzau; Iwe u ḓivha nḓila dzanga dzoṱhe.

Thabelo ya u humbela u lamulelwa

¹⁶⁹ Muṋe washu, ngavhe tshililo tshanga tshi tshi swika ha Iwe! Nṋee ṱhalukanyo unga wo amba.

¹⁷⁰ Ngavhe khumbelo dzanga dzi tshi swika ha Iwe! Ntshidze unga wo amba.

¹⁷¹ Ndi ḓo u fhululedza nga wanga mulomo; u mpfunza zwe wa vhofha.

¹⁷² Lulimi lwanga lu ḓo imba ipfi ḽau; milayo yau yoṱhe ndi ya ngoho.

¹⁷³ Ngavhe tshanḓa tshau tshi tshi mpfarisa; ndi tevhedza ndaela dzau.

¹⁷⁴ Ndo ṱulutshela u tshidzwa nga Iwe, Muṋe washu; ndi tou ḓiphiṋa nga mulayo wau.

¹⁷⁵ Ngavhe ndi tshi tshila, nda konou u renda; khaṱhulo dzau ngavhe dzi tshi ntika.

¹⁷⁶ Ndi tendeleka unga nngu yo xelaho; iḓa u nṱoḓe, milayo yau a thi i hangwi.