DZIPHISALEMA 118 - BIVHILI KHETHWA Mafhungo Madifha

Luimbo lwa khosi lwa u livhuha gundo Lufuno lu sa fheli

¹ Livhuhani Muṋe washu, u na vhuthu, lufuno lwawe a lu fheli.

² Vhaisraele kha vha ri, “Lufuno lwawe a lu fheli.”

³ Nnḓu ya Aroni nga i ri, “Lufuno lwawe a lu fheli.”

⁴ Vhane vha ofha Muṋe washu nga vha ri, “Lufuno lwawe a lu fheli.”

Mudzimu Mulamukisi

⁵ Muṋe washu ndo mu ṱavhela mukosi ndó thathedzwa, a mpfa, a mmbofholola.

⁶ Muṋe washu u na nṋe, a thi ofhi tshithu; muthu a nga nnyitani?

⁷ Muṋe washu u na nṋe, ndi Ene Mutiki wanga; ndi ḓo vhona maswina anga o kundwa.

⁸ Ndi khwiṋe u dzumbama nga Muṋe washu u fhira u fulufhela muthu.

⁹ Ndi khwiṋe u khuda nga Muṋe washu u fhira u fulufhela vhavhusi.

Khosi yó tangwa nga maswina

¹⁰ Tshakha dzoṱhe dzo ntanga, hone ndi vha shakulisa nga dzina ḽa Muṋe washu.

¹¹ Vho ntanga matungo oṱhe, hone ndi vha shakulisa nga dzina ḽa Muṋe washu.

¹² Vho phapha matungo oṱhe unga guma ḽa ṋotshi, hone ndi vha shakulisa nga dzina ḽa Muṋe washu, vha swa kathihi fhedzi unga mipfa i tshi duga.

¹³ Ndo sukumedzelwa murahu nda ṱoḓou wa, Muṋe washu a ntika.

¹⁴ Muṋe washu ndi Ene maanḓa anga, ndi Ene luimbo lwanga, u tshidzwa hanga ndi Ene.

Muḓalo

¹⁵ Nḓuni dza vha fulufhedzeaho hu pfala mifhululu na nyimbo dza gundo. Vha ri, “Tshanḓa tsha Muṋe washu tsha maanḓa tsho ita zwihulu!

¹⁶ Muṋe washu o angaladza tshanḓa tshawe tsha maanḓa; tshanḓa tsha Muṋe washu tsha maanḓa tsho ita zwihulu!”

¹⁷ A thi nga fi, ndi ḓo tshila, nda ḓivhadza zwe Muṋe washu a ita.

¹⁸ Naho Muṋe washu o nndaṱisa nda pfa vhuṱungu, ho ngo nnditsha ndi tshi fa.

Mukundi a tshi fhululedzwa

¹⁹ Mmvuleleni dzikhoro dza thembele hune ha dzhena vha fulufhedzeaho, ndi dzhene ndi rende Muṋe washu!

²⁰ Hei ndi khoro ya Muṋe washu; vha fulufhedzeaho vha dzhena ngayo.

²¹ Ndi ḓo u livhuha, wo mphindula, wa ita uri ndi kunde.

²² Tombo ḽe ḽa laṱwa nga vhafhaṱi ḽa pfi a ḽi na mushumo, ḽo vha ḽone thikho ya nnḓu.

²³ Hezwo zwo itwa nga Muṋe washu, vhonani uri zwi kanukisa hani!

²⁴ Heḽi ndi ḓuvha ḽo vhewaho nga Muṋe washu; nga ri ḽi takalele, ri ḽi pembelele!

²⁵ Muṋe washu, wa ri tshidzaa! Muṋe washu, ita uri zwi ri nakele!

²⁶ U na mashudu ane a ḓa nga dzina ḽa Muṋe washu! Ri ni shudufhadza rí nḓuni ya Muṋe washu.

²⁷ Muṋe washu ndi Mudzimu, u ri vhonetshela nga tshedza tshawe. Irwani muduba nó fara matavhi, ni vhuye ni swike ṋangani dza aḽiṱari!

Thendo

²⁸ U Mudzimu wanga, ndi ḓo u livhuha; Mudzimu wanga, ndi ḓo ḓivhadza vhuhulu hau.

²⁹ Livhuhani Muṋe washu, u na vhuthu, lufuno lwawe a lu fheli.