DZIPHISALEMA 116 - BIVHILI KHETHWA Mafhungo Madifha

Thendo ya muthu we Mudzimu a mu lamukisa e tsini na lufu Khombo yo fhiraho

¹ Muṋe washu ndi a mu funa, u pfa mukosi wanga.

² O nthetshelesa, ndi ḓo ḓi mu vhidzelela ndi tshi kha ḓi tshila.

³ Ndo vha ndo tandwa nga thambo dza lufu, ndó no ingamela tshalo, ndó no farwa nga nyofho, na khombo na u ḽa mbilu,

⁴ nda ḓi vhidzelela dzina ḽa Muṋe washu, nda ri, “Muṋe washu, ntshidze!”

Khathutshelo

⁵ Muṋe washu u na tshilidzi, u a fulufhedzea, Mudzimu washu u na khathutshelo.

⁶ Muṋe washu u tsireledza vha si na nungo; nde ndo rambaladzwa a ḓi ntshidza.

⁷ Kha ndi dovhe ndi rudze mbilu, hufha Muṋe washu o nnyitela vhuthu.

⁸ Iwe Muṋe washu, wo nṋula lufuni, wa mphumula miṱodzi, wa ntika nda si tsha khukhulwa;

⁹ ndi ḓo tshila ndi tshi vhonwa nga Muṋe washu, ndí shangoni ḽa vhapenyu.

¹⁰ Nangwe ndi tshi ri, “Ndo kuyekanywa tshoṱhe!” a tho ngo litsha u fulufhela.

¹¹ Zwiḽa ndi nyofhoni ndo ri, “Vhathu vhoṱhe ndi vhadzia-u-zwifha!”

U livhuha nga mbilu yoṱhe

¹² Zwivhuya zwoṱhe zwe Muṋe washu a nnyitela ndi nga mu lifhela ngani?

¹³ Ndi ḓo livhuha zwe Muṋe washu a ntshidza nga u mu ṋekedza nduvho ya tshinwelo tsha waini, nda rabela dzina ḽawe;

¹⁴ ndi ḓo khunyeledza zwe nda anela Muṋe washu vhathu vhawe vhoṱhe vha tshi zwi vhona.

¹⁵ Muṋe washu u vhona lufu lwa vhalanda vhawe vha fulufhedzeaho zwi si zwithu zwiṱuku.

¹⁶ Muṋe washu, ngoho ndi mulanda wau, ndi mushumeli wau, ndo bebwa nga mushumeli wau wa musadzi; wo vhofholola geḓane dze dza vha dzo mmbofha.

¹⁷ Ndi ḓo u ṋekedza zwiṱhavhelo zwa ndivhuho, nda rabela dzina ḽa Muṋe washu.

¹⁸ Ndi ḓo khunyeledza zwe nda anela Muṋe washu vhathu vhawe vhoṱhe vha tshi zwi vhona,

¹⁹ miṱani ya nnḓu ya Muṋe washu, ngomu hau, iwe Jerusalema. Haleluya, nga hu rendwe Muṋe washu!