DZIPHISALEMA 115 - BIVHILI KHETHWA Mafhungo Madifha

Thendo ndi ya Mudzimu e eṱhe Muṋe washu o tewa nga thendo e eṱhe

¹ Hu songo rendwa riṋe, Muṋe washu, hu songo rendwa riṋe, nga hu rendwe dzina ḽau, hu tshi itelwa lufuno lwau lu sa dzinginyei na u fulufhedzea hau.

² U tendelani tshakha dzi tshi ri, “Mudzimu wavho u ngafhi?”

³ Hufha Mudzimu washu e ṱaḓulu, a tshi ita zwine a funa.

⁴ Yavho midzimu ndi ya siliva na musuku, yo itwa nga zwanḓa zwa vhathu.

⁵ I na milomo i sa ambi, na maṱo a sa vhoni;

⁶ i na nḓevhe dzi sa pfi, na ningo dzi sa femi;

⁷ zwanḓa zwayo a zwi koni u fara, milenzhe a i tshimbili, magulokulo ha bvisi ipfi.

⁸ Vhavhumbi vhayo vha ḓo fana nayo, na vhoṱhe vhane vha i fulufhela.

Muṋe washu tshiṱangu tshashu

⁹ Israele, fulufhela Muṋe washu, ndi Ene Mutiki wau na tshiṱangu tshau.

¹⁰ Nnḓu ya Aroni, fulufhelani Muṋe washu, ndi Ene Mutiki waṋu na tshiṱangu tshaṋu.

¹¹ Inwi ni ofhaho Muṋe washu, mu fulufheleni, ndi Ene Mutiki waṋu na tshiṱangu tshaṋu.

Muṋe washu Mushudufhadzi

¹² Muṋe washu ha ri hangwi, u ḓo ri shudufhadza; u ḓo shudufhadza nnḓu ya Israele, a shudufhadza nnḓu ya Aroni;

¹³ u ḓo shudufhadza vhane vha ofha Muṋe washu, vhoṱhe, vhahulwane na vhaṱuku.

¹⁴ Ngavhe Muṋe washu a tshi ita uri ni ande, inwi na vhana vhaṋu.

¹⁵ Ngavhe ni tshi shudufhadzwa nga Muṋe washu, Ene o sikaho ḽiṱaḓulu na ḽifhasi.

¹⁶ Ḽiṱaḓulu ndi ḽa Muṋe washu e eṱhe, ḽifhasi ḽone o ḽi ṋea vhathu.

¹⁷ Vhafu, na vho tselaho vhudzulavhafu, a vha tsha renda Muṋe washu.

¹⁸ Hone riṋe ri ḓo renda Muṋe washu zwino na lini na lini. Haleluya, nga hu rendwe Muṋe washu!