DZIPHISALEMA 111 - BIVHILI KHETHWA Mafhungo Madifha

Mishumo mihulu ya Mudzimu

¹ Haleluya, nga hu rendwe Muṋe washu! Ndi ḓo livhuha Muṋe washu nga mbilu yanga yoṱhe ndí tshivhidzoni, hó kuvhangana vha si na vhufhura.

² Mishumo ya Muṋe washu yo hula hani, i elekanyiwa nga vhane vha i takalela.

³ Mishumo yawe ndi ya vhurena na vhugala; u a fulufhedzea lini na lini.

⁴ O ita uri zwimangadzo zwe a shuma zwi si hangwiwe. Muṋe washu u na tshilidzi na khathutshelo.

⁵ Vhane vha mu ofha u vha ṋea zwiḽiwa; ha hangwi mulanga wawe na kathihi.

⁶ O sumbedza vhathu vhawe maanḓa awe nga mishumo yawe a tshi vha ṋea mashango a dziṅwe tshakha.

⁷ Ú shuma nga u fulufhedzea, ha iti zwa vhufhura, milayo yawe yoṱhe ndi ya ngoho.

⁸ A i tseki lini na lini; yo tewa ngohoni, a i khakhi.

⁹ O vhofholola vhathu vhawe, a vhofha navho mulanga wa lini na lini. Dzina ḽawe ndi ḽikhethwa, ḽi ofhisa hani!

¹⁰ U ofha Muṋe washu ndi tshone tshisima tsha vhuṱali; vha no tevhedza milayo yawe vha na ṱhalukanyo. Thendo yawe ndi ya lini na lini.