DZIPHISALEMA 109 - BIVHILI KHETHWA Mafhungo Madifha

Muteketeli zwi ḓo vhuya nṱha ha ṱhoho yawe Tshililo

Phisalema ya Dafita ye a sikela malogwane.

¹ Mudzimu, ndi ḓi u renda, u songa fhumula.

² Vhavhi vha vhufhura vha khou mpomoka, a vha nnyambi zwavhuḓi, vha a nnzwifhelela;

³ vha ntanga nga maipfi a vengo, vha lwa na nṋe ndi si na tshe nda tshinya.

⁴ Vha lifhedza vhukonani hanga nga vhuswina, nṋe ngeno ndi tshi vha rabelela;

⁵ vha lifhedza zwivhuya zwanga nga zwivhi, lufuno vha lu lifhedza nga vengo. Vha ri,

Maipfi a u teketela

⁶ “Mu livhanye na muhaṱuli muvhi, mupomoki a mu ise tsengoni!

⁷ A tshi sengiswa nga a vhonwe mulandu, na thabelo yawe nga i pfi ndi vhukhakhi.

⁸ Ngavhe maḓuvha awe a tshi vha mapfufhi, mushumo wawe wa dzhiwa nga muṅwe.

⁹ Vhana vhawe ngavhe vha tshi vha tsiwana, musadzi a vha tshilikadzi,

¹⁰ vhana vhawe vha tendeleka naḽo vha singila, vha thathwa matumbani hune vha dzula hone,

¹¹ ane a mu adzima thundu a mu kumbulula, vhatsinda vha thukhutha mitshelo ya biko ḽawe,

¹² hu si vhe na ane a mu itela vhuthu, kana a khathutshela tsiwana dzawe.

¹³ Ngavhe vhana vhawe vha tshi fa vha fhela, dzina ḽavho ḽa si tsha vhidzwa kha mirafho i ḓaho.

¹⁴ Ngavhe Muṋe washu a sa hangwi milandu ya vhokhotsi awe, na vhutshinyi ha mme awe ha si thuthwe,

¹⁵ Muṋe washu a si vhuye a zwi hangwa, a ite uri vha si tsha mu elelwa fhano shangoni.

¹⁶ Ho ngo vhuya a itela vhaṅwe vhuthu, tshawe ho vha hu u tovhola vhaheḓana na vhashai na vho kuleaho nungo vha vhuya vha fa.

¹⁷ O funesa u teketela vhaṅwe, khombo nga i mu wele-vho; ho ngo takalela vhaṅwe vha tshi wana mashudu, na ene a songo a wana.

¹⁸ O ambara maṱamba unga nguvho, eneo ngavhe a tshi nwelela malani awe, a nwelela maramboni awe unga mapfura;

¹⁹ ngavhe a tshi nga nguvho ye a ambara, a nga muzwa une a ḓivhofha misi yoṱhe.”

²⁰ Vha mpomokaho na vhane vha nnyisela phungo, ngavhe Muṋe washu a tshi vha lifhedza nga zwenezwo!

Thabelo

²¹ Hone Iwe Muṋe washu, Muṋe wa zwoṱhe, ntonde u tshi itela dzina ḽau. Hufha u na vhuthu, lufuno lwau lu sa dzinginyei, ntshidze!

²² Thi na wanga, ndi mushai, mbilu yanga i na matsivha.

²³ Ndi nyamalala unga murunzi nga madekwana, nda fhufhurwa unga nzie.

²⁴ Khokhola dzanga dzi a lepalepa nga u ḓidzima zwiḽiwa, ndo ita na u fhelela.

²⁵ Ndi tou vha tshikonelo tshavho; vha tshi mmbona vha dzungudza ṱhoho.

²⁶ Wa mpfarisaa, Mudzimu Muṋe washu! Ntshidze, hufha lufuno lwau lu sa dzinginyei.

²⁷ Vha sumbedze uri zwo itwa nga Iwe, ndi Iwe Muṋe washu wo zwi itaho.

²⁸ Vha litshe vha teketele, tenda Iwe u tshi ntshudufhadza. Vha tshi mmvutshela vha shonise, nṋe mulanda wau ndi takale.

²⁹ Ngavhe vhapomoki vhanga vha tshi nyadzea, vha dzula vho ambara ṱhoni unga tshiambaro.

Thendo

³⁰ Ndi ḓo livhuha Muṋe washu zwinzhi, nda mu renda ho kuvhanganiwa.

³¹ Ú tika mushai, a mu tshidza zwanḓani zwa vha mu haṱulelaho lufu.