DZIPHISALEMA 107 - BIVHILI KHETHWA Mafhungo Madifha

Bugu ya vhuṱanu (Phisalema 107 – 150) Muṋe washu Mulamuleli Thendo dza mathubwa o vhofhololwaho

¹ Livhuhani Muṋe washu, u na vhuthu, lufuno lwawe a lu dzinginyei lini na lini.

² Vho tshidzwaho nga Muṋe washu nga vha ralo; o vha vhofholola zwanḓani zwa maswina,

³ a vha vhuisa hayani vha tshi bva mashangoni asili, vhubvaḓuvha na vhukovhela, devhula na tshipembe.

Vhatendeleki phangani

⁴ Vhaṅwe vho tendeleka phangani na masogani, vha sa wani nḓila ya u ya muḓini hu no dzula vhathu,

⁵ vha farwa nga nḓala na ḓora, vha ṋoka.

⁶ Vho vhidzelela Muṋe washu vhe khomboni, a vha tshidza kha zwi konḓaho,

⁷ a vha endedza nḓilani yo touho tswititi, a vha swikisa muḓini hu no dzula vhathu.

⁸ Nga vha livhuhe lufuno lwa Muṋe washu lu sa dzinginyei, na mishumo yawe i mangadzaho ye a itela vhathu.

⁹ O vha dzimula ḓora, vha na nḓala a vha fusha nga zwithu zwavhuḓi.

Zwivhotshwa zwi tshi vhofhololwa

¹⁰ Vhaṅwe vho dzula swiswini ho tou nzwii, zwivhotshwa zwi tshi teta zwo vhoxwa nga dzigeḓane,

¹¹ nge vha lwa na milayo ya Mudzimu, vha nyadza nyeletshedzo ya Waṱaḓuluṱaḓulu;

¹² a mbo lemedza mbilu dzavho nga u vha konḓisela vhutshilo, vha wa ha si vhe na a vha vusaho;

¹³ vha vhidzelela Muṋe washu vhe khomboni, a vha tshidza kha zwi konḓaho,

¹⁴ a vha bvisa swiswini ho tou nzwii, a khathula dzigeḓane dzo vha vhofhaho.

¹⁵ Nga vha livhuhe lufuno lwa Muṋe washu lu sa dzinginyei na mishumo yawe i mangadzaho ye a itela vhathu.

¹⁶ O pwashekanya mahothi a musinaseṱha, a vunḓekanya mabaphathi a tsimbi e a vha o vha pata.

Vhalwadze vha tshi vuswa thovhoni

¹⁷ Vhaṅwe vho tsilufhala vha shandukela Mudzimu, a vha tambudzela milandu yavho,

¹⁸ vha nengwa zwiḽiwa zwoṱhe vha ṱoḓou fa;

¹⁹ vha vhidzelela Muṋe washu vhe khomboni, a vha tshidza kha zwi konḓaho;

²⁰ a vha fhodza nga ipfi ḽawe, a vha tshidza lufuni.

²¹ Nga vha livhuhe lufuno lwa Muṋe washu lu sa dzinginyei na mishumo yawe i mangadzaho ye a itela vhathu.

²² Nga vha mu livhuhe nga u mu ṋekedza zwiṱhavhelo, vha anḓadze mishumo yawe nga mifhululu.

U lamukiswa magabeloni a lwanzhe

²³ Vhaṅwe vha enda lwanzheni nga zwikepe, vhavhambadzi vha tshimbila maḓini mahulu.

²⁴ Ndi hone he vha vhona mishumo ya Muṋe washu, vha vhona zwimangadzo zwawe mativhani.

²⁵ O ri u amba ḓumbu ḽa vuwa, ḽa takusa magabelo a lwanzhe;

²⁶ zwikepe zwa rahiswa nṱha zwa swika makoleni, zwa dovha zwa tsela fhasi tivhani, vha kulea nungo nga nyofho.

²⁷ Zwa goba-goba zwa pepeleka unga vhathu vho kambiwaho, maano avho oṱhe a dzima;

²⁸ vha vhidzelela Muṋe washu vhe khomboni, a vha ṋula kha zwi konḓaho.

²⁹ A dzikisa ḓumbu he dzokoto, magabelo a lwanzhe e tshete,

³⁰ ha dzika, vha takala, a vha endedza vha swika hune vha ya.

³¹ Nga vha livhuhe lufuno lwa Muṋe washu lu sa dzinginyei, na mishumo yawe i mangadzaho ye a itela vhathu,

³² vha mu hulise vhathu vho kuvhangana, vha mu rende khoroni ya vhahulwane.

Mushandukisatsiko

³³ U shandukisa milambo ya vha phanga, zwisima zwa maḓi zwa xa,

³⁴ tsimu yo nonelaho ya bva nga mulandu wa vhavhi vho dzulaho henefho.

³⁵ U shandukisa phanga ya vha mihuvhi ya maḓi, mavuni o omaho ha phulea zwisima zwi elaho;

³⁶ henefho a vhea vha ṋokaho nga nḓala, vha fhaṱa muḓi vha dzula khawo,

³⁷ vha lima masimu, vha ṱavha minḓirivhe, vha wana khaṋo khulu;

³⁸ a vha shudufhadza vha ḓi anda vha tshi ya, na thakha yavho i si fhungudzee.

³⁹ Huno musi vha tshi fhungudzea, vha tshi vho shaya nungo nga u kandeledzwa na dzikhombo na maṱungu,

⁴⁰ a nyadzisa vhaḓivhalea, a vha balanganya vha sokou tendeleka sogani,

⁴¹ a takusa vhashai vha bva maṱunguni avho, miṱa yavho ya anda unga maṱambi.

⁴² Vha sí na vhufhura vha tshi zwi vhona vha a takala, vhavhi zwi tshi vha somela.

⁴³ Wa vhuṱali nga a zwi dzhiele nzhele, a vhone zwine Muṋe washu a ita nga lufuno lwawe lu sa dzinginyei.