DZIPHISALEMA 106 - BIVHILI KHETHWA Mafhungo Madifha

Mudzimu a tshi ḓi tonda lushaka lu sa livhuhi Lufuno lu sa dzinginyei

¹ Haleluya, nga hu rendwe Muṋe washu! Livhuhani Muṋe washu, u na vhuthu, lufuno lwawe a lu dzinginyei lini na lini.

² Ndi nnyi ane a nga kona u ḓivhadza mishumo ya Muṋe washu ya maanḓa, kana a mu renda lu sa vhilaedzi?

³ Vha na mashudu vha sa fhidzi u ita zwi re zwone, vha no dzula vha tshi fulufhedzea kha zwoṱhe zwine vha ita.

⁴ Muṋe washu, nnyelelwe musi u tshi tonda vhathu vhau, nkhumbule-vho musi u tshi vha tshidza,

⁵ uri ndi ḓiphiṋe-vho nga mashudu a vhanangiwa vhau, ndi takale na lushaka lwau, ndi u rende ndi na vhathu vhau vhe wa ḓinangela.

Vhaisraele vhathu vha sa fulufheli

⁶ Ro tshinya unga vhokhotsi ashu, ro ita zwo vhifhaho, ra ḓiovhela mulandu.

⁷ Zwiḽa vhokhotsi ashu vhe Egipita a vho ngo vhuya vha londa maḓembe e wa ita, vho hangwa vhuthu vhuhulu he wa vha itela, vho u shandukela vha tshi swika Lwanzheni lwa Dziṱhanga.

⁸ Hone Ene a vha tshidza a tshi itela dzina ḽawe, uri maanḓa awe mahulu a ḓivhiwe.

⁹ O kaidza Lwanzhe lwa Dziṱhanga lwa xa, a vha endedza dzivhani ha nga phangani ho omaho.

¹⁰ O vha lamulela zwanḓani zwa maswina, a vha tshidza kha vha no vha vhenga,

¹¹ maḓi a kumba maswina avho, ha si vhe na a salaho.

¹² Ndi hone vha tshi tenda zwe a vha fulufhedzisa, vha mu renda nga nyimbo.

Vhaisraele vha tshi gungula

¹³ A vho ngo lenga u hangwa zwe a ita, a vho ngo lindela nyeletshedzo yawe.

¹⁴ Ngei phangani vho lilela zwe vha zwi emula, vha linga Mudzimu sogani;

¹⁵ Ene a vha ṋea zwe vha zwi lilela, ha vha u ḓiovhela vhulwadze ha vha ṱahadza.

Vivho ḽa Vhaisraele

¹⁶ Ngei mishashani yavho vho vhivha Mushe na Aroni we a vha o kumedzwa Mudzimu,

¹⁷ ḽifhasi ḽa mbo aṱama ḽa mila Dathani, ḽa swiṱa tshigwada tsha Abiramu;

¹⁸ mulilo wa fhisa tshigwada tshavho tshoṱhe, vhavhi vhe lore nga khavhu.

Vhaisraele vha tshi luvha tshifanyiso

¹⁹ Thavhani ya Horebe vha vhumba mbohwana, vha gwadamela tshifanyiso tsho fulwaho,

²⁰ vha furalela Muṋe washu, Ene vhugala havho, vha luvha tshifanyiso tsha mboho, ine ya fula hatsi.

²¹ Vho hangwa Mudzimu we a vha tshidza, Ene we a vha itela zwihulu shangoni ḽa Egipita,

²² a vha itela maḓembe shangoni ḽa Hamu, na mishumo i ofhisaho Lwanzheni lwa Dziṱhanga.

²³ Ndi zwe a ri u ḓo vha lozwa; hone Mushe, muḓinḓa wawe we a mu nanga, a tou ima phanḓa hawe, uri a dzikise mbiti dzawe a si vha lozwe.

U shaya fulufhelo

²⁴ Zwenezwo vha nyadza shango ḽiḽa ḽavhuḓi, vha si tende zwe a vha fulufhedzisa,

²⁵ vha gungula vhe ngomu denndeni dzavho, vha si thetshelese Muṋe washu.

²⁶ Ndi zwe a ana o imisa tshanḓa, a ri u ḓo vha wisa phangani,

²⁷ vhaḓuhulu vhavho u ḓo vha wisa vhukati ha dzitshakha, a vha balanganya na mashango.

U gunea

²⁸ Vha vhuya vha ḓihwesa dzhogo ya Baali wa Phioro, vha ḽa zwiṱhavhelo zwo sumelwaho midzimu i sa tshili;

²⁹ vha ṱunga Muṋe washu nga zwiito zwavho zwivhi, a sinyuwa, vha welwa nga dwadze.

³⁰ Huno Finiasi a takutshedza a vha laṱisa, dwadze ḽa mbo fhufha;

³¹ ndi zwe a pfi u a fulufhedzea, nga mirafho na mirafho, lini na lini.

U ṱunga Mudzimu

³² Musi vhe zwisimani zwa Miriba vho ṱunga Muṋe washu, Mushe a welwa nga khombo nga mulandu wavho;

³³ nge vha shandukela Muya wa Mudzimu, Mushe a sokou amba a si tsha londa.

U vangana na vhannḓa

³⁴ A vho ngo tsha lozwa tshakha dza vhannḓa sa zwe Muṋe washu a vha laya,

³⁵ vha mbo ḓi vangana navho, vha edzisa maitele avho,

³⁶ vha luvha midzimu yavho ya zwifanyiso, ya vho vha tshikwekwe tshavho.

³⁷ Vha vhuya vha dzhia vhana vhavho vha vhatuka vha vha ita zwiṱhavhelo, vha vhasidzana vha vha ṱhavhela madimoni.

³⁸ Vha fhaladza malofha a vha si na mulandu, malofha a vhana vhavho, vhatukana na vhasidzana vha vha ita zwiṱhavhelo zwa midzimu ya Kanana, shango ḽa kumadzwa nga malofha.

³⁹ Vho ḓikumadza nga zwe vha ita, vha vho shandukela Muṋe washu.

Ṱhamu i na tshilidzi ngomu

⁴⁰ Ndi zwe Muṋe washu a sinyutshela vhathu vhawe, a sanda lushaka lwawe,

⁴¹ a vha kumedza tshakha dza vhannḓa, vha vhuswa nga maswina avho;

⁴² maswina a vha tambudza, a vha langa.

⁴³ Ndi kanzhi a tshi vha lamukisa, vhone vha ḓi mu shandukela, vha mbwandamela vhuvhini havho.

⁴⁴ Hone Ene a tshi vhona khombo dzo vha welaho, a tshi pfa tshililo tshavho,

⁴⁵ a elelwa mulanga wawe we a vhofha navho, a vha pfela vhuṱungu; u na lufuno luhulu, lu sa tseki;

⁴⁶ a ita uri vhoṱhe vho vha thubaho vha vha khathutshele.

Thabelo

⁴⁷ Yawee, Mudzimu Muṋe washu, ri tshidze! Ri bvise vhukati ha dzitshakha, u ri kuvhanganye, ri kone u renda dzina ḽau ḽikhethwa, ri tou ḓiphiṋa nga u u livhuha.

Thendo ya u ṱhaphudza bugu ya vhuṋa ya dziphisalema

⁴⁸ Nga hu rendwe Muṋe washu, Mudzimu wa Israele, u bva tsha kale na kale, na lini na lini! Vhathu vhoṱhe nga vha ri, “Amen!” Haleluya! Nga hu rendwe Muṋe washu!