DZIPHISALEMA 105 - BIVHILI KHETHWA Mafhungo Madifha

Mudzimu o khunyeledza zwe a fulufhedzisa Abrahamu U humbula maḓembe a Mudzimu

¹ Livhuhani Muṋe washu, mu rabeleni, ḓivhadzani dzitshakha mishumo yawe!

² Mu imbeleni, mu rendeni nga dziphisalema, aneani mishumo yawe i kanukisaho!

³ Zuwani dzina ḽawe ḽikhethwa; mbilu dza vhane vha mu ṱoḓa nga dzi takale.

⁴ Ṱoḓani Muṋe washu, u na maanḓa, lusani u dzula nae misi yoṱhe.

⁵ Elelwani maḓembe e a ita, na zwiga zwawe, na zwe a amba a tshi haṱula,

⁶ inwi vhaḓuhulu vha Abrahamu mulanda wawe, vhana vha Jakopo munangiwa wawe.

⁷ Ndi Ene Mudzimu Muṋe washu, muvhuso wawe u ṱanganya ḽifhasi.

Shango ḽo fulufhedziswaho

⁸ Ha hangwi mulanga wawe na kathihi, zwe a fulufhedzisa zwi dzula zwo ralo, ha vhuya ha fhira mirafho ya zwigidi.

⁹ Ndi mulanga we a vhofha na Abrahamu, a fulufhedzisa Isaka nga muano,

¹⁰ a zwi khwaṱhisa a zwi ita mulayo misi ya Jakopo, wa vha mulanga wa lini na lini we a vhofha na Israele,

¹¹ a tshi ri, “Inwi ndi ḓo ni ṋea shango ḽa Kanana, ḽa vha ifa ḽaṋu ḽe nda ni kovhela.”

Hu tshi tsireledzwa vhomakhulukuku

¹² Zwiḽa vha tshi kha ḓi vha vhathu vha si gathi, vhe vhaṱuku sa muroho, vhe vhatsinda shangoni ḽeneḽo,

¹³ vho tendeleka na dzitshakha, vha mona na mivhuso,

¹⁴ a si tende na muthihi a tshi vha kandeledza, a kaidza mahosi a tshi itela vhone,

¹⁵ a ri, “Ni songo kwama vhe nda vha shululela Muya wanga, ni songo huvhadza vhaporofita vhanga.”

Josefa a tshi zhaka nḓila

¹⁶ O wisa nḓala shangoni, vha gotsha ḓula.

¹⁷ O vha o no ḓi rangisa Josefa phanḓa, a rengiswa a vha phuli.

¹⁸ Vho mu vhofha milenzhe nga dzigeḓane, vha mu tshipa mukulo nga tsimbi,

¹⁹ ha vhuya ha itea zwe a porofita, ipfi ḽa Muṋe washu ḽa sumba uri o ima ngohoni.

²⁰ Khosi yo ri a vhofhololwe, a vhofhololwa nga muvhusi wa dzitshakha,

²¹ a mu ita mukoma wa nnḓu yawe, a langa thundu yawe yoṱhe,

²² vhakoma vhawe a vha langa nga hune a funa, a funza vhahulwane vhuṱali.

Vhaisraele vhe Egipita

²³ Zwenezwo na Vhaisraele vha pfulutshela Egipita, Jakopo a vha ṱhunḓu shangoni ḽa Hamu.

²⁴ Muṋe washu a andisa vhathu vhawe, vha anda u fhira maswina avho;

²⁵ a vhuya a shandula mbilu dzavho, vha vhenga vhathu vhawe, vha itela vhalanda vhawe vhukwila.

Mushe na madambudzo

²⁶ Ndi hone a tshi ruma Mushe muḓinḓa wawe, na Aroni we a mu nanga,

²⁷ vha sumbedza Vhaegipita zwiga nga maḓembe e a amba, vha ita zwimangadzo shangoni ḽa Hamu:

²⁸ A ḓisa swiswi, shango ḽa swifhala ḽe nzwii, vhone vha si vhuye vha tenda zwe a amba;

²⁹ a shandukisa maḓi a vha malofha, khovhe dzavho dza fa;

³⁰ shango ḽavho ḽa ḓala zwiḓula, dza dzhena na pfamoni dza musanda;

³¹ a amba, ha ḓa guma ḽa phuvhe, na vhunyunyu, ha ḓadza shango;

³² a vha nisela tshifhango, a ḓisa phenyo dza vhonetshela shango ḽoṱhe;

³³ a moḓisa minḓirivhe na mihuyu yavho, miri ya shango ḽavho a i vunḓekanya;

³⁴ a amba ha wa magerere, ha ḓa vhuukhula vhu si na mbalo,

³⁵ dza ḽa miri yoṱhe ya shango, dza fhedza khaṋo yavho;

³⁶ a fhedza nga u vhulaha matanzhe oṱhe shangoni ḽavho, yone mitshelo ya u ranga ya vhaṱhannga vhavho.

Mupfuluwo

³⁷ O vhofholola Vhaisraele, vha pfuluwa vho hwala siliva na musuku, hu si vhe na tsaleli na nthihi;

³⁸ Vhaegipita vha takalela u ṱuwa havho nge vha vha vha tshi vha ofhesa.

³⁹ Muṋe washu a vha tsireledza nga gole, vhusiku a vha vhonetshela nga mulilo.

⁴⁰ Vha mu humbela a vha ḓisela dzikhwali, a vha fusha nga vhuswa vhu bvaho ṱaḓulu;

⁴¹ a fhandula tombo, maḓi a gubunyea, ha ela mulambo phangani.

⁴² A elelwa mulanga wawe mukhethwa we a vhofha na Abrahamu mulanda wawe.

Shango ḽe vha fulufhedziswa

⁴³ O endedza vhathu vhawe nga dakalo, vhanangiwa vhawe vha enda vha tshi fhululedza.

⁴⁴ A vha ṋea mashango a dzitshakha, vha vha maḽaifa a zwe vhaṅwe vha zwi bvela biko.

⁴⁵ Hezwo o zwi itela uri vha nambatele ndaela dzawe, vha vhulunge milayo yawe. Haleluya, nga hu rendwe Muṋe washu!