DZIPHISALEMA 104 - BIVHILI KHETHWA Mafhungo Madifha

Mudzimu Muṋe wa tsiko Mudzimu mufukatshedza

Kha ndi rende Muṋe washu!

¹ Kha ndi rende Mudzimu wanga, u muhuluhulu! Wo ḓiputela nga vhurena na vhugala.

² Wo fuka tshedza unga nguvho; u akha lutombo unga dennde,

³ wa fhaṱa pfamo yau nṱha ha maḓi a makoleni, wa namela makole a nga ndi gariki yau, wa fhufha nga phapha dza muya.

⁴ Maḓumbu ndi vhone vhaḓinḓa vhau, khavhu dza mulilo ndi vhashumeli vhau.

Muvhei wa mikano ya maḓi

⁵ Wo fhaṱa shango nṱha ha muteo waḽo, ḽi nga si vhuye ḽa sudzuluswa.

⁶ Wo ḽi fukedza lwanzhe lwa nga nguvho, maḓi a tiba dzithavha.

⁷ Hone Iwe wo ri u kaidza, maḓi a shavha, a ri u pfa mubvumo wau a ṱuwa nga luvhilo;

⁸ a fhufha dzithavha nga nṱha, a tsela magovhani, fhethu he wa ri a ye hone.

⁹ Wo a vhetshela mukano, a nga si u pfuke; ha tsha ḓo dovha a tibedza ḽifhasi.

Maḓi a tondaho vhathu

¹⁰ U ita uri zwisima zwi gubunyee, zwi ele milongani vhukati ha dzithavha.

¹¹ Zwi ṋea phukha dza ḓaka maḓi, mbiḓi dza dzimula ḓora.

¹² Zwiṋoni zwi fhaṱa zwiṱaha tsini ha maḓi; zwi imba vhukati ha matavhi.

¹³ U shasha dzithavha u pfamoni yau ngei ṱaḓulu, ḽifhasi ḽa nwa la kama nga zwe wa ḽi ṋea.

Zwimela

¹⁴ U medzela kholomo hatsi, vhathu wa vha medzela zwimela vha lima, ḽifhasi ḽa bveledza zwiḽiwa:

¹⁵ waini i no takadza mbilu ya muthu, mapfura a no penyisa tshifhaṱuwo tshawe, na vhuswa vhu no tika mbilu ya muthu.

¹⁶ Miri ya Muṋe washu i sheledzwa ya pfelela, yone mikedara ya Libanoni ye a i ṱavha.

¹⁷ Zwiṋoni zwi fhaṱa zwiṱaha zwazwo henefho, gololwane ḽa dzula ṱhodzini dzayo.

¹⁸ Thavhani ndapfu hu dzula ngululu, mbila dzi dzumbama nngwani.

Vhusiku na masiari

¹⁹ Wo vhumba ṅwedzi, u kala ṅwaha ngawo; ḓuvha ḽi a ḓivha uri ḽi kovhela lini.

²⁰ U ḓisa swiswi ha vha vhusiku, phukha dzoṱhe dza ḓaka dza bvela nnḓa.

²¹ Ndau dzi a vhomba dzi tshi zwima; dzi ṱoḓa zwiḽiwa zwadzo kha Mudzimu.

²² Ḓuvha ḽi tshi bva dzi yo dzumbama, dza humela vhulaloni hadzo.

²³ Muthu u bva a yo shuma, a shuma u swika nga lufhimavhaeni.

Lwanzhe na zwi re khalwo

²⁴ Muṋe washu, mishumo yau yo anda hani! Yoṱhe wo i ita nga vhuṱali; ḽifhasi ḽo ḓala zwivhumbwa zwau.

²⁵ Lwanzhe ngolu, lwo hula hani, lwo aṱama hani! Lu na mutshatshame wa zwivhumbwa zwi si na mbalo, zwi tshilaho, zwihulwane na zwiṱuku.

²⁶ Henefho zwikepe zwi a tshimbila, zwi tshi ṱuwa, zwi tshi vhuya, na Liviathani ḽe wa ḽi vhumbela u ḓimvumvusa ngaḽo.

Mudzimu tshisima tsha vhutshilo

²⁷ Zwoṱhe hezwo zwo lavhelesa Iwe, uri u zwi ṋee zwiḽiwa zwazwo nga tshifhinga tsho teaho.

²⁸ U tshi zwi ṋea zwi a doba; u tshi zwi pakulela zwi fushea nga zwithu zwavhuḓi.

²⁹ Arali wa zwi furalela, zwi a ofha; u tshi zwi dzhiela mufemo, zwi a fa, zwa vhuelela mavuni.

³⁰ U tshi rumela Muya wau, u a zwi sika, ḽifhasi ḽa dovha ḽa vha ḽiswa.

Maanḓa a si na vhukono

³¹ Ngavhe vhugala ha Muṋe washu vhu tshi rendwa lini na lini; ngavhe Muṋe washu a tshi takadzwa nga mishumo yawe.

³² A tshi sedza ḽifhasi, ḽi a tetemela; a tshi kwama dzithavha, dzi duba vhutsi.

³³ Ndi ḓo imbela Muṋe washu vhutshilo hanga hoṱhe; ndi tshi kha ḓi tshila ndi ḓo renda Mudzimu wanga nga nyimbo.

³⁴ Ngavhe zwine nda elekanya zwi tshi takadza Muṋe washu, unga na nṋe a tshi ntakadza.

³⁵ Vhatshinyi vhone ngavhe vha tshi nyamalala, vhavhi vha si tsha vha hone fhano shangoni. Kha ndi rende Muṋe washu! Haleluya, nga hu rendwe Muṋe washu!