DZIPHISALEMA 103 - BIVHILI KHETHWA Mafhungo Madifha

Luimbo lwa u renda lufuno lwa Mudzimu lu sa tseki Thendo

Phisalema ya Dafita.

¹ Kha ndi rende Muṋe washu nga mbilu yanga yoṱhe, ndi khoḓe dzina ḽawe ḽikhethwa nga zwoṱhe zwine nda vha zwone.

² Kha ndi rende Muṋe washu nga mbilu yanga yoṱhe, ndi si hangwe zwivhuya zwoṱhe zwe a nnyitela.

³ U nkhangwela milandu yanga yoṱhe, a fhodza maṱungu anga oṱhe.

⁴ U ntshidza ndó ingamela tshalo; lufuno lwawe lu sa dzinginyei, na tshilidzi, ndi tshone tshiala tshanga.

⁵ U mpfusha nga zwivhuya, nda pfa ndo humela hanani, ndi na nungo dzi no nga dza goni ḽi tshi fhufha.

Khotsi wa vhuthu wa vhana vha sa ḓivhalei

⁶ Muṋe washu u lwela vhoṱhe vha kandeledzwaho, vha tshi hwelelwa a vha sengela.

⁷ O ḓivhadza Mushe zwe a vha o dzudzanya, a sumbedza Vhaisraele mishumo yawe.

⁸ Muṋe washu u na khathutshelo na tshilidzi, ha fheli mbilu, lufuno lwawe ndi luhulu, a lu dzinginyei;

⁹ ha dzuli a tshi sengisa vhathu, ha sinyuwi tshoṱhe;

¹⁰ ri tshi khakha ha ri rwi nga ṱhamu yo eḓanaho vhutshinyi hashu, ha vhili milandu yashu.

¹¹ Vhane vha mu ofha u vha funa nga lufuno luhulu, lwo hula unga lutombo lu nṱha-nṱha ha shango.

¹² Vhutshinyi hashu u vhu sudzulusela kule na riṋe, zwa nga vhubvaḓuvha vhu kule na vhukovhela.

¹³ Muṋe washu u khathutshela vhane vha mu ofha, unga khotsi a tshi khathutshela vhana.

¹⁴ U ḓivha tsiko yashu, ha hangwi uri ri buse.

Muthu u a lovha, ngeno lufuno lwa Mudzimu lu sa tseki

¹⁵ A vha muthu, vhutshilo hawe vhu nga hatsi; u aluwa unga dzuvha tsimuni,

¹⁶ muya wa ḽi vhudzula ḽi a fa, he ḽa vha ḽi hone ha hangwiwa.

¹⁷ Vhane vha ofha Muṋe washu u vha funa nga lufuno lu sa dzinginyei lini na lini, a lwela na vhana vha vhana vhavho;

¹⁸ ndi vhane vha si pfuke mulanga wawe, vha ita zwine milayo yawe ya vha laya.

Thendo dza tsiko yoṱhe

¹⁹ Muṋe washu o imisa khuluṋoni yawe ḽiṱaḓulu, muvhuso wawe u vhusa vhoṱhe.

²⁰ Rendani Muṋe washu, inwi vharuṅwa vhawe, inwi vhahali vha maanḓa ni itaho zwine a amba, inwi ni mu thetshelesaho!

²¹ Rendani Muṋe washu, inwi mara awe oṱhe a ḽiṱaḓulu, inwi vhaḓinḓa vhawe vha itaho zwine a funa!

²² Rendani Muṋe washu, inwi zwisikwa zwawe zwoṱhe, hoṱhe-hoṱhe hune a vhusa. Na nṋe kha ndi rende Muṋe washu nga mbilu yanga yoṱhe!