DZIPHISALEMA 102 - BIVHILI KHETHWA Mafhungo Madifha

Thabelo ya mutovholwa a lwalaho a tshi elelwa u fulufhedzea ha Mudzimu Tshililo

Thabelo ya muheḓana o kuleaho nungo a tshi shululela Muṋe washu tshililo tsha mbiluni yawe.

¹ Muṋe washu, ipfa thabelo yanga; ngavhe mukosi wanga u tshi swika ha Iwe!

² U songo mpfuralela musi wa khombo; nḓevhe yau nga i nthetshelese ndi tshi vhidzelela, ṱavhanya u mphindula.

³ Maḓuvha anga a nyamalala unga vhutsi; muvhili wanga u tou duga,

⁴ mbilu yanga yo oma, yo puta unga hatsi; ndi ita na u hangwa u ḽa.

⁵ Ndo tou sala ndi lwatsi, nga u ṱavha mukosi ndi tshi gomela.

⁶ Ndi nga tshikwitha phangani, gwitha matumbani,

⁷ a thi fari khofhe; ndi nga tshiṋoni tsho salaho tshi tshoṱhe tshiuludzani tsha nnḓu.

⁸ Maswina anga a nkolela ḓuvha ḽoṱhe; vha teketelana nga dzina ḽanga.

⁹ Zwiḽiwa zwanga ndi milora; tshine nda nwa ndi tshi vanga na miṱodzi,

¹⁰ nga ṅwambo wa mbiti dzau dzi ofhisaho. Wo nndoba wa mposa kule.

¹¹ Vhutshilo hanga vhu nga mirunzi ya nga madekwana i sa lengi u milwa nga vhusiku; ndi puta unga hatsi.

Tshifhinga tsha u khathutshelwa ha Tsioni

¹² Hone Iwe Muṋe washu wo dzula kha khuluṋoni lini na lini, mirafho na mirafho a i u hangwi.

¹³ U ḓo takuwa wa khathutshela Tsioni; ndi tshone tshifhinga tshine wa ḓo u pfela vhuṱungu; tshifhinga tsho tiwaho tsho swika.

¹⁴ Riṋe vhalanda vhau ri kha ḓi funa matombo awo, ri tshi vhona matumba awo ri a ṱungufhala.

¹⁵ Tshakha dzi ḓo ofha dzina ḽau, Muṋe washu, mahosi oṱhe a ḽifhasi a ḓo tata vhugala hau,

¹⁶ nga u vhona Muṋe washu o vusa Tsioni, e bvelele e kha lupenyo lwawe.

¹⁷ Ha nga nyadzi khumbelo dza vho ṱangulwaho, u ḓo pfa thabelo dzavho.

¹⁸ Hezwo nga zwi ṅwalelwe murafho u kha ḓi ḓaho, uri lushaka luswa lwa Muṋe washu lu mu rende lu ri,

¹⁹ “Muṋe washu o sedza fhasi e hukhethwa ngei nṱha, a vhona ḽifhasi e ṱaḓulu,

²⁰ a pfa zwigomelo zwa mathubwa, a vhofholola vho haṱulelwaho lufu.”

²¹ Ndi zwine dzina ḽa Muṋe washu ḽa ḓo ḓivhadzwa Tsioni, a rendwa Jerusalema,

²² musi dzitshakha na mivhuso vha tshi kuvhanganela u luvha Muṋe washu.

Zwoṱhe zwi a lovha, Mudzimu a ḓi sala

²³ O mmvunḓa nungo ndi tshi kha ḓi vha nga hanga, a fhungudza maḓuvha anga.

²⁴ Ndi zwine ndi tshi amba nae nda ri, “Yawee, Mudzimu wanga, u songo nṱuwisa ndi sa athu kalaha; hufha Iwe u tshi tshila lini na lini.

²⁵ “Ḽifhasi wo ḽi tea kale-kale; ḽiṱaḓulu ndi mushumo wa zwanḓa zwau.

²⁶ Zwone zwi ḓo lovha, Iwe wa ḓi sala; zwoṱhe zwi ḓo ṱahala unga nguvho, wa bvula wa laṱa;

²⁷ hone Iwe u ḓi dzula wo ralo, miṅwaha yau a i gumi.

²⁸ Vhana vhashu vha ḓo tshila nga mulalo, na vhaḓuhulu vhavho vha ḓo tsireledzwa nga Iwe.”