DZIPHISALEMA 101 - BIVHILI KHETHWA Mafhungo Madifha

Khosi i fulufhedzeaho i no ṱoḓa vhalanda vha fulufhedzeaho Khosi i fulufhedzeaho

Phisalema ya Dafita.

¹ Tsha ndi imbe lwa vhuthu hau na khaṱhulo mbuya; tsha ndi u imbele, Muṋe washu!

² Ndi ḓo ḓilonda nda tshila vhutshilo vhu sa solisei. Yowee, u ḓo nndalela lini? Ndi ḓo tshilisana na vha muṱa wanga ndí na luvalo lwo ṱambaho.

³ Ndi nga si vhuye nda konḓelela zwo vhifhaho; zwiito zwa vhane vha gunea zwi nga si nnambatele.

⁴ Ndi ḓo ḓiilisa vhuvhi nda furalela vhadziavhufhura.

Vhalanda vha fulufhedzeaho

⁵ Mudziatshisolo ndi ḓo mu vala mulomo, a si tsha dovha; wa u ḓihudza na u ḓiḓivha a thi nga mu konḓeleli.

⁶ Ndi ḓo konana na vhane vha fulufhedzea, nda dzula navho; a sa solisei u ḓo vha mulanda wanga.

⁷ Ane a fhura ha nga dzuli muṱani wanga, ane a shanda mafhungo a nga si dzule hune nda mu vhona.

⁸ Misi yoṱhe ḽi tshi tsha ndi ḓo tupula vhavhi vhoṱhe shangoni; ndi sudzulusa vhavhi vhoṱhe muḓini wa Muṋe washu.