DZIPHISALEMA 10 - BIVHILI KHETHWA Mafhungo Madifha

Thabelo ya a kandeledzwaho Mazuwo a mukandeledzi

¹ Muṋe washu, khezwi wo tou ima ngeo kule? U itelani u tshi ḓidzumba musi zwo vhifha?

² Vhavhi vha a ḓihudza vha kandeledza vhaheḓana. Khunḓa nga i fashe muvei.

³ Muvhi u zuwa nyemulo dza mbilu yawe, wa u ḽeledza vhaṅwe u sanda Muṋe washu a mu nyadza.

⁴ Muvhi u dzula o imisa mutsinga. U ri, “Mudzimu ha nga nndifhedzi.” U luka maano awe oṱhe a sa humbuli Mudzimu.

⁵ Mishumo yawe i ḓo ḓi ya phanḓa; khaṱhulo dzau dzi fhira ṱhalukanyo yawe; maswina awe oṱhe u vha pfela mare.

⁶ Mbiluni yawe u ri, “A hu na tshi ḓaho; mirafho i ḓo ṱanḓulukana ndi sa welwi nga khombo.”

⁷ Haṋwani hawe hu bva a u teketela na vhufhura na u tsikeledza vhaṅwe; lulimi lwawe lwo mara ndozwo na vhuvhi.

⁸ U dzula o lalela khuḓani dza miḓi, a zwizwiedza a si na mulandu, vhaheḓana u dzula a tshi vha zwikula nga maṱo.

⁹ U dzula o lalela sa ndau yo dzumbama, u lalela muheḓana a tshi ri a mu fashe, a ritha tshifu ha vha u mu fasha,

¹⁰ muheḓana a mbo ḓi fhasi huru o huvhala, ha vha hone u wa hawe a nga o vetekanywa nga ṋala.

¹¹ Mbiluni yawe muvhi u ri, “Mudzimu o zwi hangwa; ha nga vhuyi a zwi vhona, o tsinya iṱo.”

Tshililo tsha mukandeledzwa

¹² Mudzimu Muṋe washu, angaladza tshanḓa tshau: u songo laṱedza muheḓana.

¹³ Nṋa muvhi u itwa ngani a tshi nyadza Mudzimu? Mbiluni yawe u ri a u nga mu lifhedzi.

¹⁴ Matsina Iwe wo zwi vhona, a u kundwi u vhona vhuleme na u tambula. Zwi iteaho u zwi dzhiela nzhele. Muheḓana u ḓikumedza Iwe, zwisiwana zwi lilela kha Iwe.

¹⁵ Vunḓekanya tshanḓa tsha muvhi wa vhunwa, vhuvhi hawe u vhu sale murahu u gume nga mudzi waho.

¹⁶ Muṋe washu ndi khosi u ya ho ya, tshakha dza vhannḓa o dzi swiela shangoni ḽawe.

¹⁷ Muṋe washu, Iwe wo pfa zwine muheḓana a zwi lila. U ḓo khwaṱhisa mbilu yawe, u dzula wo thetshelesa,

¹⁸ uri u lamulele zwisiwana na vho kandeledzwaho, muthu wa ṋama wa fhano shangoni a si tsha ḓo ofhisa vhaṅwe.