DOTORONOMIO 8 - BIVHILI KHETHWA Mafhungo Madifha

Maitele a Muṋe washu a tshi tshimbidza vhathu vhawe

¹ “Vhulungani milayo yoṱhe ine nda ni laya ṋamusi, ni i tevhedze, ndi hone ni tshi ḓo tshila, na anda, na dzhena shangoni ḽe Muṋe washu a fulufhedzisa vhomakhulukuku waṋu, na ḽi dzhia ḽa vha ḽaṋu.

² Ni elelwe lwendo lwoṱhe lwe Muṋe washu Mudzimu waṋu a ni tshimbidza phangani miṅwaha hei ya 40 yo fhelaho. O itela u ni ṱukufhadza na u ni linga uri zwi re mbiluni dzaṋu zwi ḓivhee, arali ni tshi ḓo vhulunga milayo yawe kana ni tshi ḓo i nyadza.

³ O ni ṱukufhadza a ni farisa nḓala a ni fusha nga mana, zwiḽiwa zwe na vha ni sa zwi ḓivhi, na vhomakhulukuku waṋu vho vha vha sa zwi ḓivhi. O itela u ni funza uri muthu ha tshili nga vhuswa fhedzi, u tshila nga zwenezwo zwine Muṋe washu a mu ṋea nga ipfi ḽawe.

⁴ “Miṅwaha hei yoṱhe ya 40 zwiambaro zwaṋu a zwo ngo ṱahala, milenzhe a yo ngo zwimba.

⁵ Ḓivhani-ha fhungo iḽi: Muṋe washu Mudzimu waṋu u laya inwi unga munna a tshi laya ṅwana wawe.

⁶ Zwenezwo vhulungani milayo ya Muṋe washu Mudzimu waṋu, ni si bve nḓilani dzawe, ni mu hulise.

Shango ḽe Muṋe washu a ṋea Vhaisraele

⁷ “Muṋe washu Mudzimu waṋu u khou ni isa shangoni ḽavhuḓi, shango ḽa milambo na zwisima zwine zwa tou ela zwi sa xi zwi no simuwa magovhani na dzithavhani,

⁸ shango ḽa goroi na baḽi, ḽa minḓirivhe na mihuyu na migranada, ḽa mapfura a muolivi, na ḽa ṋotshi.

⁹ A hu na ane a ḓo ḽa a si fure; a ni nga shayi tshithu; matomboni aḽo ni ḓo wana ngweḓi nnzhi, thavhani dzaḽo na bwa musina.

¹⁰ Ni ḓo ḽa na fura, na renda Muṋe washu Mudzimu waṋu nga u vhona shango ḽavhuḓi ḽe a ni ṋea ḽone.

¹¹ “Hone ni zwi sedze uri ni si hangwe Muṋe washu Mudzimu waṋu na si tsha tevhedza milayo yawe na ndaela dzawe na ndayo yoṱhe ine nda khou ni laya ṋamusi!

¹² Ni songo ri no ḽa na fura na fhaṱa nnḓu dzavhuḓi na dzula khadzo,

¹³ kholomo dzaṋu na nngu dza anda, na vha na siliva na musuku munzhi, na thundu dzi sa konadzei,

¹⁴ na vho ḓihudza na hangwa Muṋe washu Mudzimu waṋu, na hangwa uri ndi Ene we a ni vhofholola vhupulini a ni pfulusa Egipita,

¹⁵ a ni endedza phangani khulu i ofhisaho ho andaho ṋowa dza vhuṱungu na phame, a ni ṋea maḓi a tshi bva kha tombo ḽo omaho ḽa tou te, shangoni ḽa gomelelo ḽi si na maḓi.

¹⁶ Hafhu ndi Ene we a ni fusha nga mana musi ni phangani, na ḽa zwiḽiwa zwe vhomakhulukuku waṋu vha vha vha sa zwi ḓivhi. O itela u ni ṱukufhadza na u ni linga uri zwi sale zwi tshi ni nakela.

¹⁷ Zwenezwo ni songo ri no tondwa zwingafhongafho na vho amba mbiluni na ri, ‘Lupfumo holu lwoṱhe ndo ḓiwanela nga maanḓa anga na nga u kona hanga.’

¹⁸ Elelwani Muṋe washu Mudzimu waṋu; ndi Ene ane a ni ṋea maanḓa a u kona u wana lupfumo holwo, u vhulunga mulanga wawe we a u fulufhedzisa vhomakhulukuku waṋu, unga ni tshi khou zwi vhona ṋamusi.

¹⁹ “Hone arali na vhuya na hangwa Muṋe washu Mudzimu waṋu, na gidima murahu ha midzimu isili na i shumela na i luvha, vhukuma ndi khou ni eletshedza ṋamusi ndi ri, ni ḓo lovha!

²⁰ Arali na sa thetshelesa ipfi ḽa Muṋe washu Mudzimu waṋu, na inwi ni ḓo lovha unga tshakha idzo dzine Muṋe washu a khou dzi lozwa ni tshi swika.