DOTORONOMIO 33 - BIVHILI KHETHWA Mafhungo Madifha

Mushe a tshi porofita nga matsinde a Israele

¹ Mushe muḓinḓa wa Mudzimu a sa athu fa o shudufhadza Vhaisraele,

² a ri, “Muṋe washu u khou ḓa a tshi bva Sinai, u vhonetshela lushaka lwawe e Seiri, u sumbedza lupenyo lwawe e thavhani ya Pharani, u ḓa a tshi bva hu no dzula zwigidi na zwigidi zwa vharuṅwa vhó ima thungo ya tshanḓa tshawe tshauḽa.

³ Vhukuma matsinde a Israele u a vha funa, u tsireledza vhoṱhe vha re vhawe. Vhone vho ḓiposa milenzheni yawe vha tshi thetshelesa maipfi awe.

⁴ Mushe o ri ṋea mulayo, ndi ḽone ifa ḽi takadzaho ḽa vhaḓuhulu vha Jakopo.

⁵ Muṋe washu o vha khosi ya Jeshuruni musi hu tshi kuvhangana vhahulwane vha lushaka, hu tshi ḓa matsinde oṱhe a Israele.

⁶ “Rubeni a songo lovha, nga a tshile, vhanna vhawe vha vhe vhanzhi.”

⁷ A tshi amba Juda o ri, “Muṋe washu, ipfa zwine Juda a humbela, u mu vhuedzedze ha vharathu vhawe! Nga a vha lwele nga zwanḓa zwawe. Ivha nae musi e khomboni.”

⁸ A tshi amba Livi o ri, “Madeṅwa au makhethwa wo a kumedza ene, munna a fulufhedzeaho. Wo mu linga kusini kwa Milingo, wa mu sengisa maḓini a Tsengo.

⁹ O ri a tshi amba khotsi awe na mme awe a ri, ‘Thi vha vhoni!’ vharathu vhawe a ri, ‘Thi vha ḓivhi!’ na vhana vhe a vha beba a ri, ‘Thi vha ṱalukanyi!’ Vhalivi vho vhulunga zwe wa amba vha si pfuke mulanga wau.

¹⁰ Vha ḓo funza Jakopo ndaela dzau, mulayo wau vha u gudisa Israele. Vha ḓo vhea zwioro phanḓa hau, vha ṋekedza nduvho dza u fhiswa kha aḽiṱari yau.

¹¹ Shudufhadza mushumo wawe Muṋe washu, u takalele zwine a ita. Maswina awe u a kule nungo, u rwe vha mu vhengaho vha si tsha vuwa.”

¹² A tshi amba Benyamini o ri, “Mufunwa wa Muṋe washu u ḓo dzula a sa ofhi tshithu; u ḓikhudisa ngae misi yoṱhe; Muṋe washu u dzula o mu beba.”

¹³ A tshi amba Josefa o ri, “Muṋe washu u ḓo shudufhadza shango ḽau, wa welwa nga ṅwando u no bva nṱha, nga fhasi zwisima zwa si xe,

¹⁴ wa tondwa nga ḓuvha, wa fundwa ṅwedzi muṅwe na muṅwe,

¹⁵ wa wana mashudushudu a thavha dza kale-kale, na a zwikwara zwa misi ya kale,

¹⁶ na a shango na zwi re khaḽo; nga a takalelwe nga a dzulaho tshiṱakani tshi dugaho! Muṋe washu a sumbedze Josefa lufuno lwawe, ene munangiwa kha vhakomana vhawe.

¹⁷ U ḓo ḓiphiṋa nga maanḓa a mbohwana, ṋanga dzawe dza nga dza ṋari. Luṅwe luṋanga ndi zwigidi zwa Manase, luṅwe ndi zwigidi na zwigidi zwa Efraimi. U ḓo pandamedza tshakha ngadzo dza tou fhelela vhusendekamisi.”

¹⁸ A tshi amba Zebuloni o ri, “Ngavhe Zebuloni zwi tshi mu nakela musi e lwanzheni nga mabindu; iwe Isakhara u takale u hayani!

¹⁹ Vha ḓo vhidzela vhathu thavhani, henefho vha ṱhavha zwifuwo zwa nduvho dzo fanelaho. Vha ḓo ḽa lupfumo lwa lwanzhe na madzanga o fukedzwaho nga muṱavha.”

²⁰ A tshi amba Gadi o ri, “Muṋe washu o ṋea Gadi shango ḽo aṱamaho, nga ri mu rende ngazwo! U lalela vhathu unga ndau, a vha ṱhukhula zwanḓa na ṱhoho.

²¹ O ḓikhethela shango ḽa khwiṋe, a ḓivhetshela mukovhe wa murangaphanḓa. Vhahulwane vha matsinde vha tshi kuvhangana, ene a khunyeledza zwine Muṋe washu a funa, a bveledza khaṱhulo dza Muṋe washu kha Israele.”

²² A tshi amba Dani o ri, “Dani ndi ndau ya maanḓa, i tshi vhona ṋowa i thamutshela thungo.”

²³ A tshi amba Nafuthali a ri, “Muṋe washu o shudufhadza Nafuthali, o mu tonda a tou mu fusha u bva lwanzheni shango ḽawe ḽi livha tshipembe.”

²⁴ A tshi amba Ashere a ri, “Ashere o shudufhadzwa u fhira na vhakomana vhawe; nga vha mu takalele vhoṱhe, a pfume a tou ṱamba milenzhe nga mapfura.

²⁵ Tswinga dza mafhoro awe ndi tsimbi na musinaseṱha, a hu na musi une a si vhe na nungo.

²⁶ “A hu na a no vhambedzwa na Mudzimu wa Jeshuruni! U ḓa u u lamulela o namela makole, u tala lutombo nga vhugala hawe.

²⁷ “Dzhavhelo ḽau ndi Ene Mudzimu wa lini na lini, o u takula nga zwanḓa zwawe misi yoṱhe, a pandamedza maswina au phanḓa hau a ri, ‘Vha lozwe!’

²⁸ Ndi zwine Vhaisraele vha dzula vhugalani, vhaḓuhulu vha Jakopo vha dzula thungo ha dzitshakha shangoni ḽa goroi na waini, hune lutombo lwa wa ṅwando.

²⁹ Mashudu au ndi mangafhani Israele! A no nga iwe ndi nnyi? U lushaka lwo tshidzwaho nga Muṋe washu. Ndi Ene tshiṱangu tshau tshi u pilelaho, ndi Ene pfumo ḽau ḽine wa kunda ngaḽo. Maswina au a ḓo tou swenda phanḓa hau, iwe wa kanda miṱumbani ya zwikwara zwavho.”