DOTORONOMIO 32 - BIVHILI KHETHWA Mafhungo Madifha

¹ “Hee, ḽiṱaḓulu, ivha ṱhanzi! Ipfa maipfi anga iwe shango!

² Ndayo yanga nga i nge mvula i no ṋukadza mavu; maipfi anga nga a we sa ṅwando hatsini, a nge mibvumbi i no tshidza miri, a nge mvula ya tseula i no ṋukadza mutomba.

³ Ndi ḓo renda dzina ḽa Muṋe washu, nda ḓivhadza vhuhulu ha Mudzimu washu.

⁴ Ndi Ene bako ḽashu ḽa u shavhela khaḽo. Mishumo yawe a i solisei, zwoṱhe zwine a ita ndi zwone. Ndi Mudzimu a fulufhedzeaho, ha khakhi, u ita zwi re zwone na zwivhuya fhedzi.

⁵ “Hone Vhaisraele vho mu shandukela, shonee, a vha tshee vhana vhawe! Ndi mashandukwa a vhukwila.

⁶ Ndi zwone zwine na livhuha Muṋe washu ngazwo, inwi matsilu ni si na mihumbulo? A si Ene Khotsi aṋu kani? A si Ene Muvhumbi waṋu naa? A si Ene we a ni ita a ni ṋea vhutshilo?

⁷ Edzonu elelwa maḓuvha a kale-kale, ni humbule misi ya vhomakhulukuku, vhudzisani vhokhotsi aṋu vha ni vhudze, ni vhudzise vha kale, vhone vha ḓo ni ṱalutshedza.

⁸ Waṱaḓuluṱaḓulu a tshi kovhekanya dzitshakha mashango adzo, zwiḽa a tshi khethekanya vhathu, o vhekanya masakha a dzitshakha a tshi sedza tshivhalo tsha Vhaisraele.

⁹ Ndi vhone mukovhe wa Muṋe washu, ndi vhone lushaka lwawe, Jakopo ndi lushaka lwawe vhukuma.

¹⁰ O vha wana phangani, sogani hu no lila dziphukha fhedzi, a vha kuvhatedza a vha tonda, a vha tsireledza unga tshanga ya iṱo.

^11-12 Muṋe washu o hwala vhathu vhawe unga goni ḽi tshi phusukanya tshiṱaha ḽa rahela mafhondo nnḓa uri a gude u fhufha, ḽa fhufha nṱha hao ḽa a takula nga phapha. O vha hwala e eṱhe hu si na muṅwe mudzimu ngae.

¹³ O vha hwala vha kanda miṱumbani ya dzithavha, a vha kanzwa nga mapfura a shango, a vha fusha nga ṋotshi dzi tshi bva phakhoni, lutomboni ha ela mapfura,

¹⁴ vha ḽa luvhomba lwa kholomo na mukhaha wa mbudzi, na ngwana dzo nonaho, na thutha na thongo dza Bashani, na goroi yavhuḓi i fhiraho yoṱhe, a vha nwisa waini ya nḓirivhe dzi ḓifhaho.

¹⁵ “Hone vha tshi ḽa vha fura, vha pfuma vha ḽa vha tou laṱa, ndi hone Jeshuruni a tshi vho thoma u pfunya, a landula Mudzimu o mu sikaho, a nyadza Bako ḽawe, vhushavhelo hawe.

¹⁶ Vho ḓinangela midzimu isili, vha ṱunga Muṋe washu nga zwithu izwo zwi nengisaho,

¹⁷ vha ṋekedza madimoni zwiṱhavhelo – zwithu zwi si mudzimu, na midzimu ye vha vha vha sa i ḓivhi, ye vha tou ṱunḓa kha vhahura, hone vhokhotsi avho vho vha vha sa i ḓivhi;

¹⁸ vha hangwa Khotsi o vha ṋeaho vhutshilo, vha sanda Ramaanḓa we a vha beba nga vhuṱungu.

¹⁹ “Muṋe washu a tshi zwi vhona a sinyuwa, nge vhana vhawe vha mu ṱunga,

²⁰ a ri, ‘Ndi a vha furalela, ndi vhone uri vha ḓo gumafhi. Ndi lushaka lwa mashandukwa, a vha fulufhedzei na zwiṱuku.

²¹ Hufha vho nṱutshela vha ḓinangela tshithu tshi si mudzimu, hufha vho nṱunga nga zwithu zwi sa tshidzi. Litshani ndi vha laṱe-vho ndi ḓinangele vha si vhathu, ndi vha ṱunge-vho nga lushaka lu sa ḓivhi tshithu.

²² Mbiti dzanga dzo funga mulilo; u ḓo duga wa swika na ngei fhasi vhafuni, wa fhisa shango na mitshelo yaḽo, wa duga wa swika na kha miteo ya dzithavha.

²³ Ndi ḓo vha rambela khombo, nda vha pfula, misevhe yanga ya tou fhelela khavho –

²⁴ ndi nḓala na dali na malwadze a sa lafhei. Ndi ḓo vha rambela mavhanda a ḓaka khathihi na dziṋowa dza vhuṱungu.

²⁵ Mikotoni vha ḓo ḽiwa nga pfumo, ngomu nḓuni vha fa nga nyofho – muṱhannga na musidzana, lushie na mukalaha, a hu nga ponyoki muthu.

²⁶ Ndo ri: Litshani ndi vha balanganye, ndi vha lozwe vha si tsha humbulwa nga muthu!

²⁷ Hone maswina avho a nga nngoḓa, vha nga zwi shanda vha ri: A si Yahavee o itaho hezwo, ndi maanḓa ashu!’

²⁸ Ndi lushaka lu shayaho maano, a vha na na ṱhalukanyo.

²⁹ Ngavhe vhe na ṱhalukanyo ndi musi vho zwi vhona, vha ṱalukanya uri vha ḓo gumafhi.

³⁰ Hufha swina ḽithihi ḽo pandamedza vha tshigidi! Hufha vhavhili vho gidimedza zwigidi zwa fumi! A si uri Bako ḽavho o vha laṱa naa? A si nge Yahavee a vha kumedza maswina naa?

³¹ Bako ḽa maswina a ḽi ngi ḽashu; na maswina a nga ḓipfela uri zwo ralo.

³² Hufha vhone vha tshi bva tsimuni ya minḓirivhe ya Sodoma, na phangani ya Gomora hu sa meli tshithu. Nḓirivhe dzavho ndi vhutulu, zwiṱokola zwadzo zwi a kalakata.

³³ Waini yavho ndi vhuṱungu ha phakhuphakhu, ndi vhuṱungu ha tshitemahe tsha vhuhali.’

³⁴ “Muṋe washu o ri, ‘Hezwo zwoṱhe ndo zwi vhea mbiluni, nda zwi shatela.

³⁵ Ndi ḓo vha rwa nda vha lifhedza musi une vha ḓo redzemuwa vha wa. Musi wa u lovha havho u tsini, zwo vha livhaho a zwi nga lengi.’

³⁶ “Muṋe washu u sengela vhathu vhawe, u khathutshela vhalanda vhawe nga u vhona vhó no kulea nungo, vha na nungo na vha si na nungo vha vho wa vhoṱhe.

³⁷ Ndi hone a tshi ḓo vhudzisa a ri, ‘Midzimu yavho i ngafhi zwino? A ngafhi mapako e vha vha vho shavhela khao?

³⁸ I ngafhi midzimu yo ḽaho mapfura a zwiṱhavhelo zwavho, ya nwa thevhula dzavho dza waini? Nga i vuwe i ni phalale, i vhe vhushavhelo haṋu!

³⁹ Ivhani na nzhele nazwo zwino: Mudzimu ndi Nṋe, ndi Nṋe ndi ndoṱhe, a hu tshee na muṅwe. Ndi Nṋe ndi no vhulaha nda dovha nda tshidza; a no phula mbonzhe a dovha a lafha ndi Nṋe; a hu na a no lamukisa muthu zwanḓani zwanga.

⁴⁰ Ndi imisa tshanḓa tsha swika makoleni nda ana nda ri: Nga vhutshilo hanga, Nṋe ndi tshilaho lini na lini,

⁴¹ ndi ḓo ṱuṱula banga ḽanga ḽa penya, nda ḽi fara nda haṱula vhathu, nda rwa vhoṱhe vha mmbangisaho, nda lifhedza maswina anga.

⁴² Pfumo ḽanga ḽi ḓo ḽa ṋama, misevhe yanga ya tou kambiwa nga malofha, malofha a vho waho nndwani na vho thubiwaho, malofha a maswina anga a mavhudzi malapfu!’

⁴³ “Tshakha dzoṱhe, fhululedzani lushaka lwa Muṋe washu! U ḓo lifhedza malofha a vhalanda vhawe, a rwa maswina awe, a pfumedzana na shango ḽawe na lushaka lwawe.”

Ndayo ya u fhiledza

⁴⁴ Mushe a ḓa e na Joshua ṅwana wa Nunu, a vhalela Vhaisraele luimbo ulwo lwoṱhe.

⁴⁵ Musi o no fhedza u vha vhalela

⁴⁶ a amba navho a ri, “Sedzani uri ni elelwe maipfi aya oṱhe e nda ni laya ṋamusi. Ni laye na vhana vhaṋu uri vha vhulunge mafhungo oṱhe a mulayo uyu vha a tevhedze.

⁴⁷ A si mahandana aya, ndi hone vhutshilo haṋu. Arali ni tshi tevhedza haya mafhungo, ndi hone ni tshi ḓo fhedza miṅwaha minzhi ni shangoni ḽine na khou wetshela khaḽo zwino ni tshi wela Jorodani uri ni ḽi dzhie ḽi vhe ḽaṋu.”

Mushe a tshi pfi u ḓo fa thavhani ya Nebo

⁴⁸ Ḓuvha ḽeneḽo Muṋe washu a dovha a amba na Mushe a ri,

⁴⁹ “Gonya thavha ya Nebo fhano thavhani dza Abarimu shangoni ḽa Muaba u livhana na Jerikho, u lavhelese shango ḽa Kanana ḽine nda ḽi ṋea Vhaisraele uri ḽi vhe ḽavho.

⁵⁰ U ḓo fa thavhani yeneyo ine wa ḓo i gonya, wa ya hune vha kale vha vha hone, zwi nge zwa mukomana wau Aroni a tshi fela thavhani ya Horo.

⁵¹ U sa dzhena Kanana ndi nge iwe na Aroni na vha ni sa fulufhedzei hangei maḓini a Miriba wa Kadeshe phangani ya Tsini, a no ngo sumbedza Vhaisraele vhukhethwa hanga.

⁵² Shango ḽine nda ḽi ṋea Vhaisraele u ḓo tou ḽi vhona ḽi henefho phanḓa hau, hone u dzhena khaḽo u a nga dzheni.”