DOTORONOMIO 25 - BIVHILI KHETHWA Mafhungo Madifha

¹ “Arali vhanna vhavhili vha tshi isa mafhungo khoroni, a senguluswa, a si na mulandu a vhonwa a si na mulandu, a na mulandu a vhewa mulandu,

² ha wanala o fanelwa nga ṱhamu, muhaṱuli u fanela u mu shuvhamisa, a ri a rwiwe ṱhamu dzo eḓanaho vhutshinyi hawe.

³ Ni songo mu rwa ṱhamu dzi fhiraho 40, ni sa ḓo kalula ha vha u nyadzisa Muisraele wa haṋu.

Mulayo wa u tsireledza tshifuwo

⁴ “Phulu i no khou fhula ni songo i vhofha mulomo.

Pfanelo ya murathu

⁵ “Arali vhanna vhavhili vhana vha munna vha tshi dzula vhoṱhe, muṅwe wavho a fa a si na ṅwana wa mutuka, tshilikadzi ya mufu i songo dzhiwa nga muṅwe munna wa thungo, murathu nga mu dzee a ite pfanelo dzawe a bebele mukomana wawe vhana.

⁶ Ṅwana wa tanzhe wa mutuka ane uyo musadzi a mu beba u fanela u vhidzwa nga dzina ḽa mufu uri dzina ḽawe ḽi sa ḓo fa ḽa si tsha pfala kha Vhaisraele.

⁷ Arali uyo munna a tshi landula musadzi wa mufu, uyo musadzi nga a ye khoroni ha vhahulwane a vha vhudze a ri, ‘Murathu wa munna wanga o hana u vusa dzina ḽa mukomana wawe kha Vhaisraele, ha tendi u nnzea.’

⁸ Ndi hone vhahulwane vha muḓi wawe vha tshi fanela u vhidza uḽa munna vha amba nae. Arali a tshi ḓi futelela a ri, ‘A thi tendi u mu dzea,’

⁹ musadzi wa mukomana wawe u fanela u sendela khae vhahulwane vha tshi zwi vhona, a mu bvula thovho a mu pfela mare khofheni a ri, ‘Khezwo zwine zwa itwa munna a sa tendi u fhaṱa muṱa wa mukomana wawe.’

¹⁰ U bva zwenezwo Vhaisraele vha fanela u rina muṱa wawe ḽa u ri, ‘Muṱa wa Mubvulwathovho’!

A no pfuka mulayo hu tshi lwiwa

¹¹ “Arali vhanna vhavhili vha tshi khou lwa, musadzi wa muṅwe a phalala munna wawe a fara uḽa munna a khou lwaho nae nga vhudzimu,

¹² ni fanela u mu tumula tshanḓa, ni songo mu khathutshela.

Zwikalo na mielo

¹³ “U songo fhura vhathu u tshi kala, wa vha na matombo mavhili a sa eḓani,

¹⁴ kana wa vha fhura u tshi ela, wa vha na mielo mivhili nḓuni yau;

¹⁵ matombo a u kala na mielo ya u ela nga zwi vhe zwo fanelaho zwi no eḓana, ndi hone u tshi ḓo lalama u shangoni ḽine Muṋe washu Mudzimu waṋu a ni ṋea.

¹⁶ Muṋe washu Mudzimu u nengwa vhoṱhe vha no fhura vhaṅwe.

Vhaamaleke nga vha lozwiwe!

¹⁷ “Elelwani zwe Vhaamaleke vha ni ita musi ni tshi pfuluwa Egipita ni nḓilani,

¹⁸ zwiḽa vha tshi ni ḓa nga murahu vha ni dia musi no neta nga lwendo ni si tshee na nungo, vha vhulaha vhoṱhe vho salaho murahu, vha si vhuye vha ofha Mudzimu.

¹⁹ Zwenezwo musi Muṋe washu Mudzimu waṋu o no ni kundela maswina aṋu oṱhe thungo dzoṱhe, na dzula shangoni ḽine a ni ṋea uri ni ḽi dzhie ḽi vhe ḽaṋu, na dzula ni sa ofhi tshithu, ni fanela u lozwa Vhaamaleke vha si tsha humbulwa fhano fhasi ha lutombo. Ni songo vhuya na zwi hangwa.