DOTORONOMIO 20 - BIVHILI KHETHWA Mafhungo Madifha

Ndayo ya musi wa nndwa

¹ “Musi ni tshi bva pfumo ni tshi yo lwa na maswina aṋu, na vhona uri vha na bere na gariki dza nndwa, nahone vha a ni fhira nga u anda, ni songo vha ofha, hufha Muṋe washu Mudzimu waṋu e na inwi, ndi Ene we a ni pfulusa shangoni ḽa Egipita.

² Musi ni sa athu thoma u lwa, tshifhe u fanela u sendela a amba na vhathu

³ a ri, ‘Vhanna vha Israele, thetshelesani! Ṋamusi ni khou ya u dia maswina aṋu; ni songo tshenuwa, ni songo ofha, ni songo vha tetemela, ni songo hanganea ni tshi vha vhona.

⁴ Muṋe washu Mudzimu waṋu u a ni fhelekedza uri a ni lwele a tshi lwa na maswina aṋu, u ḓo ita uri ni kunde.’

⁵ “Ndi hone vhakoma vha tshi fanela u amba na vhathu vha ri, ‘Ndi nnyi fhano ane a kha ḓi bva u fhaṱa nnḓu, hone a sa athu dzula khayo? Kha a humele hayani a sa ḓo fa nndwani nnḓu yawe ya dzhiwa nga muṅwe a dzula khayo.

⁶ Ndi nnyi ane a kha ḓi bva u lima tsimu ya minḓirivhe, hone a sa athu wana tshifhinga tsha u fula nḓirivhe dzayo? Na ene kha a humele hayani a sa ḓo fa nndwani nḓirivhe dza ḽiwa nga muṅwe.

⁷ Ndi nnyi ane a kha ḓi bva u dzea musidzana hone a sa athu mu vhinga? Na ene kha a humele hayani a sa ḓo fa nndwani musidzana wawe a dzewa nga muṅwe.’

⁸ Vhakoma vha dovhe vha ambe na vhathu vha ri, ‘Ndi nnyi ane a ofha kana a tetemela? Na ene kha a humele hayani a sa ḓo ita uri na mbilu dza vhaṅwe dzi ṋoke vha ofhe vhoṱhe.’

⁹ “Musi vhakoma vho no fhedza u amba na vhathu, vha fanela u vhea vharangaphanḓa vha mmbi.

¹⁰ Musi ni tshi vho govhela muḓi uri ni lwe nawo ni range u linga u pfumedzana navho.

¹¹ Arali vha tshi tenda u pfumedzana vha ni vulela khoro, vhadzulapo vhoṱhe vha muḓi vha ḓo vha phuli dzaṋu, ni vha kombetshedze u ni shumela.

¹² Hone arali vha sa tendi u pfumedzana na inwi, vha lwa na inwi, inwi ni vha govhele.

¹³ Muṋe washu Mudzimu waṋu u ḓo vha kumedza zwanḓani zwaṋu. Zwenezwo ni fanela u vhulaha vhanna vhoṱhe vha muḓi nga pfumo,

¹⁴ hone vhasadzi na vhana vhaṱuku na zwifuwo na thundu dzoṱhe dzi re muḓini dzine muthu a nga dzhia ni zwi thube, ni ḽe zwe na thubela maswina aṋu nó fhiwa nga Muṋe washu Mudzimu waṋu.

¹⁵ Ndi zwone zwine na ḓo ita miḓi yoṱhe i re kule-kule na shango ḽa haṋu, i si miḓi ya Vhakanana havha.

¹⁶ Miḓi ya tshakha idzi ine Muṋe washu Mudzimu waṋu a ni ṋea uri i vhe yaṋu, khayo ni songo litsha tshithu na si vhulahe,

¹⁷ ni fanela u lozwa zwoṱhe ni zwi kumedze Muṋe washu. Ndi Vhahithi na Vhaamori na Vhakanana na Vhapherisi na Vhahivi na Vhajebusi; vhenevho Muṋe washu Mudzimu waṋu o ni laedza uri ni vha lozwe,

¹⁸ u itela uri vha si ni funzedze u ita zwithu zwoṱhe zwi nengisaho zwine vhone vha luvha midzimu yavho ngazwo na vho khakhela Muṋe washu Mudzimu waṋu.

¹⁹ “Arali na lwa na muḓi na u govhela ha fhela maḓuvha manzhi, ni songo rema miri ya iḽo shango kana na i tshinya, hufha ni tshi ḓo sala ni tshi i ḽa, ni songo i rema! Kani-ha miri yo no vha maswina aṋu ni tshi vho ṱoḓa u lwa nayo?

²⁰ Yeneyo miri ine na ḓivha uri a i ḽiwi, ndi yone fhedzi ine na nga i rema ni tshi itela u fhaṱa maḓingo a u pfula muḓi ni khao na vhuya na kunda uyo muḓi une wa lwa na inwi.