DOTORONOMIO 2 - BIVHILI KHETHWA Mafhungo Madifha

Vhaisraele vha tshi pfulutshela Kanana nga nḓila ya u mona

¹ “Ngavhuya ra takuwa ro livha phangani ri tshi tshimbila nga nḓila ya Lwanzhe lwa Dziṱhanga, nga he Muṋe washu a mmbudza, ra fhedza maḓuvha ri tshi khou mona na Thavha dza Seiri,

² Muṋe washu a vhuya a mmbudza a ri,

³ ‘No no fhedza maḓuvha ni tshi khou mona na thavha iyi, zwino ṱutshelani-ha thungo ya devhula.

⁴ Zwino vhudza vhathu u ri: Hu si kale ni ḓo pfuka mikano ya vhakomana vhaṋu vhana vha Esau vha no dzula Seiri; vha a ni ofha, hone inwi ni sedzese.

⁵ Ni songo lwa navho; a thi ni ṋei tshipiḓa na tshiṱukuṱuku tsha shango ḽavho, ndi amba na hune muthu a nga kanda a thi ni ṋei; shango ḽa Thavha dza Seiri ndo ḽi ṋea Esau uri ḽi vhe ḽawe.

⁶ Zwiḽiwa zwine na ḓo ḽa na maḓi ane na ḓo nwa, ni renge khavho nga tshelede.

⁷ Hufha Nṋe Yahavee Mudzimu waṋu ndo ni shudufhadza kha zwoṱhe zwine na ita; ndo ni tsireledza lwendoni lwoṱhe ni tshi tshimbila phangani iyi khulu miṅwaha ya 40 yoṱhe; Nṋe Yahavee Mudzimu waṋu ndo vha ndi tshi ḓi vha na inwi ni sa shayi tshithu.’

⁸ “Zwenezwo ra fhira, ri si tsha fara nḓila i no bva Elathi na Etsioni Gebere ya fhira nga govha ḽa Lwanzhe lwa Muṋo, shango ḽa vhakomana vhashu vhana vha Esau vha no dzula Seiri ra ḽi sia nga thungo, ra fara nḓila ya phanga ya Muaba.

⁹ Muṋe washu a mmbudza a ri, ‘Ni songo lwa na Vhamuaba, ni songo vha dia, a tho ngo ni ṋea tshipiḓa na tshithihi tsha shango ḽavho uri ḽi vhe ḽaṋu, shango ḽa Ara ndo ṋea vhana vha Loto uri ḽi vhe ḽavho.’ ”

¹⁰ (Hafhu kale ho vha hu tshi dzula Vhaemi shangoni heḽo, lushaka luhulu lwa maanḓa. Vho vha vhe miswonḓa unga Vhaenaki,

¹¹ vha tshi pfi Vharefai unga Vhaenaki, hone Vhamuaba vho vha vha tshi ri ndi Vhaemi.

¹² Seiri kale ho vha hu tshi dzula Vhahori, hone vhana vha Esau vha vha lozwa vha vha dzhiela shango vha dzula khaḽo, sa zwe Vhaisraele vha thatha maswina avho shangoni ḽe Muṋe washu a vha ṋea uri ḽi vhe ḽavho.)

¹³ “Ndi hone Muṋe washu a tshi ri, ‘Takuwani ni wele mulambo wa Zerede,’ ra mbo u wela.

¹⁴ Tshee ra takuwa Kadeshe Barania ra vhuya ra wela mulambo wa Zerede ho vha ho no fhela miṅwaha ya 38, ha vhuya ha fa vhanna vhoṱhe vha bvaho pfumo vha murafho wonoyo unga Muṋe washu o vha o vha vhudza a khwaṱhisa nga muano.

¹⁵ Muṋe washu o vha rwa vha lovha vha vhuya vha fhela vhoṱhe mishashani.

¹⁶ “Musi vhanna vhoṱhe vha bvaho pfumo vho no fa vha fhela,

¹⁷ Muṋe washu a amba na nṋe a ri,

¹⁸ ‘Ṋamusi ni khou pfuka mikano ya shango ḽa Ara, ḽa Vhamuaba,

¹⁹ ni ḓo sendela tsini na Vhaamoni. Ni songo vha dia kana na lwa navho; a tho ngo ni ṋea tshipiḓa tsha shango ḽa Vhaamoni, ndo ḽi ṋea vhone vhana vha Loto uri ḽi vhe ḽavho.’ ”

Vhathu vhe vha vha vha tshi dzula shangoni ḽa Vhaamoni kale

²⁰ (Shango iḽo kale ḽo vha ḽi tshi pfi ndi ḽa Vharefai, nge ha vha hu tshi dzula Vharefai, hone Vhaamoni vho vha vha tshi ri ndi Vhazamazumu.

²¹ Na vhone vho vha vhe lushaka luhulu lwa maanḓa, vhe miswonḓa u fana na Vhaenaki, hone Vhaamoni vha tshi swika Muṋe washu a lozwa Vharefai, Vhaamoni vha dzhia shango ḽavho vha dzula khaḽo.

²² Zwi ḓi nga zwe Muṋe washu a itela vhana vha Esau vha no dzula Seiri musi a tshi lozwa Vhahori u swikani havho, vhone vha dzhia shango ḽa Vhahori ḽa vha ḽavho, vha dzula hone, na ṋamusi.

²³ Vhaavi vhone vho vha vha tshi dzula miḓini yavho u swika Gaza, ha ḓa Vhakhafithori vhe vha bva Khafithori, vha vha thatha vha yo dzula shangoni ḽavho.)

Vhaisraele vha tshi kunda Sihoni

²⁴ “Muṋe washu a dovha a ri, ‘Takuwani zwino ni wele mulambo wa Arinoni, ngauri ndi ni kumedza Sihoni Muamori, khosi ya Hesheboni. Mu thomeni ni mu die.

²⁵ U bva ṋamusi ndi ḓo ita uri tshakha dzoṱhe dzi re fhasi ha lutombo dzi ni ofhe dzi ni teledze; dzi tshi pfa zwine na ita dzi ḓo ofha dza tou tetemela.’

²⁶ “Ri tshi swika phangani ya Kedemotho nda ruma vhaḓinḓa ha Sihoni khosi ya Heshebono, nda mu vhudza mafhungo a mulalo nda ri,

²⁷ ‘Kha vha ri tendele ri fhire nga shangoni ḽavho; ri ḓo tshimbila nga nḓila fhedzi, a ri nga pambutsheli kha tshauḽa kana tshamonde,

²⁸ zwiḽiwa zwine ra ḽa ri ḓo renga nga tshelede, na maḓi ane ra nwa ri ḓo renga nga tshelede, tenda vha ri litsha ra fhira,

²⁹ sa zwiḽa vhana vha Esau vha no dzula Seiri na Vhamuaba vha no dzula Ara vho tenda ra fhira; ri khou tou funa u wela Jorodani ra wetshela shangoni ḽe Mudzimu Muṋe washu a ri ṋea.’

³⁰ “Hone Sihoni khosi ya Hesheboni ho ngo tenda ri tshi fhira nga shangoni ḽawe; Muṋe washu Mudzimu waṋu o ita uri a ite tshipimbi a konḓe uri Muṋe washu a kone u mu kumedza inwi, uri ni dzhie shango ḽawe. Vhukuma na ḽi dzhia.

³¹ Muṋe washu a mmbudza a ri, ‘Nṋe Sihoni na shango ḽawe ndo no ḓi thoma u ni ṋea, zwino inwi iyani ni mu die ni ḓidzhiele shango ḽawe!’

³² “Ndi hone Sihoni na mmbi yawe yoṱhe vha tshi bva pfumo vha ḓa u lwa na riṋe Jahatsi.

³³ Mudzimu Muṋe washu a mbo mu kumedza riṋe, ra mu kunda khathihi na vhana vhawe na mmbi yawe yoṱhe,

³⁴ ra dzhia miḓi yawe yoṱhe nga tshifhinga tshenetsho, miḓi yoṱhe ra i kumedza Muṋe washu nga u i thutha, ra si litshe na munna na muthihi kana musadzi kana ṅwana á songo vhulawa.

³⁵ Tshe ra si lozwe ndi zwifuwo fhedzi; zwone ro zwi thuba khathihi na thundu dze ra wana miḓini ye ra i kunda.

³⁶ A hu na muḓi na muthihi we ra kundwa u u dzhia, u bva Aruere u re khunzikhunzini dza Arinoni na muḓi u re ngomu govhani ḽa Arinoni, u swika Giliadi, a hu na muḓi we ra kundwa u u dzhia, Mudzimu Muṋe washu o ri ṋea yoṱhe.

³⁷ He ra si sendele ndi shangoni ḽa Vhaamoni fhedzi, u tsa na mulambo wa Jaboko na miḓi i re dzithavhani, ngauri Mudzimu Muṋe washu o vha o ri dzivhisa.