DANIELE 7 - BIVHILI KHETHWA Mafhungo Madifha

Muloro wa Daniele: Mavhanda maṋa Bono ḽa mavhanda

¹ Nga ṅwaha wa u ranga wa muvhuso wa Beleshatsara khosi ya Babele, Daniele o lora muloro, a vhona mabono o eḓela. Uyo muloro a u ṅwala a tshi hanelela zwe a vhona.

² Daniele o ri, “Ndo vha tshi khou vhona mabono vhusiku: Ndo vhona mimuya miṋa i tshi khou ritha lwanzhe luhulu.

³ Afho lwanzheni ha bva mavhanda maṋa mahulu, o vha a sa fani.

⁴ Ḽa u thoma ḽo vha ḽi tshi nga ndau, ḽi na phapha dza goni. Ndó ḓi sedza nda vhona phapha dzaḽo dzi tshi swarulwa ḽa takulelwa nṱha ḽa ima nga milenzhe unga muthu, ḽa ṋewa mbilu ya muthu.

⁵ Ḽivhanda ḽa vhuvhili ḽe nda ḽi vhona ḽo vha ḽi tshi nga biara, lurumbu lwaḽo luṅwe ḽo imela nṱha, mulomoni waḽo hu na mbabvu tharu vhukati ha maṋo aḽo. Ha pfala ipfi ḽi tshi ri, ‘Vuwa, iḽa ṋama u fure.’

⁶ Nda dovha nda sedza nda vhona ḽiṅwe ḽivhanda ḽi no nga nngwe, ḽi na phapha nṋa dzi no nga dza tshiṋoni, ḽi na ṱhoho nṋa, ḽa ṋewa maanḓa a u vhusa.

⁷ Nda dovha nda vhona ḽiṅwe bono kha mabono eneo a vhusiku: ndi tshi sedza nda vhona ḽivhanda ḽa vhuṋa, ḽi no ofhisa, ḽi no ofhea, ḽa maanḓa; ḽo vha ḽi na maṋo mahulu a tsimbi, ḽi tshi ṱhukhukanya ḽa ḽa zwe ḽa vhulaha, zwo salaho ḽi tshi kandekanya nga milenzhe. Ḽone ḽo vha ḽi sa fani na aḽa mavhanda a u ranga, ḽo vha ḽi na ṋanga dza fumi.

⁸ “Musi ndi tshee ndo sedza ṋanga dzenedzo, nda vhona luṅwe luṋanga luṱuku lu tshi khou mela vhukati hadzo, lwa kula ṋanga tharu dziḽa dza u thoma, kha luṋanga lwonolwo nda vhona maṱo a no nga a muthu na mulomo wa mazuwo.”

Daniele a tshi vhona a no tshila lini na lini

⁹ “Musi ndi tshi khou sedza khuluṋoni dza tikiwa, a no tshila lini na lini a dzula kha khuluṋoni yawe. Nguvho yawe yo vha yo tshena unga mahaḓa, mavhudzi a ṱhoho yawe a tshi nga ulu tshena-tshena. Khuluṋoni yawe yo vha i mulilo u dugaho, milinga yayo i khavhu ya mulilo fhedzi.

¹⁰ Ha ela mulambo wa mulilo u tshi bva henefho phanḓa hawe, a tshi khou shumelwa nga zwigidi na zwigidi zwa vhathu, vhathu vha dzimilioni na dzimilioni vhó ima phanḓa hawe. Ha thoma tsengo, ha vulwa dzibugu.

¹¹ “Zwithu zwihulu zwe luṋanga lwa vha lu tshi khou amba zwo vha zwi tshi kha ḓi pfala nḓevheni dzanga, ndi tshi kha ḓi vha ndo sedza iḽo ḽivhanda ḽa mbo ḓi vhulawa, muvhili waḽo wa poswa muliloni wa swa we lore.

¹² Maṅwe mavhanda a dzhielwa maanḓa, hone a tendelwa u tshila tshifhinganyana.

¹³ “Nde ndi tshi sedza mabono anga a vhusiku, nda vhona a no nga Mubebwa-nga-muthu a tshi khou ḓa o namela makole.

¹⁴ A ṋewa muvhuso na vhugala na vhuhosi, vhathu vha tshakha dzoṱhe na matsinde na nyambo vha mu shumela. Muvhuso wawe ndi wa lini na lini, u nga si fhele, u nga si vhuye wa phusukana.”

Ṱhalutshedzo ya mabono a mavhanda

¹⁵ “Nṋe Daniele zwa nndina nga maanḓa, mabono e nda a vhona a ntshenusa.

¹⁶ Nda ya kha muṅwe wa vhe vha vha vho ima henefho tsini, nda mu vhudzisa uri a mmbudze ngoho ya zwoṱhe hezwo. A tshi fhindula a nnzumbululela zwine zwoṱhe zwa amba,

¹⁷ a ri, ‘Hayo mavhanda mahulu maṋa ndi mivhuso miṋa ine ya ḓo vha hone fhano fhasi.

¹⁸ Vho ṋewaho muvhuso ndi vhakhethwa vha Waṱaḓuluṱaḓulu, muvhuso uyo u ḓo vha wavho tshoṱhe, vha vhusa lini na lini.’

¹⁹ “Zwino nda vhudzisa uri ndi ḓivhe ngoho nga ḽivhanda ḽa vhuṋa ḽi sa fani na maṅwe oṱhe, ḽine ḽa ofhisa, ḽi re na maṋo a tsimbi na ṋala dza musinaseṱhe, ḽine ḽa ṱhukhukanya, ḽa ḽa, ḽa kandekanya nga milenzhe zwe zwa sala,

²⁰ na zwine maṋanga a fumi a re ṱhohoni yaḽo a amba, na uri ndi mini ho mela luṅwe luṋanga, ha kulea maṋanga mararu a u ranga, na uri ndi mini ulwo luṋanga lwo vha lu na maṱo na mulomo wa mazuwo, na uri ndi mini lwo hula lwa fhira maṅwe.

²¹ Ndi lwone luṋanga lwe nda ri ndo sedza nda vhona lu tshi lwa na vhakhethwa lu tshi nga lu a vha kunda,

²² ha vhuya ha ḓa a no tshila lini na lini, a haṱula ha wanala vhakhethwa vha Waṱaḓuluṱaḓulu vha si na mulandu, tshifhinga tsha vha tsho swika tsha uri vhakhethwa vha dzhie muvhuso.

²³ “A nṱalutshedza a ri, ‘Ḽivhanda ḽa vhuṋa ndi muvhuso wa vhuṋa fhano fhasi, u sa fani na miṅwe mivhuso yoṱhe. U ḓo mila ḽifhasi ḽoṱhe, wa ḽi kandekanya nga milenzhe, wa ḽi pwasha.

²⁴ Ṋanga idzo dza fumi ndi mahosi a fumi a no ḓo bva kha muvhuso wonoyo. Musi vho no vhusa hu ḓo vhusa iṅwe khosi, heyo a i nga fani na dziḽa dza u ranga dzoṱhe, i ḓo kunda mahosi mararu.

²⁵ Iyo khosi i ḓo amba i tshi nyefula Waṱaḓuluṱaḓulu, ya kandeledza vhakhethwa vha Waṱaḓuluṱaḓulu. I ḓo linga u shandukisa zwifhinga zwo vhewaho na milayo, i ḓo vhusa vhakhethwa tshifhinganyana, miṅwaha mivhili na hafu.

²⁶ Hone khoro ya ṱaḓulu i ḓo dzula khaṱhuloni, iyo khosi ya dzhielwa maanḓa ayo a u lozwa na u thutha, ya si tsha dovha ya a wana.

²⁷ Ndi hone muvhuso na vhuhosi na vhuhulwane ha mivhuso yoṱhe fhano fhasi zwi tshi ḓo ṋewa vhakhethwa, vhathu vha Waṱaḓuluṱaḓulu. Muvhuso wawe u ḓo vha wa lini na lini, vhavhusi vhoṱhe vha ḓo mu luvha vha ita zwine a funa.’

²⁸ “Mafhungo anga a fhela henefha. Nṋe Daniele zwo nndina mbilu, nda tswukuluwa, hone izwo nda si zwi vhudze muthu.”