DANIELE 4 - BIVHILI KHETHWA Mafhungo Madifha

Muloro wa Nebukhadnetsara wa muri

¹ Khosi Nebukhadnetsara a ḓivhadza vhathu vha tshakha dzoṱhe na matsinde oṱhe na nyambo dzoṱhe shangoni ḽoṱhe mafhungo haya a ri, “Mulalo nga u ḓi vha na inwi!

² Ndi vhona zwo fanela ndi tshi ni vhudza maḓembe a kanukisaho e Mudzimu Waṱaḓuluṱaḓulu a nnyitela.

³ “Zwiga zwawe zwo hula hani, maḓembe awe a na maanḓa mangafhani! Muvhuso wawe ndi wa lini na lini, u ḓo vhusa ha fhira mirafho na mirafho.

⁴ “Nṋe Nebukhadnetsara ndo vha ndi tshi dzula hayani pfamoni yanga ndo rudza mbilu zwi tshi nnakela.

⁵ Ndo lora muloro we wa nnyofhisa. Ndo vha ndo eḓela nda vhona mabono, nda farwa nga nyofho.

⁶ Nda vhidzisa vhaṱali vhoṱhe vha Babele uri vha ḓe vha nṱalutshedze zwine uyo muloro wa amba.

⁷ Ha ḓa vhadziamanditi na vhabvumbi na vhaḓivhi vha zwa ṋaledzi, na mingome, nda vha vhudza zwe nda lora, hone vha kundwa u nṱalutshedza muloro.

⁸ Ha vhuya ha ḓa Daniele, we a irwa ḽa Beletheshatsara hu tshi humbulwa mudzimu wanga, ane muya wa midzimu mikhethwa wa dzula ngomu hawe; onoyo a ḓa hune nda vha hone, nṋe nda mu vhudza muloro wanga.

⁹ “Nda ri, ‘Beletheshatsara, inwi muhulwane wa vhabvumbi, ndi a ḓivha uri muya wa midzimu mikhethwa u dzula ngomu haṋu, ndi ḓivha na uri a hu na tshiphiri tshine na si tshi ḓivhe. Muloro we nda u lora ngoyu, mmbudzeni zwine wa amba.

¹⁰ Mabono e nda a vhona ndo eḓela ngea: “ ‘Ndo vhona muri vhukati ha shango; wo vha wo lapfesa.

¹¹ Uyo muri wa aluwa wa lapfa, wa khwaṱha, ṱhodzi yawo ya vhuya ya ṋanzwa makole, wa vhonwa nga vhathu vha re khuḓani nṋa dza shango.

¹² Wa ita tshimvingimvingi tsha u naka, wa vha na mitshelo minzhi, ya fusha vhoṱhe vha re fhasi hawo. Zwivhanda zwa ḓaka zwo vha zwi tshi lala murunzini wawo, zwiṋoni zwa fhaṱa zwiṱaha matavhini awo, zwoṱhe zwi tshilaho zwa wana zwiḽiwa khawo.

¹³ Musi ndi tshi kha ḓi sedza ayo mabono e nda a vhona ndo ḓi eḓela, nda vhona muruṅwa wa u linda, a tsa a tshi bva makoleni.

¹⁴ A huwelela nga ipfi ḽihulu a ri: Remani uyo muri, khwathani matavhi awo, u ṱanguleni maṱari, laṱani mitshelo yawo kule; phukha nga dzi shavhe fhasi hawo, zwiṋoni zwi shavhe matavhini awo.

¹⁵ Hone litshani tshiguthe na midzi mavuni zwó vhoxwa nga tsimbi na musinaseṱha hatsini ha ḓakani. Mu litsheni a welwe nga ṅwando, a fule hatsi na phukha.

¹⁶ Mbilu yawe i songo tsha nga ya muthu, nga a ṋewe mbilu ya phukha, hu vhuye hu fhele miṅwaha miṱanu na mivhili!

¹⁷ Heyo ndi ṱahu yo ḓivhadzwaho nga vhalindi, ndi khaṱhulo yo ḓivhadzwaho nga vharuṅwa vhakhethwa, uri zwoṱhe zwi tshilaho zwi ḓivhe uri Waṱaḓuluṱaḓulu u vhusa vhuhosi ha vhathu, u vhu ṋea ane a tou funa, a vhea onoyo ane a nyadziwa nga vhathu vhoṱhe.

¹⁸ “ ‘Hoyo ndi muloro we nda u lora, nṋe, khosi Nebukhadnetsara. Zwino inwi Beletheshatsara, mmbudzeni zwine wa amba, ngauri a hu na na muṱali na muthihi muvhusoni wanga we a kona u nṱalutshedza wone, hone inwi ni ḓo zwi kona ngauri muya wa midzimu mikhethwa u dzula ngomu haṋu.’ ”

Daniele a tshi ṱalutshedza muloro

¹⁹ Daniele ane ḽiṅwe a pfi Beletheshatsara, a ranga u tshenuwa a tou hanganea. Khosi ya ri, “Beletheshatsara, ni songo tshenuswa nga uyo muloro na zwine wa amba.” Beletheshatsara a fhindula a ri, “Muṋe wanga, ngavhe uyo muloro u tshi amba maswina avho, zwine wa amba ngavhe zwi tshi wela vhane vha vhenga thovhele.

²⁰ Muri we vha u vhona u tshi aluwa wa lapfa wa khwaṱha wa vhuya wa ṋanzwa makole, wa vhonwa nga vhathu vhoṱhe u swika vhugumoni ha ḽifhasi,

²¹ muri wa tshimvingimvingi tsha u naka, u re na mitshelo minzhi, u re na zwiḽiwa zwi fushaho vhoṱhe vha re fhasi hawo, zwivhanda zwa ḓaka zwa lala murunzini wawo, zwiṋoni zwa fhaṱa zwiṱaha matavhini awo –

²² uyo muri ndi vhone thovhele, vho aluwa vha lapfa vha khwaṱha, tshiimo tshavho tsha hula lune tsha ṋanzwe makole, muvhuso wavho wa swika migumoni ya ḽifhasi.

²³ “Mulindi we a vhonwa nga thovhele, uḽa muruṅwa mukhethwa we a tsa a tshi bva makoleni, a ri, ‘Remani uyo muri ni u lozwe, hone ni litshe tshiguthe na midzi mavuni zwó vhoxwa nga tsimbi na musinaseṱha hatsini ha ḓakani; mu litsheni a welwe nga ṅwando wa ḽiṱaḓulu, a fule hatsi unga phukha dza ḓaka, hu vhuye hu fhele miṅwaha miṱanu na mivhili’ –

²⁴ Thovhele, ṱhalutshedzo ngeino, nḓivhadzo ya Waṱaḓuluṱaḓulu yo swikaho ha thovhele ngeino:

²⁵ “Vha ḓo thathelwa kule na vhathu, vha tshila na phukha dza ḓaka, vha fula hatsi unga phulu, vha welwa nga ṅwando; hu ḓo vhuya ha fhela miṅwaha miṱanu na mivhili u swika vha tshi ḓivha uri Waṱaḓuluṱaḓulu u vhusa mivhuso ya vhathu, u i ṋea ane a tou funa.

²⁶ “Zwe zwa ambiwa upfi, ‘Litshani tshiguthe tsha muri na midzi,’ zwi amba uri vha ḓo dovha vha vha khosi musi vha tshi ṱalukanya uri Waṱaḓulu u vhusa zwoṱhe.

²⁷ Zwino-ha thovhele, nga vha ṱanganedze nyeletshedzo yanga: nga vha ite zwivhuya vha laṱe vhuvhi; nga vha laṱe vhutshinyi havho vha khathutshele vhashai, ndi hone vha tshi ḓo lalama zwa vha nakela.”

Muloro u tshi khunyelela

²⁸ Zwoṱhe hezwo zwo itea kha khosi Nebukhadnetsara.

²⁹ Musi ho fhela miṅwedzi ya 12, musi khosi i tshi khou ḓitshimbilela nṱha ha ṱhanga ya pfamo ya musanda ngei Babele,

³⁰ i tshi khou ri, “Babele muhulu ngoyu! Pfamo ya musanda! Ndi nṋe ndo u fhaṱaho nga nungo dzanga na maanḓa anga uri ndi sumbedze vhugala ha vhuhosi hanga!”

³¹ Mazuwo a sa athu fhela mulomoni wawe ha pfala ipfi ḽi tshi bva ṱaḓulu ḽa ri, “Khosi Nebukhadnetsara, maipfi haya a ḓela iwe! Wo dzhielwa vhuhosi,

³² “u ḓo thathelwa kule na vhathu, wa tshila na phukha dza ḓaka; u ḓo fula hatsi unga phulu, ha vhuya ha fhela miṅwaha miṱanu na mivhili, u vhuye u ḓivhe uri Waṱaḓuluṱaḓulu u vhusa mivhuso ya vhathu, u i ṋea ane a tou funa.”

³³ Maipfi ayo a mbo ḓi khunyelela na zwenezwo: Nebukhadnetsara a thathelwa kule na vhathu, a fula hatsi unga phulu, a welwa nga ṅwando; mavhudzi awe a lapfa unga mithenga ya goni, ṋala dzawe dza nga dza tshiṋoni.

³⁴ “Musi tshifhinga tsho no fhela, nṋe Nebukhadnetsara nda lavhelesa ṱaḓulu; nda dovha nda vha na ṱhalukanyo. Nda renda Waṱaḓuluṱaḓulu, nda ri: “Ndi a mu hulisa, ndi a mu khoḓa, u hone lini na lini, u vhusa lini na lini, muvhuso wawe u vhonwa nga mirafho na mirafho.

³⁵ Tshakha dza shango u vhona dzi si tshithu. Hu vharuṅwa vha ṱaḓulu, hu vhathu fhano fhasi, u vha ita zwine a funa. A hu na ane a nga thivhela zwine a ita kana a mu vhudzisa a ri, ‘U khou itani?’

³⁶ “Zwenezwo nda mbo dovha nda vha na ṱhalukanyo, nda dovha nda ṋewa khuliso ya vhuhosi hanga, na vhurena, na vhugala hanga. Vhaeletshedzi vhanga na vhahulwane vha nṱanganedza, nda vhuedzedzwa kha khuluṋoni yanga, nda vha muhulwane u fhira zwiḽa zwa u ranga.

³⁷ Zwino nṋe Nebukhadnetsara ndi ri, “Nga hu khoḓwe, hu huliswe, hu rendwe Khosi ya ṱaḓulu, zwoṱhe zwine a ita ndi zwone, ha khakhi, u na maanḓa a u ṱukufhadza vhane vha ḓihudza.”