DANIELE 1 - BIVHILI KHETHWA Mafhungo Madifha

Vhaṱhanngana vha Vhaheberu muṱani wa Nebukhadnetsara

¹ Nga ṅwaha wa vhuraru wa muvhuso wa Jehoyakimu khosi ya Juda, Nebukhadnetsara khosi ya Babele a ya Jerusalema a u govhela.

² Muṋe washu a mu kumedza Jehoyakimu khosi ya Juda khathihi na iṅwe thundu ya thembele ya Mudzimu. A dzi hwala a dzi isa shangoni ḽa Shinari, a vhea iyo midzio mikhethwa thembeleni ya midzimu yawe hune ha khokhwa lupfumo.

³ Ndi hone khosi i tshi vhudza Ashphenasi, ḽone gota ḽawe ḽihulwane, uri a nange vhaṅwe vhaṱhanngana vha Vhaisraele vhane vha bva muṱani wa musanda kana vhana vha vhaḓivhalea,

⁴ vhaṱhanngana vha si vhahoṱa, vho nakaho, vha no kona u ṱalukanya zwa vhuṱali hoṱhe, vha re na nḓivho, vhane vha ṱavhanya u ṱalukanya, vho fanelaho u shuma pfamoni ya musanda. Uyo Ashphenasi a dovha a pfi a vha funze luambo lwa Vhakhaladia na maṅwalo avho.

⁵ Khosi ya ri vha ṋewe zwiḽiwa zwa nga misi na waini zwi bvaho ḓafulani ḽa musanda. Ha pfi vha aluswe vha funzwe hu vhuye hu fhele miṅwaha miraru, vhó no fhedza vha konou dzhena mushumoni wa musanda.

⁶ Vhukati havho ho vha hu na Daniele na Hanania na Mishaele na Azaria; vhenevho vho vha vhe vha tsinde ḽa Juda.

⁷ Iḽo gota ḽa vha ira maṅwe madzina, Daniele a pfi Beletheshatsara, Hanania a pfi Shadraka, Mishaele a pfi Mishaka, Azaria a pfi Abedenego.

⁸ Daniele o vha o vhofha ḽa uri ha nga ḓishati tshika nga zwiḽiwa na waini zwi bvaho ḓafulani ḽa musanda, ndi zwe a humbela iḽo gota ḽihulwane uri a ḓiilise zwone.

⁹ Mudzimu a ita uri iḽo gota ḽihulwane ḽi itele Daniele vhuthu ḽi mu khathutshele.

¹⁰ Hone a vhudza Daniele a ri, “Ndi ofha khosi muṋe wanga: o amba zwine na fanela u zwi ḽa na zwine na fanela u zwi nwa, zwino arali a vhona khofheni haṋu ho onda hu sa ngi ha vhaṅwe vhaṱhanngana vha murole waṋu? Khosi i ḓo ntumula ṱhoho nga mulandu waṋu.”

¹¹ Daniele a tshi pfa zwenezwo a amba na mulindi we gota ḽihulwane ḽa ri a lange Daniele na Hanania na Mishaele na Azaria, a ri,

¹² “A vha ri lingi zwavho maḓuvha a fumi, maḓuvha eneo vha ri fhe muroho na maḓi fhedzi tshi vhe tshone tshiḽiwa tshashu?

¹³ Ndi hone vha tshi ḓo kona u vhambedza khofheni hashu na ha vhaṱhanngana vhane vha ḽa zwiḽiwa zwa musanda, vha ḓo konou ita nga hune vha vhona.”

¹⁴ Uyo munna a tenda u ita zwe vha mu humbela, a vha linga maḓuvha a fumi.

¹⁵ Musi maḓuvha a fumi o no fhela vha sedzea vho takala u fhira vhaṱhanngana vhoṱhe vhe vha vha vha tshi ḽa zwi bvaho ḓafulani ḽa musanda.

¹⁶ Ndi hone mulindi a si tsha vha ṋea zwiḽiwa zwe vha pfi vha ṋewe na waini ye vha pfi vha i nwe, a vha ṋea miroho.

¹⁷ Avho vhaṱhanngana vhaṋa Mudzimu a vha ṋea nḓivho na ṱhalukanyo ya zwoṱhe zwa maṅwalwa na zwa vhuṱali, Daniele a dovha a ṋewa na mpho ya u kona u ṱalutshedza mabono oṱhe na miloro.

¹⁸ Musi tshifhinga tsho vhewaho nga khosi tsho no fhela, gota ḽihulwane ḽa vha isa ha Nebukhadnetsara.

¹⁹ Khosi ya amba navho, a wana kha vhaṱhanngana vhoṱhe hu si na ane a nga eḓanyiswa na Daniele na Hanania na Mishaele na Azaria. U bva zwenezwo vha shumela khosi musanda.

²⁰ Kha mafhungo oṱhe a zwa vhuṱali na zwa ṱhalukanyo zwe a vha a tshi vha vhudzisa o wana vha tshi fhira vhadziamanditi na vhabvumbi vha re muvhusoni wawe woṱhe kafumi.

²¹ Daniele o dzula henefho u swika ṅwaha wa u thoma wa muvhuso wa khosi Khoreshe.