AMUSI 9 - BIVHILI KHETHWA Mafhungo Madifha

Bono ḽa u fhedzisa: A hu na ane a ḓo ponyoka khaṱhulo

¹ Ndo vhona Muṋe washu o ima tsini ha aḽiṱari, a ri, “Irwa ṱhodzi dza phuphu, thembele i dzinginyee u swika kha zwiukhuvha, ṱhanga i we i tsike vhathu vhoṱhe. “Vha salaho ndi ḓo vha vhulaha nga pfumo; a hu na a no ḓo shavha, a hu na a no ḓo ponyoka.

² Naho vha tsela vhudzulavhafu, tshanḓa tshanga tshi ḓo swika tsha vha kokodza; naho vha gonya makole ndi ḓo vha vhofha vhe henefho nda vha vhuisa fhasi;

³ nangwe vha dzumbama nṱha ha thavha ya Kharamele, ndi ḓo vha zwima nda vha fara; nangwe vha nnzumbama fhasi ha lwanzhe, henefho ndi ḓo vhudza ḽiṋowa ḽa lwanzhe uri ḽi vha lume;

⁴ nangwe vha khadiwa nga maswina avho a vha isa vhuthubwani, henefho ndi ḓo vhudza pfumo uri ḽi vha vhulahe; ndo ḓiimisela u vha huvhadza, a thi nga vha tondi.”

Musiki na Muhaṱuli

⁵ Muṋe wa zwoṱhe Muṋe washu Mulangazwoṱhe ndi Ene ane a ri u kwama ḽifhasi ḽa ṋoka, vhoṱhe vha dzulaho khaḽo vha lila, shango ḽoṱhe ḽa takuwa unga mulambo wa Nile, ḽa tsa fhasi unga mulambo wa Egipita.

⁶ Muṋe washu u fhaṱa pfamo yawe nṱha makoleni, a tea miteo yayo fhano fhasi; u vhidza maḓi a lwanzhe a a tevhulela shangoni. U pfi Yahavee.

Vhaisraele a vha fhiri dziṅwe tshakha

⁷ Muṋe washu u ri, “Inwi Vhaisraele, a thi vhoni ni tshi fana na Vhakushu kani? Ndi zwone, Vhaisraele ndo vha pfulusa Egipita, huno Vhafilista a tho ngo vha pfulusa Khrita naa? Vhaaramu a tho ngo vha pfulusa Kiri?

⁸ Vhukuma maṱo a Nṋe Muṋe wa zwoṱhe Yahavee a dzula o sedza muvhuso uyu muvhi; ndi ḓo phusukanya Israele wa si tsha vha hone fhano fhasi. Hone a thi nga lozwi tshoṱhe muṱa wa Jakopo.” Hu amba Muṋe washu.

⁹ “Zwino ndi ḓo ṋea ndaela, nda dzinginyisa vhathu vha Israele vhukati ha tshakha dzoṱhe unga mavhele a tshi sefiwa nga sefo matombo a sala sefoni na ḽithihi ḽa si fhire.

¹⁰ Vhavhi vhoṱhe vhukati ha vhathu vhanga vha ḓo fa nga pfumo – vhoṱhe vhane vha ri, ‘Yahavee a nga si tende khombo i tshi ri wela kana ra ṱangana nayo.’ ”

Vhaisraele vha ḓo vhumbwa nga huswa

¹¹ Muṋe washu u ri, “Musi wonoyo ndi ḓo dovha nda vusa nnḓu ya Dafita yo waho. Ndi ḓo thivha mitwe, nda vhumbelela matumba, nda dovha nda i fhaṱa ya nga zwiḽa kale.

¹² Vha ḓo dzhia zwo salaho zwa Edomo zwa vha zwavho, na tshakha dzoṱhe dze dza vhuya dza pfi ndi dzanga.” Hu amba Muṋe washu; zwithu hezwo u ḓo zwi ita.

¹³ Muṋe washu u ri, “Hu khou ḓa tshifhinga tshine ha ḓo ri u kaṋiwa ha mbo ḓi limiwa, ha ḓo ri u ṱavhiwa minḓirivhe ha mbo ḓi sukiwa nḓirivhe; thavha dzi ḓo rothisa waini ya tuvhu, ya ela i tshi bva zwivhangani zwoṱhe.

¹⁴ Ndi ḓo ita uri zwi dovhe zwi nakele vhathu vhanga vha Israele; vha ḓo dovha vha vusa matumba vha dzula khao; vha ḓo ṱavha minḓirivhe vha nwa waini yayo; vha ḓo lima masimu vha ḽa zwe vha lima.

¹⁵ Ndi ḓo ṱokisa Vhaisraele midzi shangoni ḽavho; a vha tsha ḓo dovha vha tupulwa, shangoni ḽe nda vha ṋea.” Hu amba Muṋe washu Mudzimu waṋu.