AMUSI 8 - BIVHILI KHETHWA Mafhungo Madifha

Bono ḽa tshirundu tsha mitshelo

¹ Zwiṅwe zwe nda sumbedzwa nga Muṋe wa zwoṱhe Muṋe washu khezwi: Ndo vhona tshirundu tsho fara mitshelo yo vhibvaho.

² Muṋe washu a vhudzisa a ri, “Amusi, u khou vhona mini?” Nṋe nda fhindula nda ri, “Ndi khou vhona tshirundu tsho fara mitshelo yo vhibvaho.” Ndi hone Muṋe washu a tshi mmbudza a ri, “Tshifhinga tsho swika tsha uri vhathu vhanga vha Israele vha lozwiwe, a thi tsha ḓo litsha u vha rwela vhutshinyi havho.”

³ Muṋe washu Muṋe wa zwoṱhe u ri, “Musi wonoyo vhasidzana vha no imba pfamoni ya khosi vha vho ḓo imba zwililo fhedzi. Hoṱhe-hoṱhe hu ḓo poswa zwitumbu zwi sa zwiṱwi.”

Vhuvhi ha u kandeledza vhashai na vhufhura

⁴ Thetshelesani, inwi ni no kandekanya vhaheḓana, na linga u lozwa vhashai shangoni!

⁵ Ni ri, “Ṅwedzi muswa u ḓo fa lini ra rengisa mavhele ashu? Sabatha i ḓo fhela lini ra rengisa goroi yashu? Ri ḓo konou tsisela mielo fhasi, ra gonyisa mutengo, ra fhura nga zwikalo zwi si zwa ngoho,

⁶ ra rengisa na maswielelo a goroi, ra konou renga mushai nga tshelede, muheḓana ra mu renga nga mutengo wa navhula.”

⁷ Muṋe washu o ana nga Ene muṋe, Ene ane vhana vha Jakopo vha mu zuwa, u ri, “A thi nga hangwi na tshithihi tshe vha ita.

⁸ Ndi zwine shango ḽa ḓo dzinginyea, vhoṱhe vha dzulaho khaḽo vha lila. Shango ḽoṱhe ḽi ḓo takuwa unga mulambo wa Nile, ḽi ḓo takuwa ḽa tsa unga mulambo wa Egipita.”

Ḓuvha ḽa khaṱhulo: Ipfi ḽa Mudzimu a ḽi tsha ḓo pfala

⁹ Muṋe wa zwoṱhe Muṋe washu u ri, “Musi wonoyo ndi ḓo kovhedza ḓuvha nga maṱavhelo, nda zwifhadza ḽifhasi masiari tshivhangalala.

¹⁰ Vhuṱambo haṋu ha vhurereleli ndi ḓo vhu shandula nda ita uri ni lile, nyimbo dzaṋu dzoṱhe dza vha zwililo; ndi ḓo ita uri noṱhe ni ambare madzanganda, ni lile no tou palula ṱhoho. Ni ḓo lila unga vho felwaho nga ṅwana wavho muthihi fhedzi; ḽi ḓo kovhela ḽa ni sia ni tshi kha ḓi lila lu ṱungufhadzaho.”

¹¹ Muṋe wa zwoṱhe Muṋe washu u ri, “Hu khou ḓa misi ine nda ḓo ḓisa nḓala shangoni. A thi ambi nḓala ya zwiḽiwa kana ḓora ḽa maḓi, ndi amba nḓala ya u pfa maipfi anga.

¹² Vha ḓo tendeleka vha tshi bva kha luno lwanzhe vha tshi ya kha luṅwe, vha livha devhula vha rembulutshela vhubvaḓuvha vha tshi ṱoḓa ipfi ḽanga; hone vha si ḽi wane.

¹³ Musi wonoyo vhasidzana vha tamisaho na vhaṱhannga vha u khwaṱha vha ḓo ṋoka nga ḓora.

¹⁴ Vhane vha ana nga midzimu i shonisaho ya Samaria kana vha ri, ‘Dani, nga vhutshilo ha mudzimu wau’, kana vha ri, ‘Nga nḓila i tselaho Bierisheba’, vhenevho vha ḓo wa vha si tsha vuwa.”