AMUSI 6 - BIVHILI KHETHWA Mafhungo Madifha

Vhuvhi ha vhaḓivhalea vha Israele

¹ Ni ḓo zwi vhona inwi no dzulaho nga mulalo Tsioni, na inwi ni no khou pfa no tsireledzea thavhani ya Samaria, inwi vhaḓivhalea vha lushaka lu na bvumo vhane vhathu vha ḓi ṱoḓa u fariswa nga inwi!

² Ni ri, “Farani lwendo ni ye muḓini wa Khalane ni vhone, u bva afho ni humele Hamathi muḓi muhulu, ni konou tsela Gathi kha ḽa Filista: kani iyo miḓi i fhira mivhuso ino yashu? Mashango ashu a fhira avho naa?”

³ A ni tendi u pfa zwa musi wa khombo, ngeno ni tshi khou u ṱuledzela nga zwiito zwaṋu uri ni vhusiwe nga vhathu vha tshiṱuhu.

⁴ Ni lalela mimbeteni yo ṱamiwaho nga ṋanga dza nḓou, na navha kha zwidzulo zwa vhukimvi. Tshiswiṱulo tshaṋu ndi ṋama ya nngu na ya ṋamana dzo noniswaho.

⁵ Ni ṱwa ni tshi sika nyimbo nga zwilidzo, na lidza haripa zwa nga ndi Dafita;

⁶ ni ṱwa ni tshi kelwa waini nga khavho khulu, na ḓola zwiḓolo zwa mutengo muhulu, hone muṱa wa Josefa u tshi lovha a zwi ni dini;

⁷ zwenezwo vhathu vha tshi thubiwa inwi ni ḓo hwalwa na vha u ranga, zwa vhuṱambo haṋu na zwa u ḓiphiṋa zwi ḓo fhela.

U phusukanywa ha Samaria

⁸ Muṋe wa zwoṱhe Muṋe washu o ana nga Ene muṋe, Muṋe washu Mudzimu Mulangazwoṱhe u ri, “Ndi nengwa u ḓihudza ha vhana vha Jakopo, ndi vhenga pfamo dzavho; musanda wavho ndi ḓo u kumedza maswina na zwoṱhe zwi re khawo.”

⁹ Arali muṱani ho sala vhathu vha fumi, na vhone vha ḓo fa.

¹⁰ Arali shaka ḽine ḽa fanela u fhisa izwo zwitumbu ḽa ri ḽi tshi ḓa u zwi bvisa nḓuni ḽa vhudzisa muṅwe ane a kha ḓi vha o dzumbama henefho ḽa ri, “Wo sala na muṅwe naa?” uyo a ri, “Ndi ndoṱhe,” zwenezwo shaka ḽi ḓo fhindula ḽa ri, “Tshete! Ri songo ḓiengedzela khombo nga u bula dzina ḽa Muṋe washu.”

¹¹ Muṋe washu o ṋea ndaela, u ḓo pwashekanya nnḓu khulu, nnḓu ṱhukhu ya tou fuḓekana.

Ṱhamu ya vhathu vhavhi vha u ḓihudza

¹² Bere dzi a gada makwarani naa? Lwanzhe lu a limiwa nga phulu? Hone inwi no shandula zwi re zwone zwa vha mulimo, na shandula mutshelo wa u ita zwivhuya wa vho kalakata.

¹³ Ni zuwa zwe na thuba muḓi wa Lodebara, na ri, “A ro ngo dzhia Karanaimi nga nungo dzashu?”

¹⁴ Muṋe washu Mudzimu Ramaanḓaoṱhe u ri, “Inwi vhathu vha Israele, ndi ḓo ritha luṅwe lushaka lwa ḓa u lwa na inwi. Vha ḓo ni kandeledza shangoni ḽaṋu ḽoṱhe u bva Pharani ya Hamathi thungo ya devhula u swika Govhani ḽa Araba thungo ya tshipembe.”