AMUSI 5 - BIVHILI KHETHWA Mafhungo Madifha

Tshililo tsha u lilela Israele

¹ A Inwi Vhaisraele, thetshelesani maipfi haya, ndi luimbo lwa u lilela lufu lwaṋu, lu ri:

² Musidzana Israele o vhulawa, ha tsha do vuwa! Ngouḽa o kudzwa mavuni a shango ḽa hawe, a hu na ane a mu vusa.

³ B Muṋe wa zwoṱhe Muṋe washu u ri, “Muḓi we wa vha u tshi bva pfumo u na vhahali vha tshigidi, u ḓo sala u na ḓana fhedzi, we wa vha u tshi bva na ḓana u ḓo sala na fumi fhedzi. Zwi ḓo ralo kha ḽa Israele.”

⁴ Muṋe washu a tshi amba na Vhaisraele, u ri, C “Ṱoḓani Nṋe ni sa ḓo fa.

⁵ D Ni songo ṱoḓa u fariswa Bethele, E ni songo ya Giligala, F ni songo fara lwendo na ya Bierisheba; G vha Giligala vha ḓo iswa vhuthubwani, D Bethele hu ḓo phusukanywa ha sala hu si na tshithu.”

⁶ C Ṱoḓani Muṋe washu, ndi hone ni tshi ḓo tshila; D na sa ralo u ḓo fhedza vha muṱa wa Josefa unga mulilo u tshi fhisa. U ḓo fhedza Bethele wa swa, ha si vhe na a no u dzima.

⁷ E2 Ni ḓo zwi vhona inwi, vhane na shandula zwi re zwone na zwi ita zwi kalakataho, na dzhia u fulufhedzea na hu laṱa kule.

⁸ F2 Hu amba Ene we a vhumba Tshilimela na Ṱhuḓa, u shandula swiswi ḽa vha mapfuvhi, u vhidza maḓi a lwanzhe a a shululela shangoni. G U pfi Yahavee.

⁹ F2 U phusukanya hu re na thikho, muḓi u re na mutsheṱo a u ita matumba.

¹⁰ E2 Ni vhenga ane a ṱanziela zwa ngoho tsengoni, na nyadza ane a amba ngoho.

¹¹ Ni kandekanya mushai na mu kombetshedza uri a ni ṋee mavhele. D Ndi zwine naho no fhaṱa nnḓu dza matombo o vhaḓiwaho na si ḓo dzula khadzo; naho no lima masimu a u naka a minḓirivhe a ni nga nwi waini yao.

¹² Ndi a ḓivha uri no tshinya kangana na uri vhutshinyi haṋu ndi vhungafhani. Ni kandeledza vhavhuya na ṱanganedza tshanḓanguvhoni, na kundisa vhashai u wana zwo vha fanelaho tsengoni.

¹³ Ndi zwine o thanyaho a sokou ḓifhumulela misi yo raloho, ngauri ndi misi mivhi.

¹⁴ C Ṱoḓani zwivhuya, zwi si zwo vhifhaho, ni sa ḓo fa, ndi hone Muṋe washu Mudzimu Mulangazwoṱhe a tshi ḓo vha na inwi unga ni tshi ri u na inwi.

¹⁵ Vhengani vhuvhi; funani zwivhuya; ni vhone uri tsengoni hu vhe na khaṱhulo mbuya; B khamusi Muṋe washu Mudzimu Mulangazwoṱhe a nga khathutshela tsalela dza Josefa.

¹⁶ A Zwino-ha, Muṋe washu Muṋe wa zwoṱhe Mudzimu Mulangazwoṱhe u ri, “Hu ḓo pfala u honḓa mikotoni yoṱhe; hu ḓo pfala tshililo tsha u lilela vhafu hoṱhe hune vhathu vha kuvhangana hone. Na vhalimi vha ḓo vhidzwa uri vha ḓe vha lile, vhomakone vha u lila vha ḓo vhidzwa uri vha ḓe vha honḓe.

¹⁷ Hu ḓo pfala u honḓa masimuni oṱhe a minḓirivhe, ngauri Nṋe ndi ḓo fhira vhukati haṋu.” Muṋe washu u ralo.

U takala ha Vhaisraele ndi u ḓifhura

¹⁸ Ni ḓo zwi vhona inwi no lavhelelaho ḓuvha ḽa Muṋe washu! Ndi mini ni tshi lavhelela ḓuvha ḽa Muṋe washu? Ḽi nga si vhe ḽa tshedza, ḽi ḓo vha ḽa swiswi.

¹⁹ Zwi ḓo nga muthu a tshi ponyoka mulomoni wa ndau, a mbo ṱangana na biara, a shavha a dzhena nḓuni a ḓitika nga luvhondo, a mbo ḓi luṅwa nga ṋowa.

²⁰ Nga u ralo ḓuvha ḽa Muṋe washu a ḽi nga vhi ḽa tshedza ḽi ḓo vha ḽa swiswi; a ni nga vhoni ḓuvha ḽi tshi tsha, hu ḓo swifhala he nzwii!

Vhurereleli vhu sa farisi tshithu

²¹ Muṋe washu u ri, “Vhuṱambo haṋu ha u rerelela ndi a vhu vhenga, ndo vhu nengwa, a thi koni u konḓelela khuvhangano dzaṋu;

²² nangwe na nnḓisela zwiṱhavhelo zwi fhiswaho na nduvho dza mbeu, ndi nga si zwi ṱanganedze; naho na nṋekedza tshiṱhavhelo tsha kholomo dzo noniswaho dzine na ḓo ḽa thembeleni, a thi nga tshi londi.

²³ Ni songo tsha mphunga nga nyimbo dzaṋu! A thi tsha ḓo thetshelesa nyimbo dza haripa dzaṋu.

²⁴ Hone itani zwi re zwone zwi tou ela sa maḓi, u fulufhedzea haṋu hu nge mulambo u sa xi!

²⁵ “Inwi vhathu vha Israele, no vhuya na nṋekedza zwiṱhavhelo na nduvho ngei phangani miṅwaha yoṱhe iḽa ya mahumi maṋa naa?

²⁶ Zwino no no ḓiitela Sakuthu khosi yaṋu na Kaiwani mudzimu waṋu wa ṋaledzi; ndi zwone, ni ḓo hwala zwifanyisa zwayo

²⁷ musi ndi tshi ḓo ni isa vhuthubwani kule hangei phanḓa ha Damasko.” Hu amba Muṋe washu ane a pfi Mudzimu Mulangazwoṱhe.