AMUSI 4 - BIVHILI KHETHWA Mafhungo Madifha

Maipfi a u kaidza vhafumakadzi vha vhapfumi

¹ Thetshelesani fhungo heḽi inwi vhafumakadzi ni dzulaho thavhani ya Samaria no leṅwaho unga kholomo dza Bashani, inwi ni kandeledzaho vhashai, na kuekanya vhaheḓana na vhudza vhanna vhaṋu na ri, “Ri ḓiseleni halwa!”

² Muṋe wa zwoṱhe Muṋe washu o ana nga vhukhethwa hawe u ri, “Maḓuvha a khou ḓa ane na ḓo fashwa nga zwilazwulo na ṱuwiswa, na hohiwa nga zwihuka hu si sale na muthihi.

³ Muṅwe na muṅwe waṋu u ḓo bva nga he mutsheṱo wa piḓimulwa ho livhanaho na nnḓu yawe, na khadelwa thungo dza Heremoni.”

Vhaisraele vhadziatshipimbi

⁴ Muṋe wa zwoṱhe Muṋe washu u ri, “Iḓani zwaṋu Bethele ni ite vhuvhi; iyani zwaṋu Giligala ni phaphe mbulu kha iṅwe; ṋekedzani zwaṋu zwiṱhavhelo matsheloni maṅwe na maṅwe, hó fhela maḓuvha mavhili ni konou bvisa tshafumi;

⁵ fhisani zwaṋu vhurotho vhu na mbilisa ni vhu ṋekedze i vhe nduvho ya u livhuha; ṱongisani zwaṋu nduvho dzine na ṋekedza nga u tou funa, ni dzi ite tshipuliso, inwi Vhaisraele – hufha zwi zwone zwine na takalela.”

⁶ Muṋe washu u ri, “Ndi zwe nda ni shela nḓala miḓini yoṱhe, nda ni shaisa zwiḽiwa shangoni ḽoṱhe – ndi Nṋe we nda ita hezwo! Naho zwo ralo a no ngo vhuya kha Nṋe.”

⁷ Muṋe washu u ri, “Mavhele a tshi vho rumbuwa ndo fara mvula ya si tsha na; ndo nisa mvula muḓini muṅwe, kha muṅwe nda si nise; iṅwe tsimu yo wana mvula, iṅwe i si wane, ya oma.

⁸ Vhathu vho pepeleka nga ḓora vha tshi bva muḓini uno vha tshi ya kha uḽa vha tshi ṱoḓa maḓi a u nwa, hone vha si wane tsha u dzimula ḓora. Naho zwo ralo a no ngo vhuya kha Nṋe.”

⁹ Muṋe washu u ri, “Ndo ni rwa nga u fhedza mavhele nga gomelelo na done, nda putisa zwikovha zwaṋu na masimu aṋu a minḓirivhe, mihuyu na miolivi yaṋu ya fhedzwa nga magerere. Naho zwo ralo a no ngo vhuya kha Nṋe.”

¹⁰ Muṋe washu u ri, “Ndo ni ḓisela dwadze sa zwe nda ita ngei Egipita; ndo vhulaha vhaṱhannga vhaṋu nga pfumo, bere dzaṋu dza thubwa nga maswina, nda ni nukhisela zwitumbu zwa vho faho mishashani yaṋu. Naho zwo ralo a no ngo vhuya kha Nṋe.”

¹¹ Muṋe washu u ri, “Ndo phusukanya miḓi sa zwe nda phusukanya Sodoma na Gomora, inwi na nga tshikuni tsho fungulwaho muliloni tsho no duga. Naho zwo ralo a no ngo vhuya kha Nṋe.

¹² Zwino-ha, inwi vhathu vha Israele, ndi ḓo ni rwa na zwi pfa! Vhunga ndi tshi ḓo ni ita nga u ralo, inwi Vhaisraele, ḓilugiseni ni yo ṱangana na Mudzimu waṋu Muhaṱuli!”

Maanḓa a Mudzimu a u sika zwihulwane

¹³ O vhumba dzithavha, a sika muya; u dzumbululela vhathu mihumbulo yawe, u tswukisa mapfuvhi a ḓisa swiswi, a kanda miṱumbani ya thavha dza ḽifhasi; dzina ḽawe ndi Yahavee Mudzimu Mulangazwoṱhe.