AMUSI 2 - BIVHILI KHETHWA Mafhungo Madifha

Muaba

¹ Muṋe washu u ri, “Vha Muaba vho tshinya vha dovha; vho fhisa marambo a khosi ya Edomo vha ita phemba ngao; zwenezwo a thi nga litshi u vha rwa;

² shango ḽa Muaba ndi ḓo ḽi funga nga mulilo wa fhisa madzhavhelo a Keriotho; vha Muaba vha ḓo fa hó ṱangana mikosi ya nndwa hu tshi lila phalaphala.

³ Ndi ḓo lozwa muvhusi wa Muaba, nda vhulaha na magota awe oṱhe vha fa nae.” U ralo Muṋe washu.

Juda

⁴ Muṋe washu u ri, “Vha Juda vho tshinya vha dovha; vho landula ndayo ya Nṋe Yahavee, vha si vhulunge ndaela dzanga; vho xedzwa nga midzimu yavho ya vhufhura, yeneiḽa ye na vhokhotsi avho vha vha vha tshi i luvha; zwenezwo a thi nga litshi u vha lifhedza;

⁵ shango ḽa Juda ndi ḓo ḽi funga nga mulilo wa fhisa madzhavhelo a Jerusalema.”

Vhaisraele vhone vhaṋe-ha?

^6-8 Muṋe washu u ri, “Vhaisraele vho tshinya vha dovha; muvhuya a no kundwa u lifha mangwendenyana vho mu rengisa a vha phuli, mushai vha mu rengisa nga u kundwa u lifha mulandu wa navhula; vha kandekanya ṱhoho dza vhaheḓana zwa nga vha tshi kandekanya mavu; vha dzivhisa vha kandeledzwaho vha tshi wana zwo vha fanelaho; khotsi na ṅwana vha ita vhupombwe na musidzana muthihi, u ralo ha vha u shata dzina ḽanga ḽikhethwa tshika; aḽiṱarini iṅwe na iṅwe vha eḓela kha nguvho dze vha farela milandu, thembeleni yavho vha nwa waini yo lifhaho milandu; zwenezwo a thi nga litshi u vha lifhedza.

⁹ “Ndi Nṋe we nda ni pfulusa Egipita nda ni endedza phangani miṅwaha ya mahumi maṋa, nda vhuya nda ni ṋea shango ḽa Vhaamori.

¹⁰ Vho vha vho lapfa unga mikedara, vho khwaṱha unga midzwiri, hone inwi ni tshi swika ndo vha lozwa nda vha tupula na midzi yavho.

¹¹ Ndo dovha nda ita vhaṅwe vhana vhaṋu vhaporofita, vhaṅwe vhana vhaṋu vha vhatuka nda vha ilisa waini vha vha vhanaziri. Vhukumakuma a zwo ngo ralo naa, inwi Vhaisraele?” Hu khou vhudzisa Muṋe washu!

¹² “Hone inwi no nwisa vhanaziri waini, vhaporofita na vha dzivhisa u ni vhudza ipfi ḽanga.

¹³ Zwino-ha, ndi ḓo ni phirimedza unga goloi yo hwalesaho mavhele i tshi phirimela.

¹⁴ Na wa luvhilo a nga si ponyoke musi wonoyo, wa nungo u ḓo wana nungo dzawe dzi si na mushumo, na muhali a nga si ḓitshidze;

¹⁵ o faraho vhura a nga si ime, na wa luvhilo a nga si ponyoke a shavha, munameli wa bere a nga si ḓitshidze;

¹⁶ vhahali vha ḓo laṱa zwihali vha shavha.” U ralo Muṋe washu.