AMUSI 1 - BIVHILI KHETHWA Mafhungo Madifha

¹ Haya ndi maipfi a Amusi, muṅwe wa vhafuwi vha nngu vha Thekua. O amba zwe Muṋe washu a mu dzumbululela zwó livha Israele musi hu tshee ho sala miṅwaha mivhili hu tshi ḓo ḓa mudzinginyo muhulu wa shango, musi Uzia e khosi ya Juda, Jerobiamu ṅwana wa Juasi e khosi ya Israele.

Maanḓa a Mudzimu a u rwa vhatshinyi

² Muṋe washu u vhomba e Tsioni, ipfi ḽawe ḽi bvuma e Jerusalema, pfulo ya vhalisa ya oma, ḓaka ḽa muṱumba wa Kharamele ḽa puta.

Mulandu wa Israele u fhira wa tshakha dzoṱhe Aramu

³ Muṋe washu u ri, “Vha Damasko vho tshinya vha dovha: vho itela vhathu vha Giliadi tshiṱuhu tshihulu, zwa nga vho vha lima miṱana nga malembe a tsimbi; zwenezwo a thi nga litshi u vha lifhedza;

⁴ pfamo ya khosi Hazaele ndi ḓo i funga nga mulilo wa fhisa vhushavhelo ha khosi Beni Hadada.

⁵ Ndi ḓo vunḓekanya tswinga dza Damasko, nda lozwa khosi ya Govha ḽa Vhuvhi na o faraho luḓo lwa vhuhosi Muḓini wa u ḓiphiṋa. Vhathu vha Aramu vha ḓo hwalwa vha iswa vhuthubwani ngei Kiri hune vha bva hone.” U ralo Muṋe washu.

Filista

⁶ Muṋe washu u ri, “Vha Gaza vho tshinya vha dovha: vho thuba miḓi vha si sie na muthu, vha vha rengisela Vhaedomo vha vha dziphuli; zwenezwo a thi nga litshi u vha lifhedza;

⁷ mitsheṱo ya Gaza ndi ḓo i funga nga mulilo wa fhisa madzhavhelo avho,

⁸ nda lozwa khosi ya Ashidodo na o faraho luḓo lwa vhuhosi Ashkeloni. Ndi ḓo angaladza tshanḓa tshanga nda rwa vhathu vha muḓi wa Ekroni nda lozwa Vhafilista hu si sale na muthihi.” U ralo Muṋe wa zwoṱhe Muṋe washu.

Tiro

⁹ Muṋe washu u ri, “Vha Tiro vho tshinya vha dovha; vho thuba miḓi vha si sie na muthu, vha vha rengisela Vhaedomo sa dziphuli, vha si tsha londa mulanga wa vhukonani we vha vhofha; zwenezwo a thi nga litshi u vha lifhedza;

¹⁰ mitsheṱo ya Tiro ndi ḓo i funga nga mulilo wa fhisa madzhavhelo avho.”

Edomo

¹¹ Muṋe washu u ri, “Vhaedomo vho tshinya vha dovha; vho pandamedza Vhaisraele vharathu vhavho nga pfumo vha si vhuye vha vha khathutshela; vho vha ponda vho sinyuwa vha dovha, mbiti dzavho dza si vhuya dza dzika; zwenezwo a thi nga litshi u vha lifhedza;

¹² muḓi wa Themani ndi ḓo u funga nga mulilo wa fhisa na madzhavhelo a Bosora.”

Amoni

¹³ Muṋe washu u ri, “Vhaamoni vho tshinya vha dovha; vho fhandula vhasadzi vha Giliadi vho vhifhaho muvhilini vha tshi ṱoḓa u engedzedza shango ḽavho; zwenezwo a thi nga litshi u vha lifhedza;

¹⁴ mitsheṱo ya Raba ndi ḓo i funga nga mulilo wa fhisa vhushavhelo havho; musi wonoyo hu ḓo pfala mukosi wa nndwa, nndwa ya thutha miḓi unga tshiḓumbumukwe;

¹⁵ khosi yavho i ḓo hwalwa ya iswa vhuthubwani, ene khathihi na magota awe.” U ralo Muṋe washu.