2 VHAKORINTA 8 - BIVHILI KHETHWA Mafhungo Madifha

Zwifhiwa zwinzhi zwa zwivhidzo zwa Makedonia

¹ Vha hashu, ri ni ḓivhadza vhuthu he Mudzimu a dzhenisa mbiluni dza zwivhidzo zwa Makedonia.

² Vho tambudzwa zwinzhi vha sala vhe vhashai vha ṱungufhadzaho; naho zwo ralo mbilu dzavho dza ḓi tou fhufhuma dakalo, vha kuvhanganyela zwiṅwe zwivhidzo zwifhiwa zwi si na vhukono, nga mbilu tshena.

³ Nṋe ndi a vha ṱanziela ndi ri: vho bvisa nga he vha kona vha ita na u fhirisa henefho, hu si na a vha kombetshedzaho.

⁴ Vho ri humbela vha ita na u ri rabeledza uri ri vha tendele u kovhekana thundu dzavho na vhaṅwe vhathu vha Mudzimu.

⁵ Vha si ite zwe ra vha ro lavhelela fhedzi, vha tou thoma nga u ḓiṋekedza kha Muṋe washu, vha dovha vha ḓiṋekedza na kha riṋe, zwi zwone zwine Mudzimu a funa.

⁶ Ndi zwe ra humbela Titosi uri a ni farise u khunyeledza mushumo hoyo wa vhuthu we na u thoma kale.

⁷ Vhunga no pfuma zwoṱhe – hu lutendo, ha ri u kona u amba, he nḓivho, he u fungelela nga mbiti, he u funwa nga riṋe, pfumani-ha na vhuthu ha u ita zwenezwo.

⁸ A thi khou ni vhetshela mulayo; ndi tshi ni sumbedza u fungelela ha vhaṅwe ndi u ṱoḓa u vhona fhedzi arali lufuno lwaṋu lu lwa ngoho.

⁹ Vhuthu ha Muṋe washu Yesu Khristo na inwi ni a vhu ḓivha: Naho o vha e mupfumi o vha mushai a tshi itela inwi, uri nga vhushai hawe inwi ni pfume.

¹⁰ Nyeletshedzo yanga ya u ni farisa kha haya mafhungo ngei: Vhunga vhe inwi vhe na thoma mushumo hoyo, na dovha na vha inwi vhe tsha mahoḽa na vha no ḓiimisela u zwi ita, zwiṅwe zwivhidzo zwi sa athu,

¹¹ zwino u ṱhaphudzeni-ha nga u ḓifunga honohuḽa ha musi ni tshi kha ḓi vhamba maano. Muṅwe na muṅwe a bvise nga he zwa mu anḓa.

¹² Tenda muthu a bvisa nga mbilu tshena kha zwenezwo zwine a vha nazwo, Mudzimu u a zwi takalela. Muthu ha koni u bvisa tshine a si vhe natsho.

¹³ A si uri ri khou ṱoḓa u leludzela vhaṅwe nga u lemedza inwi; tshashu ndi u ṱoḓa uri muhwalo u eḓane.

¹⁴ Hufha zwino ni na nḓalo; u fha vhaḽa vha si na ndi u fhahea; matshelo vhaḽa vhe na nḓalo-vho inwi ni si na, ni ḓo fhahulula. Ngauralo a hu tsha ḓo vha na u ḽeledzana.

¹⁵ Na Maṅwalo a ri, “We a kumbela mana manzhi ho ngo sia muladza; na we a kumbela a si gathi o ḓi ḽa a fura.”

U vhuelela ha Titosi Korinta

¹⁶ Ri livhuha hani Mudzimu we a ita uri Titosi a fungelele u ni farisa nga he riṋe ra ni farisa ngaho.

¹⁷ Ro ri u mu humbela uri a ḓe ha inwi a mbo ḓi pfa a tshi zwi takalela nga maanḓa, a tenda a fara lwendo a songo kombetshedzwa nga muthu.

¹⁸ Ri khou mu ruma na hoyo murathu washu ane zwivhidzo zwoṱhe zwa mu khoḓela u ḓinetisa hawe kha u ḓivhadza mafhungo maḓifha.

¹⁹ Hu si izwo fhedzi: na zwivhidzo zwa dovha zwa mu khetha uri a tshimbile na riṋe ri tshi khou ita mushumo hoyu wa vhuthu. Ri zwi itela uri Mudzimu a rendwe na u sumbedza uri ro ḓiimisela u farisa vhaṅwe.

²⁰ Nahone ró hwala tshelede nngafhangafha a ri funi u i fara nga nḓila ine ya solisea.

²¹ Tshine ra lila ndi u ita zwine Mudzimu khathihi na vhathu vha vhona zwo fanela.

²² Zwenezwo ri khou vha ruma na hoyo muṅwe murathu washu we ra mu vhona kanzhi uri a si mubva. Zwino-ha ngauri u a ni fulufhela zwingafhongafho o no tou ḓiṋekedza tshoṱhe.

²³ Titosi ene ndi mushumisani na nṋe kha u ni shumela; arali vhe avho vhaṅwe vha hashu, ndi vhaḓinḓa vha zwivhidzo vha itaho uri Khristo a rendwe nga kutshilele kwavho.

²⁴ Vha sumbedzeni uri ni a vha funa uri zwivhidzo zwoṱhe zwi vhone uri a ri zwifhi ri tshi ni khoḓa.