2 VHAKORINTA 6 - BIVHILI KHETHWA Mafhungo Madifha

¹ Vhunga ri vhashumisani na Mudzimu ri a ni ṱuṱuwedza ri ri: Ivhani na zwe na shumela Mudzimu, a sa vho ḓo nga o tambisa vhuthu hawe nga u ni tonda.

² Na Ene muṋe u ri, “Ndo pfa thabelo yau nga tshifhinga tsho fanelaho, ha swika ḓuvha ḽa u u tshidza nda mbo u phalala.” Tshino-ha ndi tshone tshifhinga tsho fanelaho; ḓuvha ḽa u tshidzwa ndi ḽeneḽino.

³ A ri funi mushumo washu wa vhuḓinḓa u tshi solisea, ndi zwine ra sa khukhulise na muthihi,

⁴ kha zwoṱhe ra ḓisumbedza ri vhaḓinḓa vha Mudzimu, nga u konḓelela u tambudzwa na vhuleme na zwi konḓaho ri sa fheli mbilu.

⁵ Ri a rwiwa, ra hoṋelwa dzhele, ra thathedzwa, ra shuma ra ḓinetisa, ra tshisa mitsho ri songo vhuya re vhukofhenyana zhambu, ra ṱwa na nḓala;

⁶ ri si vhe na vhukwila, rí na ṱhalukanyo, ri sa fheli mbilu, rí na vhulenda, zwi tshi bva kha Muya Mukhethwa, nga lufuno lu si lwa muhoyo,

⁷ ri tshi amba ipfi ḽa ngoho, nga maanḓa a Mudzimu. U ita zwo tiwaho nga Mudzimu ndi ḽone pfumo na tshiṱangu tshashu;

⁸ naho ra huliswa kana ra nyadzwa; naho ra iselwa phungo mmbi, kana mbuya; ra pfi ri zwifhela vhathu ngeno ri tshi fulufhedzea;

⁹ ra itwa vha sa ḓihwi ngeno ri tshi ḓihwa nga vhoṱhe; ra nga vha no khou fa ngeno ni tshi ri vhona ri tshi khou tshila; ra laiwa nga ṱhamu hone ri si lovhe;

¹⁰ ra ḽiswa mbilu ra ḓi dzula ro takala; ra nga vhashai ngeno ri tshi pfumisa vhanzhi; ra nga ri si na tshashu ngeno ri na zwoṱhe.

¹¹ Inwi Vhakorinta vha hashu, ro amba na inwi ri sa dzumbi tshithu, ra tou ni swielela mbiluni dzashu.

¹² A si riṋe vhe ra thivhela nga u vala mbilu dzashu, ndi inwi vhaṋe vhe na ḓivalela nnḓa.

¹³ Zwino ndi amba na inwi sa mubebi waṋu ndi ri: vhunga ro ni swielela mbiluni dzashu, ri swieleleni-vho kha dzaṋu.

U ila tshihedeni

¹⁴ Ni songo kokodza nga dzhogo nthihi na vha si vhatendi. Muvhuya na muvhi vha nga pfana hani? Tshedza tshi na vhuthihi-ḓe na swiswi?

¹⁵ Khristo na Beliali vha nga anḓana nga ḽifhio? Ndi tshini tshine mutendi na a si mutendi vha nga konana ngatsho?

¹⁶ Nnḓu ya Mudzimu i nga tendelana hani na midzimu ya zwifanyiso? Ndi tshi ralo ndi uri riṋe ri Nnḓu ya Mudzimu a tshilaho. Na Mudzimu Ene muṋe o ri, “Ndi ḓo dzula navho, ra tshimbila roṱhe ndí Mudzimu wavho, vhone vhe lushaka lwanga.”

¹⁷ Ndi zwine Muṋe washu a dovha a ri, “Ibvani khavho, ni sa tsha vha vhathihi navho. Ni songo kwama zwo kumalaho.” “Ndi hone ndi tshi ḓo ni ṱanganedza,

¹⁸ nda vha Khotsi aṋu, inwi na vha vhana vhanga” – hu tshi amba Ene Muṋe washu Ramaanḓaoṱhe.