2 VHAKORINTA 3 - BIVHILI KHETHWA Mafhungo Madifha

Vhaḓinḓa vha mulanga muswa

¹ Kani-ha ri tshi ralo ndi u dovha u ḓiṱanziela? Kani riṋe ri nga vhaḽa vhaṅwe vhane vha lila maṅwalo a vhuṱanzi ane a nga vha swikisa kha inwi, kana a bvaho kha inwi?

² Aiwa, inwi vhaṋe ni luṅwalo lu ri ṱanzielaho, lwo ṅwalwaho mbiluni dzashu; vhathu vhoṱhe vha a lu vhala vha lu pfa.

³ Hufha zwi khagala uri inwi ni luṅwalo lwe Khristo a ri ri ṅwale! Lwone a lwo ngo ṅwalwa nga ennge, lwo ṅwalwa nga Muya wa Mudzimu a tshilaho; a lwo ngo ṅwalwa kha matombo, lwo ṅwalwa mbiluni dza vhathu.

⁴ Iḽi ndi ḽone fulufhelo ḽashu ḽa u fulufhela Mudzimu ḽe ra ḽi wana nga Khristo.

⁵ A si uri ri nga ḓifhima ra ri ri nga kona zwingafho nga nungo dzashu. Nungo dzashu dzi bva kha Mudzimu.

⁶ Ndi Ene we a ri konisa u vha vhaḓinḓa vha mulanga muswa wa Muya, u si wa mulayo wo ṅwalwaho. Mulayo wo ṅwalwaho nga maḽeḓere fhedzi u a vhulaha, ngeno Muya a tshi tshidza.

⁷ Mulayo uḽa wo ṅwalwaho kha matombo u a vhulaha; naho zwo ralo musi u tshi ḓiswa wo ḓa na lupenyo, lwe naho tshifhaṱuwo tsha Mushe tshi tshi ḓi fhungudzea u penya tshi tshi ya, Vhaisraele vha ḓi kundwa u mu lavhelesa.

⁸ Arali mulanga une wa vhulaha wo vha u na lupenyo lungafho, zwino lupenyo lwa mulanga wa Muya ndi lungafhani-ha?

⁹ Arali mulanga wa u haṱulela vhathu lufuni wo vha na lupenyo lungafho, mulanga wa u ri vhathu vha pfi vhavhuya, lupenyo lwawo lu ḓo vha lungafhani?

¹⁰ Lupenyo luḽa lwa kale a lu tsha nga lupenyo ngauri a lu vhuyi lwa vhambedzwa na lwa zwino.

¹¹ Zwino-ha arali zwa tshifhinganyana zwo vha na vhugala vhungafho, zwine zwa dzula zwi hone zwi ḓo vha na vhugala vhungafhani?

¹² Nge ra fulufhela u ḓo wana zwenezwo a ri tshee na nyofho;

¹³ a ri ngi Mushe we a khurumela tshifhaṱuwo uri Vhaisraele vha si vhone u penya hatsho hu tshi ḓi fhungudzea hu tshi ya.

¹⁴ Nangoho ha khurumela na mihumbulo ya Vhaisraele. Nazwino i tshee yo khurumedzwa nga lupila lwonoluḽa musi vha tshi vhala bugu dza mulanga mulala; a i athu khurumuwa, na ṋamusi, i khurumuwa fhedzi musi ri tshi vha vhathihi na Khristo.

¹⁵ Na ṋamusi musi vha tshi vhala bugu dza Mushe mbilu dzavho dzi tshee dzo khurumedzwa nga lupila.

¹⁶ Hone Maṅwalo a tshi amba Mushe a ri, “Musi a tshi livhana na Muṋe washu lupila ulwo lu a khurumuwa.”

¹⁷ Hu tshi pfi, “Muṋe washu” hu ambiwa “Muya”, hone hune Muya wa Muṋe washu a vha hone ri a vhofholowa.

¹⁸ Riṋe roṱhe ro no khurumuwa zwifhaṱuwo, ri vho tou vhona vhugala ha Muṋe washu. Ri ḓi shandukiswa ri tshi ya uri ri fane na Khristo, lupenyo lwashu lwa ḓi engedzea lu tshi ya, izwo zwi tshi itwa nga Muṋe washu, Ene Muya.