2 VHAKORINTA 2 - BIVHILI KHETHWA Mafhungo Madifha

¹ Ndi zwe nda vhona uri ndi khwiṋe ndi sa tsha ni dalela arali ndi tshi ḓela u ni ḽisa mbilu fhedzi.

² Nda ni ḽisa mbilu ndi kha ḓi ḓo takadzwa nga nnyi? Hufha vhenevho vhane vha ntakadza ndi tshi ḓo vha ndo no vha ḽisa mbilu.

³ Ndi zwe nda tou ṅwala luṅwalo, ndi sa tsha ḓa nga tsha vhukoma, uri ndi sa ḓo ri ndi tshi ḓa nda vho ḽiswa mbilu nga vhenevho vhe vha vha vho fanela u ntakadza. Nahone ndi na fulufhelo ḽa uri arali nṋe ndo takala, na inwi noṱhe ni pfa no takala.

⁴ Hezwi ndi tshi khou ṅwala ndo ṅwala mbilu yanga i tshi khou vhavha i tshi swa, ndi tshi khou tsengisa miṱodzi; ndi tshi ṅwala nga u ralo ndi sa iteli u ni ḽisa mbilu, ho vha hu u ṱoḓa u ni sumbedza uri a thi ni funi zwone.

U hangwela o khakhelaho Paulo

⁵ Huno-ha arali hu na we a ṱungufhadza muṅwe, naho ndi sa funi u kalula ndi nga ḓi ri ho ngo ṱungufadza nṋe, o ni ṱungufhadza noṱhe – hone ndi sa ḓo tou kalula litshani ndi ri: vhaṅwe vhaṋu.

⁶ Zwe vhunzhi haṋu na vhuya na kaidza onoyo muthu a zwo ngo eḓana naa?

⁷ Zwo ralo-ha, a si khwiṋe ni tshi mu hangwela na mu khuthadza naa, uri mbilu yawe i sa ḓo pwashekana tshoṱhe?

⁸ Ndi zwine nda tou ni humbela-vho nda ri: dovhani ni mu ṱanganedze nga lufuno.

⁹ Ndi tshi ni ṅwalela luḽa luṅwalo ho vha hu u ṱoḓa u vhona arali ni tshi fulufhedzea ní vha nthetshelesaho kha zwoṱhe.

¹⁰ Zwino-ha arali inwi no mu hangwela, na nṋe ndo no ḓi mu hangwela. Nahone arali hu na he nda vha ndo fanela u hangwela, ndo hangwela ndi tshi itela inwi, ndi tshi ḓivha uri Khristo u khou mmbona;

¹¹ ndo itela uri Saṱhane a sa ḓo ri kona, ngauri vhukwila hawe ri a vhu ḓivha.

U dinalea ha Paulo e Troasi

¹² Ndi tshi swika Troasi u ḓivhadza mafhungo maḓifha a Khristo, nda wana Muṋe washu o mmvulela miṋango yoṱhe.

¹³ Tshe tsha si nthudze mbilu ndi u sa ṱangana na murathu wanga Titosi henengei. Zwenezwo nda mbo ḓi onesa nda fara lwendo lwa u ya Makedonia.

U kunda nga dzina ḽa Khristo

¹⁴ Ri livhuha Mudzimu we a ri u kunda a ri vhidza, ra vho dzula ri tshi ḓala muḓalo nae nge ra vha vhathihi na Khristo. U anḓadza mafhungo a Khristo nga riṋe hoṱhe-hoṱhe sa zwioro zwi nukhelelaho.

¹⁵ Ri zwioro zwi nukhelelaho zwine Khristo a ṋekedza Mudzimu, zwa phaḓalala zwa swika kha vho faraho nḓila ya u tshidzwa na vho faraho ya u lovha.

¹⁶ Kha vhane vha khou lovha zwi nga munukho wa zwo faho une wa vhulaha, ngeno kha vhane vha khou tshidzwa zwi tshi nga munukho u ḓifhelelaho une wa tshidza. Ndi nnyi-ha zwino ane a nga kona zwingafho?

¹⁷ Hafhu riṋe a ri ngi vhaṅwe vhane vha enda vha tshi vhambadza ipfi ḽa Mudzimu vha bindula ngaḽo, tshashu ndi u ḽi amba ri si na vhufhura, sa vhaḓinḓa vha Mudzimu vha re vhathihi na Khristo, vhane vha amba Mudzimu a tshi zwi pfa.