2 TIMOTI 4 - BIVHILI KHETHWA Mafhungo Madifha

¹ Ṱhanzi dzanga ndi Mudzimu na Khristo Yesu ane a ḓo ḓa u haṱula vha tshilaho na vho faho. Ndi ni laya lwa u tou ana nga u ḓa hawe na muvhuso wawe ndi ri:

² ḓivhadzani mafhungo a Mudzimu, ni si vhuye na bva khazwo, arali tshifhinga tshi tshi tenda naho tshi sa tendi; vha sumbedzeni vhukhakhi havho, ni vha kaidze, ni vha khwaṱhise, ni tshi funza ni sa fheli mbilu.

³ Tshifhinga tshi a ḓa tshine vhathu vha si tsha ḓo takalela pfunzo kwayo; tshavho hu ḓo vha u kungwa nga nyemulo dzavho vha ḓikuvhanganyela vhafunzi vha si na mbalo vhane vha ḓo vha vhudza zwine zwa ḓo vha takadza fhedzi.

⁴ Vha ḓo konyolela matanda nḓevheni uri vha si pfe ngoho, vha londa zwa dzingano.

⁵ Hone inwi dzulani no dzivhuluwa tshifhinga tshoṱhe, ni konḓelele u tambula, ni shume mushumo wa muḓivhadzi wa mafhungo maḓifha; ni khunyeledze pfanelo dzaṋu.

⁶ A vha nṋe malofha anga a vho tevhulwa sa thevhula; tshifhinga tshanga tsha u sia vhathu ndi hone tsho swika.

⁷ Mbambe iyi ndo i fungelela nda i ṱhaphudza; lwa vha lutendo lwone ndi tshee nalwo.

⁸ Zwino tsho nndindelaho ndi muṅene une wa ṋewa vhavhuya. Ndi ḓo u ṋekedzwa nga Muṋe washu, Ene Muhaṱuli a sa ṱaluli, nga ḓuvha ḽine a ḓo vhuya ngaḽo. Nahone a hu nga ṋewi nṋe ndi ndoṱhe, hu ḓo ṋewa vhoṱhe vho mu lindelaho nga lufuno.

Ndaela

⁹ Ni lingedze nga nungo dzoṱhe u ṱavhanya u ḓa ngeno.

¹⁰ Demasi o no takadzwa nga zwa shango. O nṱutshela a livha Thesalonika. Khresentsi ene o ya Galata, Titosi a ya Dalmatia.

¹¹ We nda sala nae ndi Lukasi fhedzi. Ni tshi ḓa ni ḓe na Markosi; ndi ene ane a nga mpfarisa nga maanḓa kha mushumo wanga.

¹² Thikhikhosi ndo mu ruma Efesa.

¹³ Ni tshi ḓa ni ḓe na dzhasi ḽanga ḽe nda sia Troasi ḽi na Karposi; na bugu dzanga, zwihulwane dziḽa dza mukumba, ni songo dzi sia.

¹⁴ Alekzannda uḽa mufuli wa musina o nkhakhela zwihulu. Tenda Muṋe washu a tshi ḓo mu lifhedza.

¹⁵ Na inwi ni mu thanyele, ngauri pfunzo yashu o i hanedza nga maanḓa.

¹⁶ Ndi tshi sengiswa lwa u thoma a hu na na muthihi we a ima na nṋe, vhoṱhe vho nndaṱedza. Ngavhe Mudzimu a tshi vha hangwela.

¹⁷ Tenda Muṋe washu o ima na nṋe a nṋea nungo nda konou ḓivhadza mafhungo maḓifha ndi sa siedzi, uri tshakha dzoṱhe dza vhannḓa dzi a pfe. Nda vhuya nda tou ponyokiswa mulomoni wa ndau.

¹⁸ Nahone Muṋe washu u ḓo ḓi nndamukisa khomboni dzoṱhe a ntswikisa zwavhuḓi muvhusoni wawe ngei makoleni. Vhugala ndi hawe nga hu sa gumi. Amen.

Nyonesano

¹⁹ Phriska na Akwila na vha muṱa wa Onesiforosi vha vhe hone.

²⁰ Erastosi o sala Korinta. Throfimosi ndo mu sia Militosi a sa ḓiphiṋi.

²¹ Ni linge nga nungo dzoṱhe u ḓa vhuriha vhu sa athu swika. Yubulosi na Phudentsi na Linosi na Klaudia na vhatendi vhoṱhe vha ri ni vhe hone.

²² Muṋe washu a vhe na inwi a ni khwaṱhise muyani. A ni itele vhuthu noṱhe!