2 TIMOTI 2 - BIVHILI KHETHWA Mafhungo Madifha

Ḽiswole ḽi fulufhedzeaho ḽa Khristo Yesu

¹ Zwino-ha ṅwananga, khwaṱhiswani nga vhuthu he Mudzimu a ri itela nga Khristo Yesu.

² Zwenezwiḽa zwe nda ni laya ndi tshi pfiwa nga ṱhanzi nnzhi zwi kumedzeni vhathu vha fulufhedzeaho, vhane vha ḓo kona u funza-vho vhaṅwe.

³ Ni songo ofha u tambudzwa-vho ni tshi tambudzelwa Khristo Yesu unga zwo fanela maswole awe a fulufhedzeaho.

⁴ Ḽiswole ḽo bvaho pfumo ḽi tama u takadza mulangi waḽo, a ḽi dzheneleli kha mafhungo a songo livhanaho na zwa vhuswole.

⁵ Zwi ḓi nga mugidimi wa mbambe a sa wani muṅene arali a sa tevhedzi milayo ya mbambe.

⁶ Mabale ndi a mulimi wa biko.

⁷ Zwine nda khou amba zwi elekanyeni; Muṋe washu u ḓo ni ṋea nḓivho ya u ṱalukanya zwoṱhe.

⁸ Ni songo vhuya na hangwa uri mafhungo maḓifha ane nda a ḓivhadza a ri: Yesu Khristo muḓuhulu wa Dafita o vuwa vhafuni.

⁹ Ndi one mafhungo maḓifha ane nda tambudzelwa one, nda vhuya nda tou vhoxwa nga tsimbi nda nga ndi ḽivemu. Tenda ipfi ḽa Mudzimu ḽone ḽi songo vhoxwa.

¹⁰ Ndi zwine nda ḓi konḓelela zwoṱhe ndi tshi itela vhanangiwa vha Mudzimu uri na vhone vha tshidzwe nga Khristo Yesu vha ṋewe vhugala vhu sa gumi.

¹¹ Nahone mafhungo ane ra fanela u a fulufhela asia: Arali ro fa nae, na u tshila ri ḓo tshila nae.

¹² Arali ra konḓelela, na u vhusa ri ḓo vhusa nae. Arali ra mu laṱa, na Ene u ḓo ri laṱa.

¹³ Naho riṋe ri sa fulufhedzei, Ene u ḓi dzula a tshi fulufhedzea; ha ḓiṱambi, u ḓi dzula e onoyo.

Mushumi makone

¹⁴ Humbudzani vhathu ni vha eletshedze no tou khwaṱhisa, na Mudzimu a tshi ni pfa, uri vha litshe zwa u lwela maipfi; zwa u ralo a zwi farisi tshithu, tshazwo ndi u lozwa vhathetshelesi.

¹⁵ Tshaṋu lwelani u ḓikumedza Mudzimu na u shuma lu mu takadzaho; ni vhe mushumi a sa shoniswi nga mushumo wawe, a funzaho mafhungo one-one o tou nde kha ngoho.

¹⁶ Mafhafhaḓo a sa ḓivhalei one kha a vhe tshiila kha inwi, ngauri vha itaho zwenezwo vha ḓo ḓi fhambana na Mudzimu vha tshi ya.

¹⁷ Pfunzo yavho i nga ṅwatela. Vhaṅwe vhavho ndi Himiniasi na Filithosi.

¹⁸ Avho vho pambuwa nḓilani ya ngoho nga u funza uri ro no ḓi vuwa vhafuni kale, vha tshi ralo vha vilinganya lutendo lwa vhaṅwe vhatendi.

¹⁹ Naho zwo ralo muteo wo khwaṱhaho wo tewaho nga Mudzimu u nga si dzinginyee. Khawo ho ṅwalwa ha pfi, “Muṋe washu vha re vhawe u a vha ḓivha,” ha dohwa ha pfi, “Ane a ri ndi wa Muṋe washu nga a furalele vhuvhi.”

²⁰ Nḓuni ya muhulwane hu wanala midzio ya tshakha-tshakha; miṅwe i ya musuku na siliva, miṅwe i ya thanda na vumba; dziṅwe ndi mvuvhelo dza madzanga, maṅwe ndi magambiṱa.

²¹ Arali muthu a tshi kupula izwo zwoṱhe zwa vhuaḓa u ḓo vha yeneyo mvuvhelo ya madzanga, yó khethelwa muṋe wayo uri a shume ngayo, ngauri yo dzula yo lugiselwa u ita mishumo mivhuya yoṱhe.

²² Zwenezwo-ha ḓiiliseni nyemulo dza hana, tshaṋu lwelani vhuvhuya na lutendo na lufuno na mulalo ni na vha rabelaho Muṋe washu nga mbilu dzo ṱambaho.

²³ Hone khani dza vhutsilu dzi si na mushumo ni songo vhuya na ḓidzhenisa khadzo; hufha ni tshi zwi ḓivha uri zwo raloho zwi fhela nga dziphambano.

²⁴ Muḓinḓa wa Mudzimu ho ngo fanela u lwa, tshawe hu vhe u itela vhoṱhe vhuthu, a vhe makone wa u funza, ane naho a tshi vhaiswa a si fhele mbilu,

²⁵ naho o ṱangana na vhahanedzi a ḓi vha vhuedzedza nḓilani nga vhulenda, ngauri Mudzimu a nga ḓi vha a tshi funa u vha laṱisa vhuvhi havho uri vha ḓivhe ngoho

²⁶ na u vha dzivhulusa uri vha ponyoke zwikwekweni zwa diabolo we a vha o vha fasha uri vha ite zwine a funa.