2 SAMUELE 8 - BIVHILI KHETHWA Mafhungo Madifha

Dafita a tshi kunda maswina oṱhe a Israele

¹ Ngavhuya Dafita a kunda Vhafilista, a vha luvhisa tshoṱhe a vha dzhiela muvhuso.

² Dafita a kunda na Vhamuaba. Mathubwa a a ladza fhasi, kha vhararu vhaṅwe na vhaṅwe a vhulaha vhavhili a sia muthihi a tshila. Vhamuaba vha vha vhalanda vha Dafita vha thela muthelo.

³ Zwino Dafita a kunda Hadada Ezere khosi ya Tsoba, ṅwana wa Rehobo, musi Hadada Ezere a tshi khou ya uri a dovhe a luvhise shango u navha na mulambo wa Yufuratha.

⁴ Dafita a thuba vhanameli vha bere dza nndwa vha 1 700 na vhahali vha 20 000 vha tshimbilaho nga milenzhe. A sia bere dzi no lingana u kokodza gariki dza ḓana, dziṅwe dzoṱhe a dzi holefhadza.

⁵ Musi Vhaaramu vha Damasko vha tshi ḓa u phalala Hadada Ezere khosi ya Tsoba, Dafita a vhulaha vha 22 000 vhavho.

⁶ A vhea mmbi muvhusoni wa Vhaaramu vha Damasko, Vhaaramu vha mu luvha vha thela muthelo. Muṋe washu a ita uri Dafita a kunde hoṱhe he a ya.

⁷ Dafita a dzhia zwiṱangu zwa musuku zwa magota a Hadada Ezere, a zwi isa Jerusalema.

⁸ A dzhia na musinaseṱha munzhi miḓini ya Teba na Berothai, ye ya vha i tshi vhuswa nga Hadada Ezere.

⁹ Musi Thoi khosi ya Hamathi a tshi pfa upfi Dafita o kunda mmbi yoṱhe ya Hadada Ezere,

¹⁰ a ruma ṅwana wawe Joramu u yo resha khosi Dafita, na u mu fhululedza zwe a kunda Hadada Ezere, ngauri Hadada Ezere o vha a tshi ṱolou lwa na Thoi. Joramu a isela Dafita nduvho dza siliva na musuku na musinaseṱha.

¹¹ Khosi Dafita a kumedza Muṋe washu idzo nduvho, sa zwe a ita nga siliva na musuku zwi no bva kha tshakha dzoṱhe dze a dzi kunda,

¹² dza Vhaaramu na Vhamuaba na Vhaamoni na Vhafilista na Vhaamaleke. Dafita a kumedza na zwe a ṱangula Hadada Ezere khosi ya Tsoba, ṅwana wa Rehobo.

¹³ Dafita a vha na bvumo musi a tshi vhuya u vhulaha Vhaedomo vha 18 000 Govhani ḽa Muṋo.

¹⁴ Dafita a vhea mmbi kha ḽa Edomo ḽoṱhe, Vhaedomo vhoṱhe vha luvha Dafita. Muṋe washu a ita uri Dafita a kunde hoṱhe hune a ya.

Magota a Dafita

¹⁵ Dafita o vhusa ḽoṱhe ḽa Israele, misi yoṱhe a tshi tevhedza mulayo, a tshi tonda lushaka lwawe lwoṱhe.

¹⁶ Mulangammbi o vha e Juaba ṅwana wa Tseruya, Jehoshafati ṅwana wa Ahiludu o vha e tshanḓa tsha khosi,

¹⁷ Tsadoko ṅwana wa Ahitubu na Ahimelekhe ṅwana wa Abiathara vho vha vhe vhotshifhe, Seraya e muṅwaleli wa khosi,

¹⁸ Benaya ṅwana wa Jehoyada e mulangi wa vhalindi vha Dafita, vhana vha Dafita vhe vhotshifhe vha musanda.