2 SAMUELE 5 - BIVHILI KHETHWA Mafhungo Madifha

Dafita a tshi vha khosi ya Israele na Juda

¹ Matsinde oṱhe a Israele vha ḓa ha Dafita e Hebroni vha ri, “Ri malofha mathihi na vhone.

² Zwiḽa kale, musi Saulo a tshi kha ḓi vha khosi yashu, ndi vhone vhe vha vha vha tshi ranga Vhaisraele phanḓa musi vha tshi bva pfumo. Nahone Muṋe washu o vhudza vhone a ri, ‘Iwe u ḓo lisa vhathu vhanga Vhaisraele, wa vha muvhusi wavho.’ ”

³ Musi vhahulwane vhoṱhe vho ḓa ha khosi Dafita e Hebroni, a vhofha mulanga navho phanḓa ha Muṋe washu, vha vhumba Dafita khosi ya Israele.

⁴ Dafita a tshi vha khosi o vha e na miṅwaha ya 30, a vhusa a fhedza miṅwaha ya 40.

⁵ O vhusa ḽa Juda e Hebroni a fhedza miṅwaha miṱanu na mivhili na hafu, e Jerusalema o vhusa ḽoṱhe ḽa Israele na ḽa Juda a fhedza miṅwaha ya 33.

Dafita a tshi kunda Jerusalema

⁶ Khosi na vhanna vhe a vha e navho vha takuwa vha livha Jerusalema u yo lwa na Vhajebusi vhe vha vha vha tshi dzula henefho. Vhajebusi vha goḓa Dafita vha ri, “Fhano ha nga dzheni, u ḓo thivhelwa na nga mabofu na zwihole.” Vha tshi elekanya vho ri, “Dafita a nga si dzhene fhano.”

⁷ Naho zwo ralo Dafita a thuba dzhavhelo ḽa Tsioni, wa mbo vha Muḓi wa Dafita.

⁸ Musi wonoyo Dafita a ri, “Muthu ane a ṱoḓa u kunda Vhajebusi nga a dzhene nga thanele ya maḓi a tshoṱhele zwenezwo zwihole na mabofu, one maswina a Dafita.” Ndi zwine ha pfi, “Mabofu na zwihole vha nga si dzhene thembeleni.”

⁹ Dafita a pfulutshela dzhavheloni ḽa Tsioni a yo dzula hone a ri hu pfi Muḓi wa Dafita. Dafita a fhaṱa muḓi u mona naho, a thoma kha muṱoḓo wa thambalalo u no pfi Milo a tshi ya ngomu.

¹⁰ Dafita a ḓi vha na maanḓa a tshi ya ngauri Muṋe washu Mudzimu Mulangazwoṱhe o vha e nae.

¹¹ Zwino Hiramu khosi ya Tiro a ruma vhaḓinḓa vha ḓa ha Dafita vhe na matanda a mikedara na vhavhaḓi na vhatsheṱi vha mitsheṱo, vha fhaṱela Dafita pfamo.

¹² Dafita a zwi ḓivha uri Muṋe washu o mu vhumba khosi ya Israele nahone o hulisa muvhuso wawe a tshi itela vhathu vhawe Vhaisraele.

¹³ Dafita o ri u pfuluwa Hebroni a dzea vhafumakadzi vhanzhi, a dzea na vhasadzi vha dziphuli e Jerusalema, vha mu bebela vhana vhanzhi, vha vhatuka na vha vhasidzana.

¹⁴ Vhana vha Dafita vho bebwaho Jerusalema ndi: Shamua na Shobaba na Nathani na Solomoni

¹⁵ na Ibihara na Elishua na Nefege na Jafia

¹⁶ na Elishama na Eliada na Elifelete.

Dafita a tshi kunda Vhafilista

¹⁷ Vhafilista vha tshi pfa upfi Dafita o vhumbwa khosi ya Israele, mmbi yavho ya takuwa ya yo mu ṱoḓa uri i mu fare, hone Dafita a zwi pfa, a tsela dzhavheloni.

¹⁸ Zwino Vhafilista vho vha vho swika, vha ḓadza govha ḽa Refaimi.

¹⁹ Ndi hone Dafita a tshi vhudzisa Muṋe washu a ri, “Ndi ṱuwe ndi yo lwa na Vhafilista? Iwe u ḓo vha kumedza zwanḓani zwanga?” Muṋe washu a fhindula a ri, “Tshimbila, vhukumakuma ndi ḓo kumedza Vhafilista zwanḓani zwau.”

²⁰ Ndi hone Dafita a tshi ya Baali Pheratsimu, henefho a kunda Vhafilista. Dafita a ri, “Muṋe washu o kumba maswina anga a ntshavha, unga magabelo a tshi kumba.” Ndi zwine afho fhethu ha pfi Baali Pheratsimu (Mikumbela).

²¹ Vhafilista vha tshi shavha vha sia midzimu yavho ya zwifanyiso henefho, Dafita na vhanna vhe a vha e navho vha zwi hwala vha ṱuwa nazwo.

²² Vhafilista vha dovha vha ḓa vha vhekanya mmbi dzavho Govhani ḽa Refaimi.

²³ Dafita a vhudzisa Muṋe washu, Muṋe washu a fhindula a ri, “U songo tou gonya wo vha livha, itou vha mona nga murahu, u vha wele phanḓa ha miri ya maswi.

²⁴ Hezwi u tshi tou pfa mutsindo matavhini a miri ya maswi, u ṱavhanye, ngauri ndi ḓo vha ndo u ranga phanḓa u yo dia mmbi ya Vhafilista.”

²⁵ Dafita a ita zwe Muṋe washu a mu laya, a vhilimedza Vhafilista u bva Geba u vhuya u swika Gezere.