2 SAMUELE 4 - BIVHILI KHETHWA Mafhungo Madifha

Ishbaali a tshi vhulawa

¹ Musi Ishbaali ṅwana wa Saulo a tshi pfa uri Abinere o fela Hebroni, a kulea nungo, Vhaisraele vhoṱhe zwa vha akhamadza.

² Zwino ṅwana wa Saulo o vha e na vhanna vhavhili vhe vha vha vhe vhalangagomane. Muṅwe o vha a tshi pfi Baana, muṅwe a tshi pfi Rekhaba, vho vha vhe vhanna vha Rimoni wa tsinde ḽa Benyamini, a no bva Bierotho. Bierotho ho vha hu tshi kha ḓi vha tshipiḓa tsha shango ḽa Benyamini

³ nge vhathu vha Bierotho vha shavhela Githaimi, vha ḓi dzula henefho vhe ṱhunḓu, na ṋamusi.

⁴ Jonathani ṅwana wa Saulo o vha e na ṅwana wa mutuka we a vha e tshihole tsha ṋayo dzoṱhe vhuvhili hadzo. Musi mafhungo a lufu lwa Saulo na Jonathani a tshi pfala a tshi bva Jesriele, ene o vha e na miṅwaha miṱanu. Muleli wawe o mu doba a shavha nae, a shavha a tshi tou gidima lwe a mu wisa a holefhala. Ṅwana uyo o vha a tshi pfi Miribaali.

⁵ Zwino Rekhaba na Baana, vhana vha Rimoni wa Bierotho, vha takuwa vha livha muṱani wa Ishbaali vha swika masiari tshivhangalala, vha wana o kuvhama.

⁶ Vha dzhena ngomu-ngomu ha nnḓu sa vhane vha ṱoḓa u dzhia goroi, vha mu runga thumbu. Ndi hone Rekhaba na murathu wawe Baana vha tshi mbo ḓi ṋenga vha shavha.

⁷ Vho dzhena nḓuni musi ene o lala vhulaloni pfamoni yawe, vha mu runga a fa, vha mu tumula ṱhoho. Vha dzhia ṱhoho yawe vha ṱuwa nayo, vha lala vha tshi tshimbila vhusiku hoṱhe nga nḓila ya govha ḽa Jorodani.

⁸ Vha isa ṱhoho ya Ishbaali ha Dafita muḓini wa Hebroni, vha vhudza khosi vha ri, “Ngei ṱhoho ya Ishbaali ṅwana wa Saulo swina ḽavho we a linga u vha vhulaha. Ṋamusi Muṋe washu o lifhedzela thovhele muṋe wanga a lozwa Saulo na vhana vhawe.”

Dafita a tshi lifhedza phondi dza Ishbaali

⁹ Dafita a fhindula Rekhaba na murathu wawe Baana, vhana vha Rimoni wa Bierotho, a ri, “Nga Muṋe washu a tshilaho we a nndamulela khomboni dzoṱhe,

¹⁰ musi ho ḓa munna a mmbudza a ri, ‘Saulo o fa,’ a tshi elekanya uri u khou mmbudza mafhungo a takadzaho, ndo mu fara nda mu vhulaha hangei Tsikilaga. Ndi yone pfufho ye nda mu pfufha ngayo ndi tshi mu pfufhela mafhungo awe!

¹¹ Zwino zwi nga tou ngani, musi vhavhi vho vhulaha munna a si na mulandu, vha mu vhulahela ngomu nḓuni yawe, vhulaloni hawe. Zwino ndi nga kundwa ngani u ni lifhedza zwe na mu vhulaha? Ndi ḓo ni lozwa na si tsha vha hone fhano fhasi!”

¹² Ndi hone Dafita a tshi vhudza vhanna vhawe, vha vha vhulaha. Vha vha tumula zwanḓa na ṋayo, zwitumbu zwavho vha zwi nembeledza tsini ha isha muḓini wa Hebroni. Huno ṱhoho ya Ishbaali vha i dzhia vha i swiṱa tshaloni tsha Abinere muḓini wa Hebroni.