2 SAMUELE 24 - BIVHILI KHETHWA Mafhungo Madifha

Dafita a tshi vhala vhathu

¹ Muṋe washu a dovha a sinyutshela Israele, a rumeledza Dafita a ri, “Iyo vhala vhathu vha Israele na vha Juda.”

² Ndi hone khosi i tshi amba na Juaba na vhalangammbi vhe a vha e navho ya ri, “Iyani ni buḓekanye matsinde a Israele u bva Dani u swika Bierisheba ni ende ni tshi ṅwala vhahali uri ndi kone u ḓivha uri ndi vhangana.”

³ Huno Juaba a fhindula khosi a ri, “Ngavhe Muṋe washu Mudzimu wavho a tshi andisa mmbi kaḓana, nahone ngavhe thovhele vha tshi lalama vha zwi vhona zwi tshi itea. Hone ndi mini thovhele muṋe wanga vha tshi ṱoḓa ri tshi ita zwo raloho?”

⁴ Naho zwo ralo khosi i si thetshelese maipfi a Juaba na vhalangammbi, vha ṱutshela khosi u yo ṅwala vhahali vha Israele.

⁵ Vha wela Jorodani, vha ṱoka mishasha tshipembe ha Aruere, muḓi u re vhukati ha govha, shangoni ḽa Gadi, u bva henefho vha fhirela devhula ha Jasere.

⁶ Vha livha Giliadi vha vhuya vha swika shangoni ḽi re fhasi ha Kadeshe. Zwino vha livha Dani, u bva Dani vha fhira nga ha Sidoni.

⁷ Zwino vha livha tshipembe vha tshi ya muḓini wa Tiro wo tangeledzwaho nga mitsheṱo, vha fhirela miḓini yoṱhe ya Vhahivi na Vhakanana. Vha fhedza nga u ya Bierisheba tshipembe ha Juda.

⁸ Musi vho no ṱanganya shango ḽoṱhe, vha humela Jerusalema ho no fhela miṅwedzi miṱanu na miṋa na maḓuvha a 20.

⁹ Juaba a vhika tshivhalo tsha vhanna vhane vha nga kona u bva pfumo: Kha ḽa Israele ho vha hu na vhanna vha 800 000 vhe vha vha vha tshi kona u bva pfumo, kha ḽa Juda hu na vhanna vha 500 000.

¹⁰ Huno musi Dafita o no vhala vhathu zwa thoma u mu dina, a amba na Muṋe washu a ri, “Ndo tshinya nga maanḓa nga zwe nda ita. Zwino Muṋe washu, nkhangwele vhuvhi hanga nandi. Ndo ita zwithu zwa vhutsilu.”

¹¹ Musi Dafita a sa athu vuwa nga ḽa matshelo, ipfi ḽa Muṋe washu ḽa vha ḽo no ḓa kha muporofita Gadi muvhoni wa Dafita ḽa ri,

¹² “Tshimbila u yo vhudza Dafita u ri, ‘Yahavee u ri: Ndi khou u ṋea zwithu zwiraru zwine wa fanela u nanga khazwo. Nanga tshithihi tshine wa funa ndi tshi u ita tshone.’ ”

¹³ Ndi hone Gadi a tshi ya ha Dafita a mu vhudza a ri, “Vha nanga u welwa nga nḓala miṅwaha miṱanu na mivhili, kana vha nanga u pandamedzwa nga maswina avho miṅwedzi miraru? Kana vha nanga hu tshi ḓa dwadze shangoni ḽavho ḽa fhedza maḓuvha mararu? Zwino-ha, nga vha elekanye, vha mmbudze ambadzifhele uri ndi kone u fhindula we a nthuma.”

¹⁴ Dafita a fhindula Gadi a ri, “Ndo hanganea. Nga ri wele zwashu zwanḓani zwa Muṋe washu, ngauri khathutshelo yawe ndi khulu, hone ndi songo wela zwanḓani zwa vhathu.”

¹⁵ Ndi hone Muṋe washu a tshi ḓisa dwadze kha ḽa Israele u bva matsheloni eneo u swika tshifhinga tshe tsha vhewa, ha fa vhathu vha 70 000 u bva Dani u swika Bierisheba.

¹⁶ Musi muruṅwa a tshi angaladza tshanḓa tshawe uri a lozwe Jerusalema, Muṋe washu a ṱungufhala nga iyo khombo, a vhudza muruṅwa we a vha a tshi khou lifhedza vhathu a ri, “Ndi zwone! Humisa tshanḓa tshau.” Muruṅwa wa Muṋe washu zwenezwo o vha e luvhatani lwa u fhulela lwa Arauna wa Mujebusi.

¹⁷ Musi Dafita a tshi vhona muruṅwa we a vha a tshi khou vhulaha vhathu, a amba na Muṋe washu a ri, “Ndi nṋe we nda tshinya, nda khakha. Huno avha ndi nngu zwadzo. Vho itani? Tshanḓa tshau nga tshi lifhedze nṋe na nnḓu yanga.”

Dafita a tshi fhaṱa aḽiṱari

¹⁸ Musi wonoyo Gadi a ya ha Dafita a mu vhudza a ri, “Nga vha gonye vha yo fhaṱela Muṋe washu aḽiṱari luvhatani lwa u fhulela lwa Arauna wa Mujebusi.”

¹⁹ Dafita a gonya a tshi tevhedza zwe Muṋe washu a mu laya nga mulomo wa Gadi.

²⁰ Musi Arauna a tshi sedza a vhona khosi na vhanna vhayo vha tshi khou ḓa khae, a bvela nnḓa a gwadama phanḓa ha khosi a tou wa nga tshifhaṱuwo.

²¹ Arauna a ri, “Ndi mini thovhela muṋe wanga vho ḓa fhano ha nṋe?” Dafita a fhindula a ri, “Ndo ḓa u renga luvhata lwavho lwa u fhulela, uri ndi fhaṱele Muṋe washu aḽiṱari, uri dwadze ḽine vhathu vha ḽi lwala ḽi fhele.”

²² Arauna a amba na Dafita a ri, “Thovhela muṋe wanga nga vha dzhie tshine vha tou funa vha tshi ṋekedze. Phulu ngedzi dza tshiṱhavhelo tshi fhiswaho, zwifhulo ngezwi, dzhogo dza phulu ngedzi vha ite khuni.”

²³ Arauna a mbo ṋea khosi zwoṱhe hezwo, a ita na u vhudza khosi a ri, “Ngavhe Yahavee Mudzimu wavho a tshi ṱanganedza tshiṱhavhelo tshavho.”

²⁴ Huno khosi ya fhindula Arauna ya ri, “Aiwa nandi, ndi fanela u lu renga. Ndi nga si ṋekedze Muṋe washu Mudzimu wanga tshiṱhavhelo tshi fhiswaho tshe nda si tshi bvisele tshithu.” Dafita a renga ulwo luvhata lwa u fhulela na dziphulu a bvisa mangwende a 50 a siliva.

²⁵ A fhaṱela Muṋe washu aḽiṱari henefho a ṋekedza zwiṱhavhelo zwi fhiswaho na nduvho dza vhuthihi. Muṋe washu a pfa thabelo ya shango, dwadze ḽa Israele ḽa fhela.