2 SAMUELE 23 - BIVHILI KHETHWA Mafhungo Madifha

Maipfi a Dafita a u fhedzisela

¹ Maipfi a Dafita a u fhedzisela ngea, o ri: “Ngea mafhungo a Dafita ṅwana wa Isai, ndi mafhungo a munna we a huliswa, munna we a tiwa nga Mudzimu wa Jakopo, muimbi makone wa dzinyimbo wa Israele.

² “Muya wa Muṋe washu o amba nga mulomo wanga, maipfi awe o vha e lulimini lwanga.

³ Mudzimu wa Israele o amba na nṋe, bako ḽa Israele o mmbudza a ri, ‘Muthu a no vhusa vhathu a ita zwi re zwone, a vhusa nga u ofha Mudzimu,

⁴ u nga tshedza tsha nga matsheloni ḓuvha ḽi tshi bvisa mulomo nga matsheloni hu si na makole, u nga tshedza mvula i tshi kha ḓi bva u pfula ine ya medza hatsi mavuni.’

⁵ “Vhukuma nnḓu yanga a i nga shandukeli Mudzimu. O vhofha mulanga wa lini na lini na nṋe, a u vhekanya a u khwaṱhisa. Gundo ḽanga ḽoṱhe, dakalo ḽanga ḽoṱhe, zwi bva ha Ene. U mpha zwoṱhe zwine nda zwi tama.

⁶ Huno vhavhi vhoṱhe vha ḓo laṱwa nga thungo unga mipfa i sa kuvhanganywi nga tshanḓa.

⁷ Muthu ane a kwama mipfa, u i kuvhanganya nga tsimbi kana mufhiṋi wa pfumo, i fhiswa henefho hune ya vha hone.”

Vhahali vha Dafita vha bvumo

⁸ Madzina a vhahali vha Dafita vha bvumo ngea: Wa u thoma o vha e Ishbaali wa mutupo wa Hakhimoni, we a vha e ene murangaphanḓa wa Vhararu; o vhuya a lwa na vhanna vha 800 nga pfumo a vha vhulaha vhoṱhe nndwani nthihi.

⁹ Wa vhuvhili wa avho vhararu vha bvumo ndi Eliasara ṅwana wa Dodo, wa mutupo wa Ahoho. Muṅwe musi Vhafilista vho vha vho kuvhanganela u bva pfumo, ene na Dafita vha vha thoma. Vhaisraele vha humela murahu,

¹⁰ hone ene a ima a si sudzuluwe, a lwa na Vhafilista u swika tshanḓa tshawe tshi tshi farwa nga nyamurali tsha omelela banga tsha si tsha kona u ḽi litsha. Muṋe washu a ṋea Vhaisraele gundo ḽihulu musi uyo. Ngavhuya Vhaisraele vha humela he Eliasara a vha e hone, vha tou ḓa u ṱangula zwitumbu zwa maswina.

¹¹ Wa vhuraru wa avho vhararu vha bvumo o vha e Shama ṅwana wa Agee wa Harari. Vhafilista vho vha vho kuvhangana Lehi, he ha vha hu na tsimu ya eregisi. Vhaisraele vha shavha Vhafilista,

¹² hone Shama a ima a si sudzuluwe henefho tsimuni, a i tsireledza, a vhulaha Vhafilista. Musi uyo Muṋe washu a ṋea Vhaisraele gundo ḽihulu.

¹³ Muṅwe musi nga tshifhinga tsha khaṋo, vhaṅwe vhararu kha vha 30 vha re vharangaphanḓa, vha tsela ha Dafita bakoni ḽa Adulamu, zwenezwo ho vha ho ḓa tshigwada tsha Vhafilista tsha ṱoka mishasha govhani ḽa Refaimi.

¹⁴ Tshifhinga tshenetsho Dafita o vha e vhudzumbamoni hawe thavhani, tshigwada tsha Vhafilista tshi Betlehema.

¹⁵ Dafita a pfa o farwa nga ḓora a tou fhihamelwa a ri, “Ngavhe muṅwe a tshi nkela maḓi a u nwa a no bva bidzini i re tsini na khoro ya Betlehema!”

¹⁶ Vhanna avho vhararu vha vhuhali vha ḓifunga vha fhira vhukati ha mishasha ya Vhafilista, vha ka maḓi bidzini i re tsini na khoro ya Betlehema, vha a hwala vha a isa ha Dafita. Hone Dafita a hana u nwa ayo maḓi, a tou a tevhulela Muṋe washu ya vha nduvho,

¹⁷ a ri, “Yawee Muṋe washu, maḓi haya ndi nga a nwa hani? Zwi nga tou nga ndi khou nwa malofha a avha vhanna vhe vha ḓifunga vha tshi ya vha a ka!” Dafita a si nwe ayo maḓi. Uho ndi vhuhali ha avho vhanna vhararu vha bvumo.

¹⁸ Abishai murathu wa Juaba ṅwana wa Tseruya, o vha e ene murangaphanḓa wa Vha-30 vha bvumo. O vhuya a lwa na vhanna vha 300 e eṱhe a vha vhulaha, a vha na bvumo kha Vha-30.

¹⁹ O vha ene wa bvumo ḽihulu kha Vha-30, a vha ene murangaphanḓa wavho, hone o vha a si na bvumo ḽi no nga ḽa Vhararu.

²⁰ Muṅwe muhali wa bvumo o vha e Benaya ṅwana wa Jehoyada wa Kabutsiele; ndi kanzhi a tshi sumbedza vhuhali hawe, hu tshi katelwa na vhahali vhavhili vha Muaba, vhana vha Ariele, vhe a vha vhulaha. O vhuya a tsela dindini musi wa gabugu a vhulaha ndau.

²¹ O vhulaha na Muegipita, munna wa muswonḓa we a vha o fara pfumo. Benaya a kovhola uyo Muegipita nga mugopi, a mu zhuvhulela pfumo, a mu vhulaha ngaḽo.

²² Uho ndi vhuhali ha Benaya ṅwana wa Jehoyada. O vha e na bvumo kha Vha-30.

²³ O vha a tshi huliswa u fhira Vha-30, hone o vha a si na bvumo ḽi no nga ḽa Vhararu. Dafita a mu vhea uri a vhe muhulwane wa vhalindi vhawe.

²⁴ Kha Vha-30 ho vha hu na: Asaele murathu wa Juaba, Elihanani ṅwana wa Dodo wa Betlehema,

²⁵ Shama wa Harodo, Elika wa Harodo,

²⁶ Heletse wa Phelete, Ira ṅwana wa Ikeshe wa Thekua,

²⁷ Abiesere wa Anathotho, Mebunai wa Husha,

²⁸ Tsalimoni wa Ahoho, Maharai wa Netofa,

²⁹ Helebe ṅwana wa Baana wa Netofa, Ithai ṅwana wa Ribai wa Gibia kha ḽa Benyamini,

³⁰ Benaya wa Phirathoni, Hidai wa magovhani wa Gaashi,

³¹ Abialiboni wa Araba, Asimavethe wa Bahurimu,

³² Eliaba wa Shaaliboni, Jasheni wa Gunu, Jonathani

³³ ṅwana wa Shama wa Harari, Ahiamu ṅwana wa Sharara wa Harari,

³⁴ Elifelete ṅwana wa Ahasibai wa Maakha, Eliamu ṅwana wa Ahithofele wa Gilo,

³⁵ Hetsiro wa Kharamele, Paarai wa Arabu,

³⁶ Igala ṅwana wa Nathani wa Tsoba, Bani wa Gadi,

³⁷ Tseleke wa Amoni, Naharai wa Bierotho, muhwali wa zwihali zwa Juaba ṅwana wa Tseruya,

³⁸ Ira wa Jathiri, Garebe wa Jathiri,

³⁹ na Uria wa Muhithi. Vhahali vhoṱhe vha bvumo vho ṱangana vho vha vhe 37.