2 SAMUELE 22 - BIVHILI KHETHWA Mafhungo Madifha

Luimbo lwa Dafita lwa u fhululedza

¹ Dafita o imbela Muṋe washu luimbo holu musi Muṋe washu o mu lamulela zwanḓani zwa maswina awe oṱhe na zwanḓani zwa Saulo.

² Dafita o ri: “Muṋe washu ndi bako ḽanga, ndi vhushavhelo hanga, ndi Mulamuleli wanga.

³ Mudzimu wanga ndi tombo ḽanga, Ene ane nda khuda ngae, ndi Ene tshiṱangu tshanga, pfumo ḽi nndwelaho. Ndo ḓitika ngae, ndi dzhavhelo ḽanga, ndi Mutshidzi wanga, u ntshidza kha vhanna vha tshiṱuhu.

⁴ Muṋe washu ndo ḓi mu vhidzelela ndó welwa nga maswina, a ntshidza, nga hu khoḓwe Ene.

⁵ “Ndo vha ndo kumbiwa nga magabelo a lufu, ndó khakhedzwa nga tshirulu tsha ndozwo.

⁶ Ndo vha ndo tandedzwa nga mambule a tshalo, ndó livhana na milavhu ya lufu,

⁷ nda ḓi vhidzelela Muṋe washu ndó khakhedzwa, Mudzimu wanga nda mu ṱavhela mukosi, Ene a pfa ipfi ḽanga e pfamoni yawe, mukosi wanga wa swika nḓevheni dzawe.

⁸ “Zwenezwo shango ḽa dzinginyea ḽa tetemela, miteo ya ḽiṱaḓulu ya tseka-tseka, ya tetemela ó sinyuwa.

⁹ Ningoni dzawe ha duba vhutsi, mulomoni wawe ha bva khavhu dza vhuhali, a pfela masimbe a mulilo fhasi.

¹⁰ Lutombo a lu peta a tsela fhasi, fhasi ha ṋayo dzawe hú na swiswi ḽitswu-ḽitswu,

¹¹ a fhufha ó namela mukherube, a vhonala o tengama nga phapha dza muya,

¹² a dzhia swiswi a fuka ḽone, thumba yawe e makole matswu a mvula,

¹³ phanḓa hawe he vhenge, vhenge, makole a shulula masimbe,

¹⁴ Muṋe washu a ritha mubvumo ṱaḓulu he ngindii, Waṱaḓuluṱaḓulu a mbo ṱahisa ipfi ḽawe,

¹⁵ a posa misevhe yawe a vha balanganya, a thathabisa nḓadzi dzawe vha shavha vhó ḓaḓa.

¹⁶ Zwenezwo miedzi ya lwanzhe ya sala nnḓa, miteo ya ḽifhasi ya sala khagala u tshi vha kaidza Iwe Muṋe washu, hu tshi tita muya u bvaho ningoni dzau.

¹⁷ “Muṋe washu a onyolosa tshanḓa e ngei ṱaḓulu, a ntakula a nṋula mikumbelani,

¹⁸ a nndamukisa zwanḓani zwa swina ḽanga ḽa maanḓa na vha mmbengaho, ngauri nṋe ndo vha ndi nga si vha kone.

¹⁹ Vho nnzhongondedza ndó welwa nga zwo vhifhaho, fhedzi nda tou fa Muṋe washu,

²⁰ Ene a nṋula vhukati havho. O ntshidza ngauri u a mpfuna.

²¹ “Muṋe washu o mpfufha nga zwo fanelaho a no fulufhedzea, a nṋea zwo fanelaho a si na mulandu,

²² ngauri ndo tevhedza nḓila dza Muṋe washu, a tho ngo tenda vhuvhi vhu tshi mphandekanya na Mudzimu wanga.

²³ Milayo yawe yoṱhe a i ṱuwi mbiluni yanga, zwe a laya a tho ngo zwi sendedza kule.

²⁴ Ene muṋe o vhona ndi sa solisei, tshanga ho ḓi vha u ofha u khakha.

²⁵ Ndi zwe Muṋe washu a mpfufha nga zwo fanelaho a no fulufhedzea, nge a vhona ndi si na mulandu.

²⁶ “Vha vhuthu Iwe u ḓi vha ita-vho nga vhuthu; a sa solisei u mu pfufha nga zwi sa solisei;

²⁷ vha mbilu dzo ṱambaho vha wana na Iwe u na mbilu tshena, hone vhadziavhumbulu vha wana u swina.

²⁸ Iwe u tshidza vha ḓiṱukufhadzaho, wa ṱukufhadza vha u ḓihudza.

²⁹ “Muṋe washu, ndi Iwe luvhone lwanga, wa pandela swiswi ḽo ntibaho, Iwe Mudzimu wanga.

³⁰ Ndí na Iwe ndi wela mmbi nga pfumo, ndí na Mudzimu wanga ndi fhufha mitsheṱo.

³¹ Ndi Ene Mudzimu a sa khakhi, ḽine a amba ḽi ḓi wanala ḽi ngoho. Ndi Ene tshiṱangu tsha vhoṱhe vhane vha khuda ngae.

³² Nṋa hone Mudzimu ndi nnyi arali e si Ene Muṋe washu? Bako ḽa vhudzumbamo hashu ndi nnyi arali e si Mudzimu washu?

³³ Ndi Ene Mudzimu we a nnyambadza nungo, nda tshimbila ndi sa khukhulwi.

³⁴ U mpha luvhilo lwa phala, na nṱha ha thavha a thi khukhulwi.

³⁵ Zwanḓa zwanga u zwi gudisa nndwa, zwa khwaṱha nda akha vhura ha tsimbi tswuku.

³⁶ “U tshidzwa nga Iwe ndi tshone tshiṱangu tshanga, wa pfa thabelo yanga wa mpha vhuhulwane.

³⁷ Ṋayo dzanga wo dzi ṋea vhukando nda sa redzemuwe.

³⁸ Maswina anga ndo a pandamedza nda a fhedza, nda si vha humele vha sa athu fhela vhoṱhe.

³⁹ Ndo vha kuyekanya tshoṱhe nda vha kandekanya nga ṋayo dzanga.

⁴⁰ Wo mpha maanḓa a u dzhena nndwa, maswina anga wa a susumedza fhasi ha ṋayo dzanga.

⁴¹ Wo ita uri maswina anga a mphe zwitiko, nda fhedza vhoṱhe vhe vha vha vha tshi mmbenga.

⁴² Vho ṱavha mukosi vha shaya mulamuleli, vha vhidzelela Muṋe washu a si vha aravhe,

⁴³ nda vha phusukanya sa mavu, nda vha kudza nnḓa vha nga lurofhe nḓilani.

⁴⁴ “Wo nndamukisa vha hashu vha tshi mmvutshela, wa ntsireledza nda vha ṱhoho ya tshakha, nda luvhiwa na nga vhane nda si vha ḓivhe.

⁴⁵ Vhatsinda vho ḓa vha khotha, vho ri u mpfa vha thetshelesa,

⁴⁶ vha kulea miraḓo, vha bva mitsheṱoni yavho vha tshi tou khura nga nyofho.

⁴⁷ “Muṋe washu u a tshila! Nga hu rendwe Ene bako ḽanga, nga hu huliswe Ene Mudzimu wanga, Ene tombo ḽine nda shavhela khaḽo.

⁴⁸ Ndi Mudzimu we a mpha maanḓa a u ḓilifhedzela, tshakha a dzi ita vhalanda vhanga,

⁴⁹ a nndamukisa zwanḓani zwa vha mmbengaho. Ndi Iwe we wa nṋea vhuhulwane nda fhira maswina anga, vhalevhi vha tshi mmvutshela wa ntshidza.

⁵⁰ Muṋe washu, ndi zwine nda ḓo u renda vhukati ha dzitshakha, ndi ḓo renda dzina ḽau nga luimbo.

⁵¹ Khosi ye wa i ta wa i sumbedza lufuno lu sa dzinginyei, ya kunda maswina tshoṱhe – ene Dafita na vhaḓuhulu vhawe, zwino na lini na lini.”